Read Baibul, Mizo Luka 1 Bible Online

Luka 1 - Baibul, Mizo bible

Luka 1

¹Kha thil kan zinga lo thleng, atir ata a hmutute

²leh thu rawngbawltuten keimahni min hrilh ang khan, mi tam takin ziak an tum ta a;

³chuvangin Theophil tha ber, a bul ata engkim fel takin ka chhui a, indawt zelin i tan ziak i la a tha ang, ka ti a ni;

⁴hmana thu an zirtir che kha dik tak a ni tih i hriat theihna'n.

⁵Judai ram lal Heroda a dam laiin, Abija pawla mi a hming Zakaria puithiam pakhat a awm a; chu mi chuan Arona thlah zinga mi nupuiah a nei a, a hming chu Elizabeti a ni.

⁶An pahnihin Pathian mithmuhin fel takin an awm a, sawiselboin Lalpa thupek leh a dan zawng zawng zawmin an awm thin.

⁷Nimahsela Elizabeti a chin avangin fa an nei lo, an pahnihin upa tak an ni si a.

⁸Tin, heti hi a ni a, a pawlte tih dan ang zela Pathian hmaa puithiama a chet laiin,

⁹puithiam dan angin Lalpa biak ina luh leh englo rimtui hal a chang a.

¹⁰Tin, englo rimtui hal hun laiin mipui chu an zain pawnah an tawngtai a.

¹¹Tin, Lalpa vantirhkoh pakhat englo rimtui halna maicham ding lama dingin a hnenah a inlar a.

¹²Tin, Zakarian a hmuh veleh a mangang a, hlauh pawh a hlau a.

¹³Nimahsela vantirhkoh chuan a hnenah, "Zakari, hlau suh, i dil kha a hria a sin, i nupui Elizabetin fapa a hrinsak ang che, a hmingah Johana i sa tur a ni.

¹⁴Tin, nang i hlimin i lawm ang a; amah a pianin mi tam tak an lawm bawk ang.

¹⁵Lalpa ngaihin mi lian a ni ang a, uain leh zu reng reng a in loing; a nu pum chhung atang rengin Thlarau Thianghlimin a lo khat ang.

¹⁶Israela thlahte tam tak Lalpa an Pathian hnen lamah a hawitir leh ang.

¹⁷Tin, pate thinlung chu fate lama hawitir tur te, mi tihmawhte chu mi fel tak finna lama hawitir tur te, Lalpa tana mi lo inpeih tur tea buatsaih turin Elija rilru leh a thiltihtheihna puin Lalpa hmaan a kal ang," a ti a.

¹⁸Tin, Zakarian vantirhkoh hnenah chuan, "Chu chu engtin nge ka hriat ang? kei putar ka ni a, ka nupui pawh pitar a ni si a," a ti a.

¹⁹Tin, vantirhkoh chuan a chhang a, a hnenah, "Gabriela, Pathian hmaa ding thin ka ni a; a be tur che leh, chung thu tha chu hrilh tur chein rawn tirh ka ni.

²⁰Ngai rawh, ka thu sawite a hun taka lo thleng tur chu i awi loh avangin chung thil chu a lo thlen hma loh zawng i ngawi reng ang a, tawng pawh i tawng thei lo ang," a ti a.

²¹Tin, vantlangho chuan Zakaria chu an lo nghak a, Pathian biak in chhunga a awm rei avang chuan mak an ti hle a.

²²Tin, a lo chhuah chuan an hnenah thu a sawi thei ta lo a; tichuan biak inah thlarau inlar a hmu a ni tih an hre ta a; tin, an hnenah a zaizir fo a, tawng thei loin a awm ta reng a.

²³Tin, heti hi a ni a, a rawngbawlna hun ni bi chu a kim veleh chuan a inah a haw ta a.

²⁴Tin, chu mi hnuah chuan a nupui Elizabeti chu a lo rai ta a,

²⁵Mi hnena ka hming chhia chhilhna'n Lalpa'n mi hmuhin heti hian mi tihsak ta," tiin thla nga a biru a.

²⁶Tin, a thla ruknaah chuan Pathianin vantirhkoh Gabriela chu Galili rama khaw pakhat Nazaret an tihah chuan, nula thianghlim pakhat hnenah a tir a,

²⁷chu nula chu Davida thlaha mi a hming Josefa nupui hual a ni a; nula hming chu Mari a ni.

²⁸Tin, vantirhkoh chu a hnenah a lut a, "Chibai, Vohbik! Lalpa i hnenah a awm," a ti a.

²⁹Tin, chu mi thusawi avang chuan a mangang ta em em a, "Engtiziaa chibai mi buk nge ni ang?" tiin a inngaihtuah a.

³⁰Tin, vantirhkoh chuan a hnenah, "Mari, hlau suh; Pathian ngaihsakzawng i ni e.

³¹Ngai rawh, i rai ang a, fapa i hring ang a, a hmingah chuan Isua i sa tur a ni.

³²Ani chu mi lian a la ni ang a, Chungnungbera Fapa an ti ang; Lal Pathianin a hnenah a thlahtu Davida thutphah chu a pe ang a;

³³Jakoba thlahte chungah chatuanin a lal ang a, a ramin kin ni a nei lo ang," a ti a.

³⁴Tin, Marin vantirhkoh hnenah chuan, "Chung chu engtin nge ni ang? mipa ka nei si lo," a ti a.

³⁵Tin, vantirhkoh chuan a chhang a, a hnenah, "Thlarau Thianghlim i chungah a lo thleng ang a, Chungnungbera thiltihtheihnain a hliahkhuh ang che; chuvangin mi thianghlim lo piang tur pawh chu Pathian Fapa an ti ang.

³⁶Tin, ngai teh, i lichinnu Elizabeti pawhin a tar hnuin mipa a pai ta; a ching an tih thin kha, tun thla hi a thla rukna a ni tawh.

³⁷Pathian thu chhuak reng reng thil tithei loin a awm lo ang," a ti a.

³⁸Tin, Marin, "Ngai teh, Lalpa bawihnu ka ni, i thu ang zelin ka chungah thleng rawh se," a ti a. Tin, vantirhkoh chuan a kalsan ta a.

³⁹Chung lai chuan Mari chu a tho a, thingtlangah, Judai rama khaw pakhatah chuan a kal ta thuai a;

⁴⁰tin, Zakaria inah a lut a, Elizabeti chibai a buk a.

⁴¹Tin, heti hi a ni a, Elizabetin Mari chibai buk chu a hriat veleh, a pum chhunga naute chu a che a; tin, Elizabeti chu Thlarau Thianghlimin a lo khat ta a;

⁴²tin, aw ring takin a au a, "Nang chu hmeichhia azawnga engthawl i ni, i rila rah pawh a engthawl a ni.

⁴³Ka Lalpa nu, ka hnena i lo kal hi engtizia nge ni le?

⁴⁴Ngai teh, i chibai buk thawm ka benga a luh veleh, a lawm avangin naute ka pum chhungah a che a ni.

⁴⁵A ringnu pawh a eng a thawl a ni, a hnena Lalpain thu a sawi kha a thleng dawn si a," a ti a.

⁴⁶Tin, Marin, "Ka nun hian Lalpa a chawimawi e,

⁴⁷Ka thlarau pawh mi chhandamtu Pathian chungah a lawm ta em em a.

⁴⁸A bawihnu hnam tlawmzia a hmu a, a khawngaih a; Ngai rawh, tun achinah thangthar zawng zawngin nihlawh mi ti dawn a ni.

⁴⁹Mi chak khan ka chungah thil ropui tak mi tihsak a, A hming pawh a thianghlim a ni.

⁵⁰A tihtute chu thangthar thlengin a khawngaih zel thin.

⁵¹A banin a tha chakzia a entir a, mi chapote chu an inngaihtuahnain a tidarh ta a.

⁵²An thutphaha lal thute chu a hnuk thla a. Hnam tlawmte chu a chawimawi ta a.

⁵³Riltamte chu thil tha takin a tipuar a, hausate chu kutruakin a kal botir ta a.

⁵⁴Kan thlahtute hnena a sawi ang khan,

⁵⁵Abrahama leh a thlahte chu chatuana a khawngaih turzia hriat rengna'n, a chhiahhlawh Israelte chu a chhawmdawl ta a," a ti a.

⁵⁶Tin, Mari chu thla thum lai a hnenah a awm a, a in lamah a haw leh ta a.

⁵⁷Tin, Elizabeti nau hrin chu a lo hun ta a; tichuan fapa a rawn hring a.

⁵⁸Tin, a vengte leh a laichinte chuan Lalpa'n a khawngaih em em tih an lo hria a, an lawmpui a.

⁵⁹Tin, heti hi a ni a, a ni riat niah chuan nausen serh tan turin an lo kal a; a hmingah a pa hming vek zakaria bawk sak an tum a.

⁶⁰Tin, a nu'n, "Ni lo e, ani zawng Johana sak zawk tur a ni," a ti a, a chhang a.

⁶¹Tin, anni'n a hnenah, "I laichinte zingah he hming pu hi tumah an awm hlei nem," an ti a.

⁶²Tin, a pa hnenah chuan zaizirin, "a hmingah eng nge sa i la i duh?" an ti a.

⁶³Tin, lehkha ziakna phek a dil a, "A hming Johana a ni e," tiin a ziak a. Tin, an zain mak an ti hle a.

⁶⁴Tin, chawplehchilhin a ka leh a lei chu a lo inphelh a, Pathian fakin a lo tawng chhuak ta nghal a.

⁶⁵Tin, an vela awmte zawng zawng chuan an hlau ta a. Tin, chung thu chu Judai ram thingtlang zawng zawngah a thang vel ta a.

⁶⁶Tin, a hria apiangin an rilruah lungkhamah an nei a, "Chu nausen chu engtin tak la awm ang maw?" an ti a; Lalpa kutin amah a tanpui si a.

⁶⁷Tin, a pa Zakaria chu Thlarau Thianghlimin a lo khat a, a sawi lawk a,

⁶⁸Lalpa, Israela Pathian chu fakin awm rawh se, a mite chu a rawn tlawh a, tlanna a siamsak a,

⁶⁹A chhiahhlawh Davida chhungte zingah chuan chhandamna ropui tak min siamsak a;

⁷⁰(Leilung pian tirh ata a zawlnei thianghlimte kaa a sawi ang khan)

⁷¹Kan dote lakah leh min hawtute zawng zawng laka chhandamna chu;

⁷²Kan thlahtute khawngaihna'n leh a thuthlung thianghlim hriat rengna'n;

⁷³Kan thlahtu Abrahama hnenah chhia a chham kha,

⁷⁴Kan dote lakah kan him a,Kan dam chhung zawng a mithmuha thianghlim leh fel taka awm a,

⁷⁵Hlau loa a rawng min bawltir tur thu kha.

⁷⁶A ni, Taite, nang hi Chungnungbera zawlnei an ti ang che; a kawngte siam turin Lalpa hmaah i kal dawn si a;

⁷⁷Kan Pathian thinlunga khawngaihna avangin

⁷⁸An sualte ngaihdamna'n a mite hnenah chhandamna thu hriattir turin. Chu mi avang chuan chung lam atangin ni chhuakin min rawn tlawh ang,

⁷⁹Thim zingah leh thihna hlima thute en tur leh thlamuanna kawnga kan ke pentir turin," a ti a.Tin, nausen chu a lo thang lian deuh deuh a, a rilru lam a lo nghet ta telh telh a, Israelte hnena a rawn inlar hma loh zawng thlalerah a awm reng a.

⁸⁰Tin, nausen chu a lo thang lian deuh deuh a, a rilru lam a lo nghet ta telh telh a, Israelte hnena a rawn inlar hma loh zawng thlalerah a awm reng a.