Read Baibul, Mizo Luka 10 Bible Online

Luka 10 - Baibul, Mizo bible

Luka 10

¹Tin, chu mi zawhah chuan Lalpa'n mi dang sawmsarih a ruat a, a kalna tur khaw tinah leh hmun tinah, a hmaah pahnih zelin a tir a.

²Tin, an hnenah, "Buh seng tur a tamhle a, nimahsela a thawktute an tlem; chutichuan a buh seng tura thawktu turte tir turin buh Neitupa hnenah chuan ngen rawh u.

³Kal rawh u; ngai teh u, chinghne zinga beram no awm angin ka tirh che u hi.

⁴Tangka ip te, ipte te, pheikhawk te keng suh u la, kalkawngah tumah chibai buk suh u.

⁵Tin, in luhna in apiangah a hmasa berin, "He inah hian thlamuanna thleng rawh se," ti ang che u.

⁶Tin, chutah chuan thlamuan fa a awm chuan in thlamuanna thu chu a chungah a awm reng ang; a awm loh erawh chuan in chungah a lo kir leh ang.

⁷Chu mi in hlirah chuan awm reng u la, an pek apiang che u eiin bar ang che u; hnathawktu chu hlawh hmu tlak a ni a. In tinah kal lawr suh ang che u.

⁸Tin, khua in luhna apiangah an lawm che u chuan an hlui apiang che u chu ei ang che u;

⁹an khuaa damlo awmte pawh tidam u la, an hnenah, 'Pathian ram in kiangah a thleng ta,' ti ang che u.

¹⁰Khua in luhna apiangah an lawm loh che u erawh chuan, an kawtthlerah kal chhuak u la,

¹¹'In khaw vaivut kan kephaha kai pawh hi in chungah kan tahfai hi; nimhsela Pathian ram in kiangah a lo thleng ta tih hi hre rawh u,' ti ang che u.

¹²Ka ti a che u, chu mi niah chuan chu mi khuate tuar tur ai chuan Sodom khaw tuar tur chu a zia a awm zawk ang.

¹³Korazin, i chung a pik e! Bethsaida, I chung a pik e! Nangmahnia thilmak tak tihte kha Tura leh Sidon khuaa tih ni se la, saiip puan sina vut zinga thuin an sim daih tawh ang.

¹⁴Nimahsela ngaihtuah niah chuan nangni tuar tur ai chuan Tura leh Sidon khaw tuar tur chu a zia a awm zawk ang.

¹⁵Tin, nang Kapernaum, van thlengin chawimawi i ni dawn em ni? Mitthi khaw thlenga nam thlak a sin i nih dawn.

¹⁶Tupawh nangni thu ngai chu keima thu ngai a ni e; tupawh a duh lo che u chu kei mi duh lo a ni e; tupawh kei mi duh lo chu mi tirtu duh lo a ni e," a ti a.

¹⁷Tin, sawmsarihte chu lawm takin an lo hawng a, "Lalpa, ramhuaite pawh i hming avangin kan thu thuin an awm," an ti a.

¹⁸Tin, ani chuan an hnenah, "Tek anga Setana van atanga a lo tla kha ka hmu a sin.

¹⁹Ngai teh u, rulte, khawmualkaikuangte rah theihna thu ka pe che u a; engmahin a tina tawp lo ang che u.

²⁰Nimahsela ramhuaite in thu thuin an awm avang hian lawm suh u; vana in hming ziak a nih avangin lawm zawk rawh u," a ti a.

²¹Tin, chu mi lai tak chuan Isua chu Thlarau Thianghlimah a lawm em em a, "Aw ka Pa, lei leh van Lalpa, nangin mi fing leh mi bengvarte hnenah he'ng thu hi i zep a, nausente hnena i puan avang hian ka fak a che; a ni, ka Pa, chutiang tih chu i ngaihin a tha a ni.

²²Ka Pain engkim mi kawltir tawh, Fapa chu tu nge a nih, Pa lo chuan tuma'n an hre lo; Pa pawh chu tu nge a nih, Fapa leh an hnena Fapain a puan duhnate chauh lo chuan tuma'n an hre lo," a ti a.

²³Tin, zirtirte lam a hawi a, arukin, "In thil hmuhte hi a hmuhna mitte chu a vannei e!

²⁴Ka ti a che u, zawlnei tam tak leh lal tam takte pawhin in thil hmuhte hi hmuh an chak thin a, nimahsela an hmu si lo; benga in hriatte pawh hi hriat an chak thin a, nimahsela an hre si lo a ni," a ti a.

²⁵Tin, ngai teh, dan hretu tu emaw a ding a, amah fiahna'n, "Zirtirtu, chatuana nun neihna turin engtin nge ka tih ang?" a ti a.

²⁶Tin, ani chuan a hnenah, "Dan lehkhabuah eng nge ziak ni? chutah chuan eng nge i chhiar thin?" a ti a.

²⁷Tin, ani chuan, "Lalpa i Pathian chu i thinlung zawng zawngin, i thlarau zawng zawngin, i chakna zawng zawngin, i rilru zawng zawngin i hmangaih tur a ni,' 'Nangmah i inhmangaih angin i vengte pawh i hmangaih tur a ni,' tih hi," a ti a, a chhang a.

²⁸Tin, ani chuan a hnenah, "I chhang dik zet mai e; chutichuan ti la, i nung ang," a ti a.

²⁹Ani erawh chuan thiam inchantir a tum a, Isua hnenah, "A nih leh, ka vengte chu tu nge ni?" a ti a.

³⁰Isua'n a chhang a, "Tu emaw Jerusalem khua atangin Jeriko khuaah a zuk kal dawn a, suamhmangte a tawk hlauh a, chu mite chuan a silhfen an hlihsak vek a, an vaw nek a, thi lek lekin an kalsan ta a.

³¹Tin, puithiam tu emaw chu mi kawngah chuan a zuk kal kher a, a hmuh veleh kawng sir lehlamah a hel ta mai a.

³²Tin, chutiang bawkin Levia chi mi pakhat pawh chu mi hmun chu a lo thleng a, a hmuh veleh kawngsir lehlamah a hel ve ta mai a.

³³Amaherawhchu Samari rama mi tu emaw a zin kalin a awmna chu a lo thleng a, a hmuh veleh a khawngaihem em a.

³⁴A hnenah a va kal a, a pemahte chuan hriak leh uain a leih a, a tuam a, ama sa chungah a chuantir a, khualbukah a kalpui a, a enkawl ta a.

³⁵Tin, atukah chuan duli pahnih a phawrh a, khualbuk vengtu hnenah a pe a, 'Lo enkawl la, he mi baka i sen zawng chu ka lo kir leh hunah ka rawn rul leh ang che,' a ti a.

³⁶Chu mite pathum zingah chuan suamhmangho tawka vengte chu tu ber nge nia i rin?" a ti a.

³⁷Tin, ani chuan, "A khawngaihtu chu," a ti a. Tin, Isua'n a hnenah, "Nang pawh chu ang bawk chuan va ti ve rawh," a ti a.

³⁸Tin, an zin pahin khaw engah emaw a lut a; tin, hmeichhe pakhat a hming Marthiin a lo thleng a.

³⁹Chu mi chuan laizawn pakhat a nei a, a hming chu Mari a ni a, chu mi chu Lalpa ke bulah a thu a, a thu a ngaithla a.

⁴⁰Marthi erawh chu rawngbawl ngawtin a buai hle a; tichuan a hnenah a lo kal a, "Lalpa, ka laizawnnun keimah chauh rawngbawl tura mi thlahthlam hi pawi i ti lo em ni? Mi pui turin ti rawh khai," a ti a.

⁴¹Tin, Lalpa'n, "Marthi, Marthi, thil tam tak i ngaihtuah a, i buai a nih hi:thil pakhat chauh a pawimawh e; Marin chan tha chu a thlang a, chu chu laksak tur a ni lo e," a ti a, a chhang a.

⁴²thil pakhat chauh a pawimawh e; Marin chan tha chu a thlang a, chu chu laksak tur a ni lo e," a ti a, a chhang a.