Read Baibul, Mizo Luka 11 Bible Online

Luka 11 - Baibul, Mizo bible

Luka 11

¹Tin, heti hi a ni a, Isua khawii hmunah emaw a tawngtai a, a tawngtai zawh chuan a zirtir mi pakhatin a hnenah, "Lalpa, tawngtai dan Johanan a zirtirte a zirtir ang khan min zirtir ve ta che," a ti a.

²Tin, ani chuan an hnenah, "In tawngtai chuan heti hia ti ang che u, 'Kan Pa, I hming zahawm rawh se. I ram lo thleng rawh se.

³Ni tin kan ei khawpin chaw min pe ang che.

⁴Kan sualte min ngaidam ang che, Keini pawhin kan englo bate zawng zawng kan ngaidam thin a ni. Thlemnaah min hruai lut suh ang che,' a ti a.

⁵Tin, amah vekin an hnenah, "In zingan tuin emaw thian nei se la, zan laiah a hnena kalin, 'Thiana, chhangper pathum mi puktir rawh;

⁶Ka thian zinin mi rawn tlawh a, a hmaa hlui tur engmah ka nei si lo,' ti se la;

⁷in chhunga miin, 'Mi tibuai suh; tunah zawng kawng khar a ni a, ka fate pawh ka hnenah khumah an mu tawh a; thoin ka va pe thei lo va che,' tiin chhang sela -

⁸ka ti a che u, a thian a nih avangin thoin a va pe lo na a, a dil ngut ngut avangin thoin a duh zat apiang a va pe ang.

⁹Chutichuan ka ti a che u, dil rawh u, tichuan an pe ang che u; zawng rawh u, tichuan in hmu ang; kik rawh u, tichuan an hawnsak ang che u.

¹⁰Tupawh a dil apiang chuan an hmu thin a, tupawh a zawng chuan an hmu thin a, tupawh a kik chu an hawnsak dawn a ni.

¹¹Nangniho zinga pa hi, a fapain chhangper dil se la, tu nge lung pe ang? a nih leh, sangha dil se la, tu nge sangha aiah rul pe ang?

¹²A nih leh, artui dil se la, khawmualkaikuang a pe ang em ni?

¹³Chutichuan nangni mi sual mahin in fate thil tha pek nachang in hriat chuan, in Pa vana mi chuan a diltute chu Thlarau Thianghlim a va pe dawn em!" a ti a.

¹⁴Tin, Isua'n ramhuai tawngtheilo pakhat a hnawt chhuak a. Tin, heti hi a ni a, ramhuai chu a chhuah veleh tawngtheilova chu a lo tawng ta a; tichuan mipuihoin mak an ti hle a.

¹⁵Nimahsela a then chuan, "Ramhuai lal Beelzebula avangin alawm ramhuaite a hnawh chhuah thin ni," an ti a.

¹⁶Tin, a thenin amah fiahna'n van ata hriatna an dil a.

¹⁷Ani erawh chuan an ngaihtuahte chu a lo hria a, an hnenah, "Khawii ram pawh mahni indo apiang an boral thin; chhungkhat pawh mahni indo chu an boral thin.

¹⁸Setana pawh mahni a indo chuan, a ram engtin nge a din chhuah ang? - 'Beelzebula avangin ramhuaite a hnawt chhuak,' min ti si a.

¹⁹Tin, kei hi Beelzebula avanga ramhuaite hnawt chhuak thin ka lo nih chuan in faten tu vangin nge an lo hnawh chhuah thin le? Chuvangin anni chu nangmahni ngaihtuahtu turte an ni ang.

²⁰Amaherawhchu, kei hian Pathian kutzung avanga ramhuaite hnawt chhuak thin ka nih chuan Pathian ram in hnenah a lo thleng tawh a ni ang.

²¹Mi chak chuan hriam famkim kenga a in a ven chhung zawng, a sum chu him takin a awm reng thin;

²²nimahsela a aia chak zawkin a rawn bei a, a hneh hun chuan a inrinna ralthuam famkim chu a chhuhsak a, a sum a laksak chu a sem darh thin.

²³Tupawh ka lama tang lo chu mi do a ni; tupawh mi lak khawmpui lo chuan a tidarh a ni.

²⁴Ramhuai bawlhhlawh chu mi kawchhung ata a chhuahin chawlna zawngin tui awm lohna hmunahte a vak a vak thin a; tin, chawlhna reng reng a hmu lo a, 'Ka chhuahna inah khan ka kir leh mai ang,' a ti a;

²⁵tin a va thlen chuanin phiah faia cheimawiin a hmu a.

²⁶Chu veleh a va kal a, amah aia sual zawk ramhuai dang pasarih a rawn hruai a, chutah chuan an lut a, an awm reng thin a; chu mihringa awmze hnuhnung chu a hmasa aiin a lo tha lo zawk thin a ni," a ti a.

²⁷Tin, heti hi a ni a, chung thute chu a sawi laiin mipui zingan hmeichhia tu emaw a lo au chhuak a, a hnenah, "I paina pum chu a hamtha e, i hnute hnek pawh," a ti a.

²⁸Ani erawh chuan, "A ni, nimahsela Pathian thu hriaa zawmte hi mi hamtha an ni zawk e," a ti a.

²⁹Tin, mipuite chu a hnena an rawn inkhawm laiin Isua'n, "Tun lai chhuante hi chhuan sual an ni; chhinchhiahna an zawng a; nimahsela Jona chhinchhiahna chauh lo chu an hnenah chinchhiahna reng reng pek a ni lo ang.

³⁰Jona chu Ninevi khuaa mite tan chhinchhiahna a lo ni ang khan, Mihring Fapa pawh tun lai chhuante tan hian chhinchhiahna a la ni ang.

³¹Chhim lam lalnu kha ngaihtuah hunah chuan tun lai chhuante hnenah hian a tho ve ang a, thiam loh a chantir ang; Solomona fin ngaithla tur mahin kawlkil ata a lo kal si a; ngai teh u, Solomona aia ropui zawk hetah hian a awm a sin.

³²Ninevi khuaa mite chu ngaihtuah hunah chuan tun lai chhuante hnenah hian an ding ve ang a, thiam loh an chantir ang, Jona thuhril avangin an sim si a; ngai teh u, Jona aia ropui zawk hetah hian a awm a sin.

³³Tuma'n khawnvar an halin in hnuai pukah an dah ngai lo, hrai hnuaiah an dah ngai hek lo,mi lutte chuan a eng an hmuh theihna'n a dahnaah chuan an dah zawk thin a ni.

³⁴I taksa khawnvar chu i mit a ni; i mit a fim chuan i taksa pawh apumin a eng chhuak thin; a chhiat erawh chuan i taksa pawh a thim zo vek thin.

³⁵Chutichuan i chhunga eng awm chu thim a lo ni dah law maw fimkhur rawh.

³⁶Chutichuan taksa hi khawi lai mah thim loa apuma a en chhuah chuan, khawnvar eng nasa takin a en che angin a eng chhuak vek ang," a ti a.

³⁷Tin, a sawi laiin Pharisai pakhatin amah chu a hnena chaw eiah a sawm a; tichuan a lut a, chaw a kil a.

³⁸Tin, Pharisai chuan a chaw kil chu a hmuhin, chaw ei hmaa kut a sil lo chu kam a ti hle a.

³⁹Tin, Lalpa chuan a hnenah, "Nangni Pharisaite'n no leh thleng pawn lam chu in silfai thin tak a; in kawchhung lam erawh chu hlepruk leh sualin a khat si a.

⁴⁰Mi ate u, pawn lam siamtuin chhung lam pawh a siam lo em ni?

⁴¹Nimahsela a chhunga thil awm chu mi rethei hnena pek atan hmang rawh u; tichuan ngai teh u, in tan engkim a thianghlim tawh a ni.

⁴²Nangni Pharisaite u, in chung a pik e! Pudina te, pardi te, thlai tinreng te sawma pakhat in pe thin a, felna leh Pathian hmangaihna chu in ngaihthah si thin; nimahsela chung chu a sin in tih tur ni, a dangte chu tih thulh chuang loin.

⁴³Nangni Pharisaite u, in chung a pik e! Inkhawmna inah thutphah tha berte leh dawr hmuna chibai bukte in ngaina si thin a.

⁴⁴In chung a pik e! Thlan tih hriat loh, a chunga hre loa mi an kal thinna ang chu in ni e," a ti a.

⁴⁵Tin, dan hretu pakhatin a hnenah, "Zirtirtu, he'ng thu i sawi hi keini pawh min hau i nih hi," a ti a, a chhang a.

⁴⁶Tin, ani chuan, "Dan hretute u, nangni pawh in chung a pik e! Thil phurh hrehawm takte mite in bel thin a, nangni chuan phurte chu in kut zungtang pakhat pawhin in khawih ngai si lo.

⁴⁷In chung a pik e! Zawlneiho thlan inte in sa thin a, in thlahtute thah an ni si a.

⁴⁸Chutichuan in thlahtute thiltihte chu in hriatpuiin in remtihpui a ni; anni'n an that a, nangni'n an thlan inte in sa si a.

⁴⁹Chuvangin Pathian finna pawhin, 'An hnenah zawlneite leh tirhkohte ka tir ang a, a then an that ang a, a then an tiduhdah ang;

⁵⁰chutichuan Abela thisen chhuah achin Zakaria, maicham leh biak in inkara thia thisen chhuak thleng khan ,zawlnei zawng zawng thisen , leilung pian tirh ata chhuak chu,tunlai chhuante chungah hian phuba an la thei ang,' a tih kha.

⁵¹A ni, ka hrilh a che u, tun lai chhuante chungah hian phuba an la ang.

⁵²Nangni dan hretute u, in chung a pik e! Finna chabi chu in kal bopui a; nangni lah in lut si lo a, mi lut tur pawh in khap si a," a ti a.

⁵³Tin, chuta ta a chhuah chuan lehkhaziaktute leh Pharisaite chuan amah chu an tai ta ran a, thu tinreng an sawi luihtir a,a tawng sual hlauha man tumin an chang reng a.

⁵⁴a tawng sual hlauha man tumin an chang reng a.