Read Baibul, Mizo Luka 13 Bible Online

Luka 13 - Baibul, Mizo bible

Luka 13

¹Tin, chutih lai tak chuan tute emaw an lo awm a, chu mite chuan Galili rama mi, Pilatan an thisen an Pathian biakna sa talhte zinga a telh sakate chanchin chu Isua an hrilh a.

²Tin, ani chuan an hnenah, "Chu Galili rama mite chu, chutiang thil an tuar avangin Galili rama mi zawng zawng aiin mi sual bik niin in ring em ni?

³Ni suh e, ka hrilh a che u, nangni pawh in sim loh chuan chutiang bawkin in boral vek ang.

⁴Tin, Siloam in sangin mi sawm leh pariat a delhhlumte pawh kha, Jerusalem khuaa awmte zawng zawng aiin mi sual bik niin in ring em ni?

⁵Ni suh e, ka hrilh a che u, nangni pawh in sim loh chuan chutiang bawkin in boral vek ang," a ti a, a chhang a.

⁶Tin, he tehkhin thu hi a sawi a:"Tuin emaw a grep huanah theipui phun pakhat a nei a; tin, a kungah chuan a rah a rawn zawng a, pakhat mah a hmu lo a.

⁷Tichuan grep hrui enkawltu hnenah, 'Ngai rawh, kum thum chhung hian he theipui kungah hian a rah ka va zawng thin a, pakhat mah ka hmu si lo; kit rawh; enga tinge hmun pawh awha a awm reng ni?' a ti a.

⁸Tin, ani chuan a hnenah, "Ka pu, kumin tal hi awm se la, a velin ka lai ang a, ekin ka vur rih ang a;

⁹chu mi achina a rah chuan a tha ang, a rah loh erawh chuan kit mai ang che,' a ti a," a ti a.

¹⁰Tin, chawlhniin ani chuan inkhawmna in pakhatah a zirtir a.

¹¹Tin, ngai teh, kum sawm leh kum riat ramhuai man chak loh vei hmeichhe pakhat a awm; chu mi chu a kun reng a, amah chuan a ding ngil thei tawp lo a.

¹²Tin, Isua'n a hmuh veleh a ko a, a hnenah, "Hmeichhia, i chak lohna chuan a thlah ta a che," a ti a.

¹³Tin, a chungah a kut a nghat a; tichuan thawklehkhatan a ngil ta nghal a, Pathian a fak ta a.

¹⁴Tin, Isua'n Chawlhnia mi a tihdam avangin inkhawmna in hotu chu a thinur a, mipui chu a bia a, an hnenah, "Mihring hnathawhna tur ni ruk a awm alawm; chu mi chhungin lo kal u la, intidam rawh u, Chawlhnia lo kal loin," a ti a.

¹⁵Lalpa erawh chuan a hnenah, "Nangni vervekte u, Chawlhniin mahni sebawng emaw, sabengtung emaw a chaw eina ata phelhin, tui in turin in hruai chhuak theuh thin a ni lo em ni?

¹⁶He hmeichhia hi Abrahama fanu a ni si a, ngai teh u, Setanan kum sawm leh kum riat a man reng hi, Chawlhniah pawh he mi phuar hi han phelhsak lohzia em ni?" a ti a, a chhang a.

¹⁷Chung thute chu a sawi laiin a hmelmate zawng zawng chu an zak ta a; mipui erawh chu a thil ropui tih zawng zawng avangin an lawm vek a.

¹⁸Chutichuan ani chuan, "Pathian ram chu eng ang nge ni? Eng chen nge the pawh ka tehkhin ang?

¹⁹Antam chi fang khat miin a laka a huana a theha ang chu a ni; chu chu a lo to a, thing a lo ni a, chungleng savate chu a zarahte chuan an riak a," a ti a.

²⁰Tin, "Pathian ram chu eng nen nge ka tehkhin ang?" a ti leh a,

²¹Dawidim hmeichhiain a laka chhangphut tehkhawng thum zingah a zaa a thawh vek thlenga a phuma ang chu a ni," a ti a.

²²Tin, ani chuan zirtir chung zela Jerusalem khaw lam panin, khaw lian leh khaw tete a tlawh zel a.

²³Tin, tuin emaw a hnenah, "Chhandamte chu tlem te em an nih?" a ti a.

²⁴Tin, ani chuan an hnenah, "Kawngka zimah chuan luh tum hram rawh u; ka hrilh a che u, mi tam takin luh an tum ang a, an lut thei si lo ang.

²⁵In neitu a thawh a, kawng a khar hnu chuan nangnin pawna dingin, 'Lalpa, kawng min hawnsak rawh,' tiin kawngkhar in rawn kik hunah, ani'n, 'Khawii lama mi nge in nih ka hre lo a che u,' tiin a chhang ang che u a;

²⁶chutih hunah chuan nangni'n, 'I hmuhah pawh kan eiin kan bar tawh kha, kan kawtthlerahte pawh i zirtir thin kha,' in la ti ang a;

²⁷tin, ani'n, 'Ka hrilh a che u, khawii lama mi nge in nih ka hre lo; nangni thil sual ti zawng zawngte u, ka hnen ata kal bo vek rawh u,' a la ti ang.

²⁸Abrahama te, Isaaka te, Jakoba te, zawlnei zawng zawngte chu Pathian ram chhunga awm in hmuh a, nangni pawna hnawh chhuah in nih in inhriat hunah, chutah chuan tah leh ha thial chu a awm ang.

²⁹Tin, chhak leh thlang, chhim leh hmar atangin an lo kal ang a, Pathian ramah an lo thu ang.

³⁰Tin, ngai teh u, hnuhnung berte pawh hmasa bera awm tur an awm a, hmasa berte pawh hnuhnung bera awm tur an awm," a ti a.

³¹Chutih lai tak chuan Pharisai tute emaw an lo kal a, a hnenah, 'Chhuak la, heta ta kal bo rawh; Herodan tihhlum che a duh em em a ni," an ti a.

³²Tin, ani chuan an hnenah, "Chu sihal hnenah chuan he thu hi va sawi rawh u; 'Ngai rawh, vawiinah nen, naktukah nen, ramhuaite ka hnawt chhuak ang a, nate pawh ka tidam ang a, atuk lehah ka zo ang.

³³Engpawh ni rawh se, vawiinah nen, naktukah nen, atuk lehah nen ka kal zel tur a ni; Jerusalem khaw pawn lamah zawlnei thih theih a ni lo e," a ti a.

³⁴Aw Jerusalem, Jerusalem! Zawlneiho thattu, i hnena an rawn tirhte lunga lo denghlumtu! Arpuiin mahni note a thla hnuaia awp khawm a tum ang in I fate vawi eng zat nge awp khawm ka tum kha! Nimahsela in duh si lo.En teh u, in in chu aruaka hnutchhiah che uin a awm ta. Ka hrilh a che u, 'Lalpa hminga lo kal chu a eng a thawl e,' in tih hma loh chuan mi hmu leh tawh lo ang," a ti a.

³⁵En teh u, in in chu aruaka hnutchhiah che uin a awm ta. Ka hrilh a che u, 'Lalpa hminga lo kal chu a eng a thawl e,' in tih hma loh chuan mi hmu leh tawh lo ang," a ti a.