Read Baibul, Mizo Luka 14 Bible Online

Luka 14 - Baibul, Mizo bible

Luka 14

¹Tin, heti hi a ni a, Chawlhniin Pharisai hotu pakhat ina chaw ei tura a kal chu an enthla reng a.

²Tin, ngai teh, a hmaah chuan dam lo vung mi tu emaw a awm.

³Tichuan Isua'n dan hretute leh Pharisaite chu a bia a, an hnenah, "Chawlhniin tihdam a thiang nge thiang lo?" a ti a.

⁴Anni erawh chu an ngawi reng a. Tin, ani chuan damlo chu a chelh a, a tidam a, a kaltir ta a.

⁵Tin, an hnenah, "Nangni zingan in sabengtung emaw, sebawng emaw tuichhunchhuahah lo tla se la, Chawlhni pawhin tu nge hnuk chhuak nghal lo vang che u?" a ti a.

⁶Chung thu chu an chhang thei lo leh bawk a.

⁷Tin, an mi sawmten thutphah tha ber an thlan thinzia a hmu a, an hnenah tehkhin thu a sawi ta a;

⁸Lawi chaw ei turin tuin emaw a sawm hunah che chuan thutphah tha berah thu suh ang che; chutilochuan i aia mi tha zawk a lo sawm hlauh ang a,

⁹tichuan a sawmtu che chuan, 'He mi thutna tur hi kian rawh,' a rawn ti ang chia; tin, nang zak takin thutphah tha lo berah i thu leh si tur a ni.

¹⁰An sawm hunah che chuan thutphah tha lo berah va thu zawk ang che; chutichuan a sawmtu che a lo kal hunah i hnenah, 'Thiana, thutphah tha deuvah thu rawh,' a ti thei ang che. Chutichuan i chaw kilpuite mithmuhah chuan chawimawiin i awm ang.

¹¹Inngaihlu apiang an tlawm ang a; inngaitlawm chu chawimawiin an awm ang," an hnenah a ti a.

¹²Tin, a sawmtu hnenah pawh chuan, "Chhunah emaw, zanah emaw ruai i theh hunin i thiante, i unaute, i laichinte, i veng hausate chu sawm suh ang che; chutilochuan an sawm ve leh ang chia, an rul leh kher ang che.

¹³Ruai i theh hun chuan pachhiate, piangsualte, kebaite, mitdelte sawm zawk ang che;

¹⁴tichuan chung ang chuan rulhna tur che an neih loh avangin i eng a thawl ang; mi felte thawhleh hunah rulh leh i ni dawn si a," a ti a.

¹⁵Tin, a chaw kilpui tuin emaw chung thu chu a hria a, a hnenah, "Pathian rama chaw ei tur chu an eng a thawl e," a ti a.

¹⁶Tin, ani chuan a hnenah, "Mi tuin emaw zanah ruai ropui takin a theh a, mi tam tak a sawm a;

¹⁷tin, a ei hun chuan a mi sawmte hnenah, 'Lo kal rawh u, tunah engkim peih a ni ta e,' ti turin a bawih a tir a.

¹⁸Tin, an zain thu khat vuain chhuanlam an nei vek a. A hmasa berin a hnenah, 'Lo ka lei ta a, a enin ka kal a tul a ni; mi khawngaih la mi han phatsak ang che,' a ti a.

¹⁹Tin, mi dangin, 'Sebawng tuak nga ka lei ta a, a chhia a tha fiahin ka kal dawn a, mi khawngaih la mi han phatsak ang che,' a ti a.

²⁰Tin, mi dangin, 'Nupui ka nei ta a, chuvangin ka kal thei lo,' a ti a.

²¹Tin, bawih chuan a pu hnenah chung thu chu a va hrilh a. Tin, in neitu chu a thinur a, a bawih hnenah chuan, "Chhuak la, kawtthlerahte, kawmkarahte kal thuai thuai la, pachhiate, piangsualte, mitdelte, kebaite hetah rawn hruai lut rawh," a ti a.

²²Tin, bawih chuan, 'Ka pu, i thu mi pek ang khan ka ti tawh a, nimahsela hmun a la chuang ta fo,' a ti a.

²³Tin, a puin bawih hnenah chuan, 'Chhuak la, lamlianahte, daiahte kal la, ka in khahna'n mi han thlem lut hram rawh.

²⁴Ka hrilh a che, mi ka sawmte khan pakhat mahin ka ruaitheh an ei lo ang,' a ti a," a ti a.

²⁵Tin, mipui tam tak a hnenah an kal ve a; tichuan ani chu a hawi a, an hnenah,

²⁶Tupawh ka hnena lo kal chuan, a pa te, a nu te, a nupui te, a fa te, a unau te, a farnu te, ama nun nen lam pawh a huat loh chuan ka zirtir a ni thei lo ang.

²⁷Tupawh mahni kraws pua mi zui lo apiang chu ka zirtir a ni thei lo ang.

²⁸Nangni zingah tupawhin in sang sak tum u la, atirin thuin sak zawhna khawp sum in neih leh neih loh hre turin, a man tur chin tu nge chhut lo ang che u?

²⁹Chutilochuan lung phum tawh zeta, a sak zawh theih loh chuan a en apiangin,

³⁰'He mi hian in a rel ting a, a sa zo thei si lo,' tiin an nuihsan dah ang e.

³¹Tin, lal tuin nge lal dang do tura a kal dawnin, atirin thuin, mi singhnih nena amah do tura lo kal chu, mi singkhat nen a tawh ngam dawn leh dawn loh mi rawn lo ang?

³²Chuti a nih loh vek leh, lal dang chu hla taka a la awm laiin inremna lam thutiam dil turin palai a tir ang.

³³Chutiang bawkin nangni zingah hian tupawh a neih zawng zawng kalsan lo apiang chu ka zirtir a ni thei lo ang.

³⁴Chi hi a tha e; nimahsela chi pawh a dak tawh chuan engin nge an tihal leh ang?Lei tan a tha lo ang, ek dur tan pawh a tha hek lo ang; miin an pai chhuak thin. Tupawh hriatna tura beng nei chuan hre rawh se," a ti a.

³⁵Lei tan a tha lo ang, ek dur tan pawh a tha hek lo ang; miin an pai chhuak thin. Tupawh hriatna tura beng nei chuan hre rawh se," a ti a.