Read Baibul, Mizo Luka 17 Bible Online

Luka 17 - Baibul, Mizo bible

Luka 17

¹Tin, Isua'n a zirtirte hnenah, 'Tluknate hi awm lo thei a ni lo; nimahsela tlukna awmtirtu chung chu a pik e!

²Heng mi tete zinga pakhat pawh tihtluk ai chuan, a titlutu tur nghawngah chuan buh rawt sawmna lung awrhtirin, tuifinriatah thlak se la, a tan a tha zawk tur a ni.

³Fimkhur rawh u:I unauin thil a tihsual chuan zilh rawh; a inchhir chuan ngaidam rawh.

⁴Ni khatah i chungah vawi sarih thil tisualin, vawi sarih, 'Ka inchhir e,' tia i lama a lo hawi leh chuan i ngaidam tur a ni," a ti a.

⁵Tin, tirhkohte chuan Lalpa hnenah, "Kan rin tiphui deuh vang che," an ti a.

⁶Tin, Lalpa chuan, "Antam mu fang khat ang rin in neih chuan he thingtheihmu kung hnenah hian, 'Lo inphawi la, tuifinriatah lo inphun rawh,' in ti ang a, in thu a awih mai ang.

⁷Nimahsela nangni zingah tupawhin lei letin emaw, beram vengin emaw bawih nei u la, a lo sul hawn veleh, 'Chaw rawn kil nghal rawh,' tu nge lo ti ang che u?

⁸'Ka ei tur mi siamsak la, puan veng la, ka ei ka bar zawh hma loh chu ka rawng mi bawl rawh; chu mi hnuah chuan nangin I eiin I bar ang chu,' tu nge lo ti zawk lo ang che u?

⁹In thu ang a a tih avangin in bawih hnenah lawmthu in hrilh ngai em ni?

¹⁰Chutiang bawkin nangni pawhin in hnena thupek zawng zawng anga in tih hnuin, 'Bawih thahnem lo kan ni e; kan tih tur reng a ni kan tih ni,' ti rawh u," a ti a.

¹¹Tin, heti hi a ni a, Jerusalem khuaa an kal dawnin, Samari leh Galili ram chu a kal pel a.

¹²Tin, khaw engah emaw a luh dawnin, mi, phar hlir, sawmin an tawk a; chu mite chu hla takah an ding a;

¹³tin, aw ring takin, "Isu, zirtirtu, min khawngaih rawh," an ti a.

¹⁴Tin, ani chuan anmahni chu a han hmuh chuan an hnenah, "Puithiamte hnenah va inentir rawh u," a ti a. Tin, heti hi a ni a, an kal lai chuan an lo thiang ta hlawm a.

¹⁵Tin, an zinga pakhatin a dam ta tih a inhriat veleh, aw ring taka Pathian fak chungin a kir leh ta a;

¹⁶tin, a ke bulah a bawkkhup a, a lawmthu a sawi a; chu mi chu Samari mi a ni nghe nghe a.

¹⁷Tichuan Isua'n a chhang a, "Mi sawm kha in lo thiang ta a ni lo'm ni? Pakuate kha khawiah nge?

¹⁸he awze mi mai hi Pathian fak tura lo kir leh a nih?" a ti a.

¹⁹Tin, a hnenah "Tho la, kal rawh; i rinna hi i dampui a nih hi," a ti a.

²⁰Tin, Pharisaite'n Pathian ram lo thlen hun tur an zawh avangin an hnenah, "Pathian ram chu hmuh theihin a lo thleng lo e;

²¹'En teh u, heta hi!' emaw, 'Sawta saw!' emaw an ti hek lo ang; ngai teh u, Pathian ram chu in zingah a awm a ni," a ti a, a chhang a.

²²Tin, zirtirte hnenah chuan, "Mihring Fapa dam lai nite hi ni khat tal hi in hmuh duh nite a la awm ang, nimahsela in hmu tawh si lo ang.

²³Tin, in hnenah, 'En teh u, sawta saw!' 'En teh u, heta hi!' an ti ang che u; kal chhuak suh u la, anni chu zui hek suh u;

²⁴van hnuai lehlama kawl a pheta van hnuai lehlam thlenga a eng thin ang hian, Mihring Fapa hi a lo kal niin a awm dawn si a.

²⁵Nimahsela chu mi hma chuan thil tam tak a tuar tur a ni a, tun lai chhuante duh lohin a awm bawk tur a ni.

²⁶Nova dam laia thil awmzia ang khan, Mihring Fapa a lo kal leh nite chuan a awm bawk ang.

²⁷Nova lawnga a luh a, tui a lo let a, an zaa a tihhlum tak vek ni kha a thlen hma loh zawng, an eiin an bar a, nupui pasal an innei thin a.

²⁸Chutiang bawkin Lota dam laiin a lo awm; an eiin an bar a, an leiin an hralh a, an chingin an sa thin a;

²⁹nimahsela Sodom khua ata Lota a chhuah ni chuan van atangin mei leh kat a sur a, an zain a tihlum ta vek a.

³⁰Chutiang bawkin Mihring Fapa hi a rawn inlar ni chuan a awm ang.

³¹Chu mi niah chuan tupawh a sum in chhunga awm a, amah in chunga awm chu chuh turin chhuk suh se; loa awm chu hawng bawk suh se.

³²Lota nupui hre reng rawh u.

³³Tupawh a nun humhimna zawng apiangin a chan ang a, tupawh a nun chan apiangin a humhim ang".

³⁴Ka hrilh a che u, chu mi zanah chuan khum pakhatah mi pahnih an awm ang a, pakhat chu kal bopuiin a awm ang a, pakhat chu hnutchhiahin a awm ang.

³⁵Hmeichhe pahnih buh rawt sawmin an awm ang a, pakhat chu kal bopuiin a awm ang a, pakhat chu hnutchhiahin a awm ang," a ti a.

³⁶Mi pahnih loah an awm ang a, pakhat chu kal bopuiin a awm ang a, pakhat chu hnutchhiahin a awm ang.Tin, anni chuan a hnenah "Lalpa khawiah maw?" an ti a, an chhang a. Tin, ani chuan an hnenah, "Saruang awmna apiangah mulukawlhte pawh an awm ang," a ti a.

³⁷Tin, anni chuan a hnenah "Lalpa khawiah maw?" an ti a, an chhang a. Tin, ani chuan an hnenah, "Saruang awmna apiangah mulukawlhte pawh an awm ang," a ti a.