Read Baibul, Mizo Luka 18 Bible Online

Luka 18 - Baibul, Mizo bible

Luka 18

¹Tin,beidawng loin an tawngtai fo tur a ni tih hriattirna turin an hnenah tehkhin thu a sawi a:

²Khaw engah emaw roreltu pakhat a awm a, chu mi chuan Pathian a hlau lo a, mihring lah a ngaihsak hek lo;

³tin, chu mi khuaah chuan hmeithai pakhat a awm a; ani chu, 'Ka khingpui chungah phuba mi laksak rawh,' tiin a hnenah a kal fo a.

⁴Tin, ani chuan rei fe a duh lo a; nimahsela nakinah chuan a rilruin, 'Pathian hlau loin mihring ngaihsak lo mah i la,

⁵he hmeithai hian mi tihbuai avangin a phuba ka laksak teh mai ang, chutilochuan a lo kal fo hian mi la tihah hrep dah ang e,' a ti a," a ti a.

⁶Tin, Lalpa vekin, "Roreltu fel lo thu sawi chu hre rawh u.

⁷An chungah zaidawh rih mah se la a mi thlan, achhun azana amah kotute phuba chu Pathianin a laksak lo ang em ni?

⁸Ka hrilh a che u, an phuba a laksak thuai ang. Nimahsela Mihring Fapa hi a lo kal hun chuan khawvelah hian rinna a rawn hmu ang em ni?" a ti a.

⁹Tin, mi fel tak nih inring a, mi dang zawng zawng hmusit thin tute emaw hnenah chuan he tehkhin thu pawh hi a sawi a:

¹⁰Mi pahnih Pathian biak inah tawngtai turin an han kal a; pakhat chu Pharisai a ni a, pakhat chu chhiahkhawntu a ni.

¹¹Pharisai chu a ding a, amah chauhin heti hian a tawngtai a:'Pathian, mi dang anga hleprute, fel lote, uirete ka nih loh avang leh, he chhiahkhawntu ang pawh hi ka nih loh avangin i chungah ka lawm e.

¹²Chawlhkar khat apiangah vawi hnih chaw ka nghei thin a; ka neih apiang sawmah pakhat ka pe thin,' a ti a.

¹³Chhiahkhawntu erawh chu hla takah a ding a, van lam pawh a dak ngam lo a, 'Pathian, kei mi sual hi mi khawngaih rawh,' tiin a awm a inchum a inchum ta zawk a.

¹⁴Ka hrilh a che u, a hmasa aiin chu mi zawk chu thiam changing a inah a kal chhuk ta a.Inngaihlu apiang an tlawm ang a, inngaitlawm chu chawimawiin an awm ang," a ti a.

¹⁵Tin, a deh atan a hnenah an nausente pawh an rawn hruai a; zirtirte erawh chuan chu chu an hmuh veleh an lo hau a.

¹⁶Nimahsela Isua'n anni chu a ko a," Naupang tete ka hnenah han kaltir u la,hnar suh u; Pathian ram chu hetiang mite ta a ni si a.

¹⁷Tih tak meuhin ka hrilh a che u, tupawh Pathian ram chu naupang tein a lawm anga lawm lo apiang a chhungah an lut tawp loing," a ti a.

¹⁸Tin, hotu tuin emaw a hnenah, "Zirtirtu tha, chatuana nunna channa turin engtin nge ka tih ang?" tiin a zawt a.

¹⁹Tin, Isua'n a hnenah, "Engati nge tha mi tih? mi pakhat chauh lo chu tumah tha an awm lo, chu chu Pathian a ni.

²⁰Thupekte chu i hria alawm - 'Uire suh, Tual that suh, Ru suh, Dawtin hek suh, I nu leh i pa chawimawi rawh,' tihte hi," a ti a.

²¹Tin, ani chuan, "Chung thu zawng zawng chu ka naupan tet ata ka zawm zel thin," a ti a.

²²Tin, Isua'n chu chu a hriatin a hnenah, "Tunah pawh kawng khat i la bak e; i neih zawng zawng hralh la, pachhiate hnenah sem rawh, chutichuan vanah ro i nei ang; tin, lo kal la, mi zui ang che," a ti a.

²³Ani erawh chuan chung thu chu a hriatin, a lungngai ta em em a, a hausak em avangin.

²⁴Tichuan Isua'n amah chu a en a, "Sum ngahte chu Pathian rama luh a va harsa dawn em!

²⁵Mi hausa Pathian rama luh aiin sanghawngsei, hriau benga luh tlang a awl zawk a ni," a ti a.

²⁶Tin, chu thu hriate chuan, "A nih leh, tu nge chhandam ni thei ang le?" an ti a.

²⁷Ani erawh chuan, "Mihring tih rual loh hi Pathian tih theih a ni," a ti a.

²⁸Tin, Petera'n, "Ngai teh, keini'n kan in leh lo kalsanin kan zui ta chia," a ti a.

²⁹Tin, ani chuan an hnenah, "Tih tak meuhin ka hrilh a che u, tupawh Pathian ram avanga in emaw, nupui emaw, unaute emaw, nu leh pa emaw, fate emaw kalsan tawh phawt chu,

³⁰tun dam chhung la la hian a aia tam zawk hmu lo tur tumah an awm lo, hun lo la thleng tura chatuana nunna nen," a ti a.

³¹Tin, sawm leh pahnihte chu a hnenah a hruai hrang a, an hnenah, "Ngai teh u, Jerusalem khuaa kan chhoh dawn hi; zawlnei thu ziak zawng zawng kha Mihring Fapa chungah hian a thleng ang.

³²Jentailte hnenah an pe ang a, nuihza siamna'n an hmang ang a, zahthlak takin an siam ang a, chil an chhak ang;

³³tin, an vua ang a, an tihlum ang; tin, ni thum niin a tho leh ang," a ti a.

³⁴Tin, chung thu reng reng chu a ngaihna an hre lo a; thusawi chu an lakah thupin a awm a, eng sawi nge a nih pawh an hre lo a.

³⁵Tin, heti hi a ni a, Jeriko khua a thlen dawnin, mitdel tu emaw kawng sirah kut dawhin a lo thu a;

³⁶chu mi chuan mipui kal thawm a hria a, engtizia nge ni ta tih a zawt a.

³⁷Tin, anni chuan Nazaret Isua a kal a ni tih an hrilh a.

³⁸Tichuan ani chu, "Isu Davida Fapa, mi khawngaih rawh," tiin a au ta a.

³⁹Tin, a hmasate chuan ngawi turin an hau a; nimahsela ani chu, "Davida Fapa, mi khawngaih rawh," tiin a au zual sauh a.

⁴⁰Tichuan Isua a ding a, a hnena han hruai turin thu a pe a; tin, a kiang a lo thlen chuan,

⁴¹I chungah engtia ka tih nge i duh?" a ti a, a lo zawt a. Tin, ani chuan, "Lalpa, hmuh theih ka duh," a ti a.

⁴²Tin, Isua'n a hnenah, "Hmu thei tawh ang che, i rinna hi i dampui a ni e," a ti a.Tin, thawklehkhatan a hmu thei ta nghal a, Pathian fak chung zelin amah chu a zui ta a; tin, mi zawng zawng chuan chu chu an hmuhin Pathian an fak a.

⁴³Tin, thawklehkhatan a hmu thei ta nghal a, Pathian fak chung zelin amah chu a zui ta a; tin, mi zawng zawng chuan chu chu an hmuhin Pathian an fak a.