Read Baibul, Mizo Luka 19 Bible Online

Luka 19 - Baibul, Mizo bible

Luka 19

¹Tin, Isua Jeriko khuaah a lut a, a chhun pelh dawn a.

²Tin, ngai teh, mi pakhat a hming Zakaia a awm a; chu mi chu chhiahkhawn hotu a ni a, amah pawh a hausa hle a.

³Tin, Isua chu mi eng ang nge a nih hmuh a tum a; mipui avngin, amah lah a tawi si a, a hmu thei lo a.

⁴Tichuan a tlan khalh a, a en turin theipui kungah a lawn a; chu mi kawng chu a rawn zawh tur a ni si a.

⁵Tin, Isua chu, chu mi hmun a thlen chuan a dak a, a hnenah, "Zakai, lo chhuk thuai rawh; vawiinah i inah ka thleng tur a ni," a ti a.

⁶Tin, hmanhmawh takin a chhuk a, hlim takin amah chu a thleng ta a.

⁷Tin, chu chu an hmuh veleh an zain, "Mi sual hnena thleng turin a luh tak saw," an ti a, an phunnawi a.

⁸Tin, Zakaia chu a ding a, Lalpa hnenah chuan, "Ngai teh, Lalpa, ka sum zatve pachhiate hnenah ka pe ang a; tin, tu lakah pawh thil engpawh lo hlepru i la, a leh liin ka rul leh ang," a ti a.

⁹Tin, Isua'n Zakaia chung thu a sawi a, "Vawiinah he inah hian chhandamna a lo thleng ta, ani pawh Abrahama fapa a ni si a.

¹⁰Boralte zawnga chhandam turin Mihring Fapa hi a lo kal a ni reng a ni," a ti a.

¹¹Tin, chung thute chu an ngaihthlak laiin, Jerusalem khua a hnaih tak avang leh Pathian ram lo lang nghal tur nia an rin avangin tehkhin thu a sawi tel a.

¹²Chutichuan he'ng thu hi a sawi a:"Mi tha tu emaw ram awpna thu laa lokir leh turin khaw lam hla takah a kal a.

¹³A kal dawnin a bawihte sawm a ko a, an hnenah rangkachak tangka sawm a pe a, an hnenah, 'Ka lo thlen leh hma loh zawng hei hian lo sumdawng rawh u,' a ti a.

¹⁴Nimahsela a khuaten an hua a, 'He mi hi kan lal atan kan duh lo e,' ti turin a hnungah palai an tlantir ve a.

¹⁵Tin, heti hi a ni a, ram awpna thu chu a lak a, a lo kir leh chuan a bawih, tangka a pekate chu, an peipun chin hriatna'n a kohtir a.

¹⁶Tin, a hmasa ber chu a lo kal a, 'Ka pu, i rangkachak tangka kha sawmin a pung e,' a ti a.

¹⁷Tin, ani chuan a hnenah, 'Bawih tha, i ti tha e; tlemte chunga i rinawm avangin khaw sawm chungah hotuah awm rawh,' a ti a.

¹⁸Tin, a dawttu chu a lo kal a, 'Ka pu, i rangkachak tangka kha pangain a pung e,' a ti a.

¹⁹Tin, ani chuan ani hnenah pawh chuan, 'Nang pawh khaw panga chungah hotuah awm rawh,' a ti a.

²⁰Tin, mi dang a lo kal a, 'Ka pu, en teh, hei i rangkachak tangka kha! Thlan hrukna puanin ka vawng reng a ni;

²¹mi in tak i nih avangin ka hlau che a ni; i dah loh pawh i la thin a, i tuh loh pawh i at thin si a,' a ti a.

²²Tin, ani chuan a hnenah, 'Bawih sual, i tawngka chhuak ngeiin ka thiam lo ang che. Mi in tak ka nih a, ka dah loh pawh ka lak thin a, ka tuh loh pawh ka ah thin i hria maw?

²³A nih ahnu, engati nge ka tangka hi sumdawng ina i dah loh? tichuan ka hawnin a pung nen ka thing tur a ni,' a ti a.

²⁴Tin, a kianga dingte hnenah, 'A rangkachak tangka kha laksak u la, rangkachak tangka sawm neitu hnenah pe rawh u,' a ti a.

²⁵Tin, anni chuan a hnenah, 'Ka pu, ani zawngin rangkachak tangka sawm a nei alawm,' an ti a.

²⁶'Ka ti a che u, a nei apiang an pe belhchhah ang a, a nei lo chu a neih chhun pawh an laksak ang.

²⁷Nimahsela he'ng mi dotute, an lal atana mi duh lote hi, rawn hruai u la, ka hmaah that rawh u,' a ti a," a ti a.

²⁸Tin, chutiang thu a sawi zawh chuan Jerusalem khaw lam pan chhoin hma a hruai a.

²⁹Tin, heti hi a ni a, Bethphage leh Bethani khaw kiang, Oliv tlang an tih chu, a thlen chuan zirtirte zinga mi pahnih a tir a,

³⁰In hma zawn khuaah sawn va kal ta u la; chutah chuan in luh tirhin sabengtung no thlun, tuma la chuan ngai lohna in va hmu ang; chu chu phelh u la, han kai rawh u.

³¹Tin, tupawhin, 'Engah nge in phelh?' tia an zawh che u chuan, heti hian sawi ang che u,'Lalpain a duh a ni,' tiin," a ti a.

³²Tin, a tirhte chu an kal ta a, an hnena a sawi ang ngeiin an va hmu a.

³³Tin, sabengtung no chu an phelh lai chuan a neituten an hnenah, "Sabengtung no kha engah nge in phelh?" an ti a.

³⁴Tin, anni chuan, "Lalpain a duh a ni," an ti a.

³⁵Tichuan Isua hnenah an rawn kai ta a, tin, sabengtung no chungah chuan an puante an phah a, a chungah Isua an chuantir a.

³⁶Tin, a kalna tur kawngah chuan an puante an phah zel a.

³⁷Tin, an thlen dawn hnaihin, Oliv tlang liam dawnah chuan, zirtir mipui zawng zawng chuan a thilmak tih zawng zawng an hmuh avangin an lawm a,

³⁸aw ring takin, "Lalpa hminga Lal lo kal chu fakin awm rawh se, vanah remthu leng sela, chungnung berah khian ropuina awm rawh se!" tiin Pathian an fak ta a.

³⁹Tin, mipui zinga Pharisai thenkhatin a hnenah, "Zirtirtu, i zirtirte hi zilh rawh," an ti a.

⁴⁰Ani erawh chuan, "Ka hrilh a che u, hengte hi an ngawih reng chuan lungte tal an au chhuak tur a ni," a ti a, a chhang a.

⁴¹Tin, a thlen dawn ruaiin khua chu a hmu ta a, a tah chhan a,

⁴²Aw, nang lul hian tun chhung hian thlamuanna tur thu hi lo hre teh hram la! Nimahsela tunah zawng i hmuh lohna'n a inthup tawh si a.

⁴³I ralten i velin lei kulh an siam ang a, an hual ang chia, i velin chhuah theih lohin an awm chhan ang chia, i chhunga i fanaute, nangmah nen leiah an paih vak ang che, i chhunga lung intiang reng reng an zuah lo ang;

⁴⁴an fan lai che i hriat loh avangin chutiang nite chu i chungah a lo la thleng ang," tiin.

⁴⁵Tin, Pathian biak inah chuan a va lut a, englo zuartute chu a hnawt chhuak ta a;

⁴⁶an hnenah, "Ka in chu tawngtaina in a ni ang,' tih ziak a ni; nangni erawh chuan suamhmangte pukah in siam zawk hi," a ti a.

⁴⁷Tin, ni tin Pathian biak inah chuan a zirtir thin a. Tin, puithiam lalte leh, lehkhaziaktute leh vantlang zinga hotu deuhten, amah tihboral an tum a;nimahsela mitten a thu an ngaihthlak kham theih loh avangin a tih dan tur an hre thei lo a ni.

⁴⁸nimahsela mitten a thu an ngaihthlak kham theih loh avangin a tih dan tur an hre thei lo a ni.