Read Baibul, Mizo Luka 2 Bible Online

Luka 2 - Baibul, Mizo bible

Luka 2

¹Tin, chung lai chuan heti hi a ni a, Kaisara Augustan khawvel zawng zawng hming ziak tur thu a pe a.

²(chu chu Suria rama Kurinia, Ram Awptu a nih laia hming ziak hmasa ber chu a ni).

³Tichuan mi zawng zawng chu an hming ziak turin anmahni khua theuhvah an kal a.

⁴Tin, Josefa pawh, Davida chhungte leh a thlah a nih avangin, Galili rama Nazaret khua atangin,

⁵Mari a nupui hual rai teuh chung nen chuan hming ziak turin, Judai rama Davida khua Bethlehem an tihah chuan an kal ta a.

⁶Tin, heti hi a ni a, chuta an awm laiin a hrin a lo hun ta a.

⁷Tin, a fa tirah mipa a hring a; puanin an tuam a, khualbuka an len ve tak loh avangin ran chaw pekna thlengah a muttir a.

⁸Tin, chu mi ram vekah chuan beram vengtute an awm a, zanah an beramho an veng a, phulah an riah chilh a.

⁹Tin, Lalpa vantirhkoh pakhat an kiangah a lo ding a, Lalpa ropuinain an vel chu a rawn chhun eng a; tichuan an hlau ta em em a.

¹⁰Tin, vantirhkoh chuan an hnenah, "Hlau suh u lang, ngai rawh u, mi tin ta tur chanchin tha lawmawm em em ka rawn thlen che u a ni.

¹¹Vawiinah hian in tan Davida khuaah Chhandamtu a piang ta, Lal Krista chu.

¹²Tin, hei hi in tan chhinchhiahna tur a ni; nausen puana tuam, ran chaw pekna thlenga mu in hmu ang," a ti a.

¹³Tin, thawklehkhatah vantirhkoh hnenah chuan vana miho mipui an lo awm ta chiam a, Pathian an fak a.

¹⁴Chungnung brah Pathian ropui takin awm rawh se, Lei chunga a awm em em mihringte hnenah rem thu leng rawh se," an ti a.

¹⁵Tin, heti hi a ni a, vantirhkohte chuan vana an kalsan veleh, beram vengtute chuan, "Tunah Bethlehem khaw thlengin kal i la, Lalpa'n thu min hrilh lo thleng chu i en ang u," an inti a.

¹⁶Tichuan an kal thuai thuai a, Mari nen, Josefa nen, ran chaw pekna thlenga nausen mu nen chuan an hmu a.

¹⁷Tin, an va hmuh chuan nausen chanchin thu vantirhkohin a hrilh kha an sawi vel a.

¹⁸Tin, a hria apiang chuan beram vengtute thusawi chu mak an ti hle a.

¹⁹Mari erawh chuan thusawi zawng zawng chu a rilruin a ngaihtuah a, a vawng reng a.

²⁰Tin, beram vengtute chuan vantirhkoh hrilh ang ngeia engkim an hmuha an hriat avangin, Pathian chawimawi leh fak chung zelin an kir leh ta a.

²¹Tin, a serh tanna tur ni riat a lo tlin chuan a hmingah chuan, chhula a awm hma renga vantirhkohin a sak tawh sa, Isua an sa a.

²²Tin, Mosia dan anga an inthen ni a lo thlen chuan, ani chu

²³(Lalpa Dan thua, "Mipa fa chhul keu apiang chu Lalpa tana ruat an ti ang," tia ziak ang khan)

²⁴Lalpa hnena hlan tur leh, Lalpa Dan thua ziak angin thuro tuak khat emaw, parva no pahnih emaw talh turin Jerusalem khuaah an han hruai a.

²⁵Tin, ngai teh, Jerusalem khuaah chuan mi pakhat a hming Sumeona a awm; chu mi chu mi fel tak leh Pathian ngaihsak tak a ni a, Israelte thlamuantu tur chu a nghak reng a, a chungah Thlarau Thianghlim a awm a.

²⁶Tin, Lalpa Krista chu a hmuh hma loh chuan a thi lo ang tih Thlarau Thianghlimin a lo hriattir tawh reng a.

²⁷Tin, Thlarau hriattirin Pathian biak inah chuan a va lut a; nausen Isua chu a nu leh a pain Dan pangngai anga a chunga tihsak tura an rawn hruai luh lai chuan,

²⁸ani chuan a lo kuangkuah a, Pathian a fak a.

²⁹Lalpa, tunah, i thu ang zelin i bawih hi thlamuang takin i kaltir dawn a;

³⁰I chhandamna mi tin hmuha i siam kha

³¹Ka mitin a hmu ta e;

³²Jentailte hnena i eng puang chhuak tur leh i mi Israelte ropuina tur chu," a ti a.

³³Tin, nausen thu a sawi chu a nu leh a pa chuan mak an ti hle a.

³⁴Tin, Sumeonan anni chu mal a sawm a, a nu Mari hnenah, "Ngai rawh, he naupang hi Israel zinga mi tam tak tiral tur leh din chhuahtir tura ruat a ni, miin an sawisel tur chhinchhiahna nen -

³⁵a ni, nanga thinlung pawh ngunhnamin a la chhun tlang ang - mi tam takin an thinlunga an ngaihtuahte chu a lanna'n," a ti a.

³⁶Tin, mi pakhat, a hming Anni, zawlnei, Phanuela fanu, Asera hnama mi a awm a, (ani chu tar tak a ni a, a tawn tirh pasal hnenah kum sarih a awm a,

³⁷tin, kum sawmriat leh kum li zet a hmeithai a,) ani chuan Pathian biak in kalsan loin achhun azanin chaw ngheitea tawngtaiin Pathian a be thin.

³⁸Tin, chu mi lai tak chuan ani chu a lo kal a, Pathian hnenah lawmthu a sawi a, Jerusalem khaw tlan beisei apiangte hnenah chuan Isua chanchin a sawi bawk a.

³⁹Tin, Lalpa dan ang zela thil zawng zawng an tih zawhin, Galili rama anmahni khua Nazaret-ah chuan an haw leh ta a.

⁴⁰Tin, nausen chu a lo sei lian deuh deuh a, a lo chak telh telh a, finin a khat ta a, Pathian khawngaihna a chungah a awm bawk a.

⁴¹Tin, kum tinin, Kalhlen Kut hunin a nu leh a pa chu Jerusalem khuaah chuan an kal thin a.

⁴²Tin, ani chu kum sawm leh kum hnih a nihin kut dan pangngaiin an han kal a;

⁴³tin, an tiak a, an haw laiin naupang Isua chuan Jerusalem khuaah a awm san a; a nu leh a pa chuan an hre si lo a.

⁴⁴Chutichuan an pawl zingah a awm emaw an ti a, ni khat an kal hman a, an laichinte leh an hmelhriatte zingah an zawng a.

⁴⁵Tin, an hmuh loh avangin zawng chung zelin Jerusalem khuaah an kir leh ta a.

⁴⁶Tin, heti hi a ni a, ni thum chinah chuan Pathian biak inah, zirtirtute zinga thua an thu lo ngaithlaa lo zawtin an hmu ta a.

⁴⁷Tin, a thu hria apiang chuan a hriatzia leh a chhanzia chu mak an ti hle a.

⁴⁸Tin, a nu leh a pa chuan amah chu an hmuhin mak an ti hle a; tichuan a nuin a hnenah, "Ka fa, engati nge hetia min tih? Ngai teh, i pa leh keiin thlaphang takin kan zawng che a ni," a ti a.

⁴⁹Tin, ani chuan an hnenah, "Engah nge mi zawn ni? ka Pa ina ka awm tur in hre lo em ni?" a ti a.

⁵⁰Tin, an hnena a thusawi chu a ngaihna an hre lo a.

⁵¹Tin, an hnenah a kal thla a, Nazaret khua chu a zu thleng a, an thu zawmin a awm a. Tin, a nu chuan chung thil zawng zawng chu a rilruah a vawng reng a.Tin, Isua chu a fing deuh deuh a, a lo lian telh telh a, Pathian leh mihring duhsakin a awm deuh deuh a.

⁵²Tin, Isua chu a fing deuh deuh a, a lo lian telh telh a, Pathian leh mihring duhsakin a awm deuh deuh a.