Read Baibul, Mizo Luka 20 Bible Online

Luka 20 - Baibul, Mizo bible

Luka 20

¹Tin, ni khat chu heti hi a ni a, Pathian biak ina mite a zirtir a, Chanchin Tha a hrilh laiin,puithiam lalte leh lehkhaziaktute chu upate nen, a hnenah an lo kal thut a;

²tin, a hnenah, "Tu thuin nge he'ng thil hi i tih? Tuin nge thu pe che? min hrilh rawh," tiin an zawt a.

³Tin, ani chuan an hnenah, "Kei pawhin thu kam khat ka zawt ve ang che u; mi hrilh rawh u.

⁴Johana baptisma kha vana mi thu nge mihring thu?" a ti a, a chhang a.

⁵tin, an inngaihtuah a, " 'Vana mi thu,' kan tih chuan, 'Engah nge a thu in awih loh?' min ti si ang a.

⁶Tin, 'Mihring thu,' kan tih chuan mi zawng zawngin lungin min deng ang; Johana chu zawlnei a nih an ring si a," an ti a.

⁷Tichuan an chhang a, "Khawi lam zawk thu nge ni kan hre lo," an ti a.

⁸Tin, Isua'n an hnenah, "Kei pawhin tu thuin nge he'ng thil hi ka tih ka hrilh bik lo ang che u," a ti a.

⁹Tin, vantlang hnenah he tehkhin thu hi a sawi ta a:"Tuin emaw grep huan a siam a, lo enkawltute hnenah thlawhhlawh turin a pe a, rei tak thang turin ram dangah a kal ta a.

¹⁰Tin, a lawh hun chuan huana rah chu a chanai an lo pek turin lo enkawltute hnenah chuan bawih pakhat a tir a; nimahsela lo enkawltute chuan an lo vel a, kut ruakin an kaltir leh ta a.

¹¹Tin, bawih dang a tir leh a; chu pawh chu an lo vel leh bawk a, zahthlak takin an siam a, kut ruak vekin an kaltir leh ta a.

¹²Tin, a pathumna a tir leh pek a; chu mi pawh chu an lo tisil a, an paih chhuak ta a.

¹³Tin grep huan neitupa chuan, 'Engtin nge ka tih ang aw? Ka fapa duh tak ka tir mai ang, ani hi an lo zah mahna,' a ti a.

¹⁴Nimahsela lo enkawltute chuan ani chu an lo hmuh veleh, 'He mi hi ro luahtu tur chu a ni; i that ang u, chutichuan a ro kan tan a ni ang,' tiin an inrawn a.

¹⁵Tichuan grep huan ata chu an theh chhuak a, an tihlum ta a. Chutichuan grep huan neitupa chuan an chungah engtin nge a rawn tih ang?

¹⁶Lo enkawltute chu a rawn tiboral ang a, huan chu mi dangte a pe ang," a ti a. Tin, chu chu an hriatin, "Chung em chu thleng suh se!" an ti a.

¹⁷Nimahsela ani chuan anniho chu a en a, "He thu an ziak hi eng nge ni le? 'In satute lung duh loh kha, chu ngei chu a kila lung tangkai ber a lo ni ta,' tih hi.

¹⁸Tupawh chu mi lung chunga tlu apiang an keh sawm ang; a delh lek phei chu a rawt dip ang," a ti a.

¹⁹Tin, chutih lai tak chuan lehkhaziaktute leh puithiam lalten man an tum a; nimahsela mipui chu an hlau a; chu tehkhin thu chu anmahni demin a sawi tih an hre si a.

²⁰Tin, amah chu Ram Awptu rorelna leh thuneihnaa thlen atan, a thusawi sual la turin an chang reng a, enthlatu, mi tha anga awm derte chu an tir a.

²¹Anni chuan a hnenah, "Zirtirtu, dik takin thu i sawiin i zirtir a, tumah thlei bik loin tih tak zetin Pathian kawng thu i zirtir thin kan hria e;

²²Kaisara hnena chhiah kan chawi a thiang nge thiang lo?" tiin an zawt a.

²³Nimahsela ani chuan an ngamthlem a ni tih a hria a,

²⁴an hnenah, "Duli mi entir rawh u," a ti a. "Tu lem leh tu hming nge chuang hi?" a ti a. Tin, anni chuan, "Kaisara," an ti a.

²⁵Tin, ani chuan an hnenah, "A nih ahnu, Kaisara thilte chu Kaisara hnenah pe u la, Pathian thilte chu Pathian hnenah pe ta che u," a ti a.

²⁶Tichuan mipui hmaa a thusawi sual lak tur an hmu lo a; a chhanna chu mak an ti hle a, an ngawi reng a.

²⁷Tin, Saddukai, thawhlehna a awm lo tite zinga mi tute emaw a hnenah an lo kal a;

²⁸a hnenah, "Zirtirtu, Mosia'n tupawh a unaupain nupui nei se la, fa nei loin thi sela, a unaupain a nupui rochungin a unaupa tan chi a thlahsak tur a ni tih, min ziaksak a ni.

²⁹Aw le, sal sarih an awm a; a upa berin nupui a nei a, fa nei loin a thi a.

³⁰A pahnihna chuan a rochung a;

³¹a pathumna chuan a rochung leh a; chutiang theuhin pasarihte chu fa nei loin an thi zel a.

³²Chu mi hnuah chuan hmeichhia pawh chu a thi ta a.

³³Chutichuan thawhleh hunah chuan a tu bera nupui nge ni ang? An pasarih chuan nupuiah an nei theuh si a," tiin an zawt a.

³⁴Tin, Isua'n an hnenah, "He khawvel mite hi nupui pasal an innei thin;

³⁵nimahsela chung huna tel tlakah leh mitthi zing ata thawhlehnaa tel tlaka ruat apiangte chu, nupui pasal an innei dawn tawh lo e;

³⁶thih pawh an thi leh thei dawn tawh lo a ni, vantirhkohte tlukin an awm dawn si a; thawhlehna fate an nih avangin Pathian fate an ni ang.

³⁷Mitthi kaihthawhin an awm tur tih Mosia pawhin, Hnim Buk thuah, Lalpa chu 'Abrahama Pathian, Isaaka Pathian, Jakoba Pathian,' a tih lai khan a hriattir kha.

³⁸Ani chu mitthi Pathian a ni lo a, mi nung Pathian a ni zawk e; ani ngaih chuan mi zawng zawng an nung vek si a," a ti a.

³⁹Lehkhaziaktu tuten emaw, "Zirtirtu, i sawi dik zet mai," an ti a, an chhang a.

⁴⁰Thu dang an zawt ngam tawh si lo.

⁴¹Tin, ani chuan an hnenah, "Krista chu Davida fapa a ni tih engtiziaa sawi thin nge an ni?

⁴²Fakna Hla Buah Davida ngeiin, Lalpa chuan ka Lalpa hnenah,

⁴³'I hmelmate i ke nghahchhana ka siam hma loh zawng ka ding lamah thu rawh,' a ti, a ti a.

⁴⁴Chutichuan Davida'n ani chu, 'Lalpa' a ti si a, engtin nge a fapa a nih theih le?" a ti a.

⁴⁵Tin, mi zawng zawng hriatin a zirtirte hnenah,

⁴⁶Lehkhaziaktute lakah fimkhur rawh u; anni chuan kawr fual haa len an duh thin a, dawr hmunah chibai bukte, inkhawmna inah thutphah tha berte, ruaithehnaah hmun tha berte an ngaina thin a,hmeithai sum an ei a, tlang bumna'n rei tak an tawngtai thin; chungho chuan thiam loh an chang nasa lehzual ang," a ti a.

⁴⁷hmeithai sum an ei a, tlang bumna'n rei tak an tawngtai thin; chungho chuan thiam loh an chang nasa lehzual ang," a ti a.