Read Baibul, Mizo Luka 22 Bible Online

Luka 22 - Baibul, Mizo bible

Luka 22

¹Tin, chhang dawidim telh loh kut, Kalhlen Kut an tih chu a hnai ta a.

²Tin, puithiam lal leh lehkhaziaktute chuan a tihhlumnazia an zawng a, vantlang an hlau si a.

³Tin, sawm leh pahnihte zinga tel, Juda Iskariota an tiha chhungah chuan Setana a lut a.

⁴Tichuan ani chu a va kal a, an hnena a mantir theihna turzia puithiam lalte leh hotute chu a va rawn a.

⁵Tin, anni chu an lawm hle a, a hnenah tangka pek an tiam ta a.

⁶Tin, ani chuan a remti a, mipui awm loh hlana mantirna remchang a zawng ta a.

⁷Tin, chhang dawidim telh loh ni, Kalhlen Kutna beram no talna tur ni chu a lo thleng ta a.

⁸Tichuan Isua'n, Petera leh Johana chu, "Kalhlen Kut chaw kan ei turin min va buatsaihsak rawh u," tiin a tir a.

⁹Tin, anni chuan a hnenah, "Khawiah nge va buatsaih i la i duh?" an ti a.

¹⁰Tin, ani chuan an hnenah, "Ngai teh u, khawpuia in luhin, mipa, bela tui puin a tawk ang che u a; a luhna inah zui lut ang che u.

¹¹Tin, in neitupa hnenah chuan, 'Zirtirtuin, ka zirtirteho nen Kalhlen Kut chaw kan eina tur, mikhual pindan chu khawiah nge? a ti a che,' ti ang che u.

¹²Tichuan ani chuan pindan chungnung zau tak, bungraw awm sa, a entir ang che u; chutah chuan buatsaih ang che u," a ti a.

¹³Tin, an kal ta a, an hnena a sawi ang takin an hmu a; tin Kalhlen Kut chaw chu an buatsaih ta a.

¹⁴Tin, a ei a lo hun chuan ani chuan chaw a kil a, a tirhkohte chuan an kilpui ve a.

¹⁵Tin, an hnenah, "Ka thil tuar hmain he Kalhlen Kut chaw hi eipui che u ka duh em em a ni.

¹⁶Ka hrilh a che u, hei hi Pathian rama a taktak a nih hma loh zawng, ka ei leh tawh dawn lo a ni," a ti a.

¹⁷Tin, no a la a, lawmthu a sawi zawhin, "Hei hi la u la, insem rawh u;

¹⁸ka hrilh a che u, tun achinah Pathian ram a lo thlen hma loh zawng grep hrui rah tui hi ka in leh tawh dawn lo a ni," a ti a.

¹⁹Tin, chhang a la a, lawmthu a sawi zawhin a phel a, an hnenah a pe a, "Hei hi ka taksa, in aia pek tura chu a ni; mi hriat rengna'n hei hi ti thin rawh u," a ti a.

²⁰Tin, zanriah ei zawhin chutiang bawkin no chu a la a, "He no hi ka thisena thuthlung thar chu a ni, in aia chhuak tura chu.

²¹Nimahsela ngai teh u, mi mantirtu tura kut chu ka hnenah dawhkan chungah a awm si a.

²²Mihring Fapa hi an ruat angin a kal dawn a ni; nimahsela a mantirtu tur mihring chung chu a pik e!" a ti a.

²³Tin, anni'n, "Kan zingah chutiang thil ti tur chu tu nge ni ang le?" tiin an inzawt ta a.

²⁴Tin, an zingah tu ber nge ropui bera a ruat tih thu-ah inhnialna a lo chhuak a.

²⁵Tin, ani chuan an hnenah, "Jentailho lalte chu an chungah an lal thin a; an chunga thu neitute chu 'Nu leh pa' an ti thin.

²⁶Nimahsela nangni zawng chutiang in ni lo ang; in zinga ropui ber chu nau zawk angin awm se la, lal ber chu rawngbawltu angin awm zawk rawh se.

²⁷Tunge ropui zawk, chaw kiltu nge rawngbawltu? Chaw kiltu a ni lo em ni? Nimahsela kei zawng in zingah rawngbawltu angin ka awm hi.

²⁸Thlemna ka tawh chhung zawng nangni mi awmpuitu in ni a;

²⁹tichuan ka rama ka dawnkana in eia in bar theihna turin, ka Pain ram mi ruatsak angin ram ka ruatsak che u a ni;

³⁰tichuan Israel hnam sawm leh hnam hnih rorelsakin lalthutphahah in la thu ang.

³¹Simon, Simon, ngai teh, Setanan buh thlei anga a thlei theihna tur che uin, nangniho hi a dil che u a sin;

³²nimahsela i rin a bo lohna'n ka tawngtaisak che a ni; i hawi kir leh hunah nangin i unaute tinghet ang che," a ti a.

³³Tin, ani chuan a hnenah, "Lalpa, i hnenah chuan tan inah leh thihnaah pawh kal ve ka huam a sin," a ti a.

³⁴Tin, ani chuan, "Peter, ka hrilh a che, i mi hriatnaah hian vawi thum i phat hma loh zawng vawiinah hian ar a khuang lo ang," a ti a.

³⁵Tin, an hnenah, "Tangka ip lo a, ipte lo a, pheikhawk loa ka tirh chhuah che u khan thil reng reng in tlachham em?" a ti a. Tin, anni chuan, "Chham lo," an ti a.

³⁶Tin, ani chuan an hnenah, "Tunah erawh chuan tupawh tangka ip nei chuan keng rawh se, ipte nen; tupawh khandaih nei lo chuan a puan hralh se la lei rawh se.

³⁷Ka hrilh a che u, 'Ani chu mi sual zingah an chhiar tel ta,' tih ziak kha ka chungah a lo thleng tur a ni; ka chungchang thute kha a thleng zo dawn ta e," a ti a.

³⁸Tin, anni chuan, "Lalpa, en teh, hei khandaih pahnih a awm," an ti a. Ani chuan an hnenah, "A tawk e," a ti a.

³⁹Tin, ani chu a chhuak a, a dan pangngaiin Oliv tlangah chuan a kal ta a; zirtirte pawhin an zui a.

⁴⁰Tin, a hmun chu a va thlen chuan an hnenah, "Thlemnaa in luh lohna'n tawngtai rawh u," a ti a.

⁴¹Tin, lung den phak chinah emaw a va kal hrang ta a; tin, a thingthi a, a tawngtai a,

⁴²Ka Pa, rem i tih chuan he no hi ka hnen ata la sawn rawh; nimahse keia thu ni loin, nangma thu thu ni zawk rawh se," a ti a.

⁴³Tin, van atangin vantirhkoh pakhat a tiharh turin a hnenah a rawn inlar a.

⁴⁴Tin, a thlaphang em em a, thahnemngai lehzualin a tawngtai a; a thlan chu thi far lian tak angin leiah a far a.

⁴⁵Tin, a tawngtai zawha a thawhin, zirtirte hnenah chuan a lo kal a, an lungngaih avangin an lo muhil a hmu a;

⁴⁶tin, an hnenah, "engati nge in muthlilh? thlemnaa in luh lohna'n tho u la, tawngtai rawh u," a ti a.

⁴⁷Tin, a la sawi lai mekin, ngai teh, mipui an lo kal a, sawm leh pahnihte zinga tel Juda an tih chuan an hma a rawn hruai a; tin, fawh tumin Isua a rawn pan a.

⁴⁸Nimahsela Isua chuan a hnenah, "Juda, Mihring Fapa hi fawpin I mantir dawn em ni?" a ti a.

⁴⁹Tin, a vela mite chuan thil lo thleng tur chu an hriatin, "Lalpa, khandaihin kan sat ang em?" an ti a.

⁵⁰Tin, an zinga tuin emaw Puithiam Lalber bawih chu a sat a, a beng ding lam a sah thlaksak a.

⁵¹Isua erawh chuan, "A tawk e," a ti a. Tin, a beng chu a dek a, a tidam ta a.

⁵²Tin, Isua'n a hnena lo kal puithiam lalte, Pathian biak in hotute leh upate hnenah chuan," Khandaihte, taltumte kengin suamhmang man tur ang rengin, in lo chhuak a ni maw?

⁵³Pathian biak ina in hnena ni tin ka awm laite khan mi man tumin mi ban si lo a; nimahsela tun hi in chet hun a ni e, thim thu neihna nen," a ti a.

⁵⁴Tin, an man a, an hruai a, Puithiam Lalber inah chuan an hruai lut ta a. Tin, Petera'n hla tak atangin a zui a.

⁵⁵Tin, in hual chhung kawtlaiah mei an chhem a, an thu khawm a, Petera chu an zingah a va thu ve a.

⁵⁶Tin, mei enga a thut laiin nula tuin emaw a hmu a, a melh reng a, "He mi pawh hi a hnena awm kha a nih hi," a ti a.

⁵⁷Ani erawh chuan, "Hmeichhia, ani chu ka hre lo e," tiin a pha a.

⁵⁸Tin, nakin deuhvah mi dangin a rawn hmu leh a, "Nang pawh an zinga mi i nih hi," a ti a. Petera erawh chuan, "Mihring, ka ni lo e," a ti a.

⁵⁹Tin, darkar khat lai chinah chuan mi dangin, "He mi pawh hi a hnena awm kha a ni ngei mai; Galili rama mi a ni alawm" a ti tlat a.

⁶⁰Tin, Petera'n, "Mihring, i thusawi chu ka hre lo e," a ti a. Tin, thawklehkhatan, a tawng lai tak chuan ar a khuang ta nghal a.

⁶¹Tin, Lalpa chu a hawi a, Petera chu a en a. Tin, Petera chuan Lalpa'n, "Vawiinah hian ar a khuan hmain vawi thum mi phat ang," a hnenah a tih thu kha a lo hre chhuak leh ta a.

⁶²Tin, a chhuak a, a tap ta zawih zawih a.

⁶³Tin, Isua chelhtuten nuihza siamna'n an hmang a, an vua a.

⁶⁴Tin, a mit an tuam a, "Sawi rawh, tu nge vua che?" tiin an zawt thin a.

⁶⁵Tin, thu dang tam tak pawhin an sawichhiain an hau a.

⁶⁶Tin, khawvar veleh vantlang upaho, puithiam lalte leh lehkhaziaktute chu an rawn inkhawm a, an rorelnaah chuan an hruai a,

⁶⁷Krista i nih zet chuan min hrilh rawh," an ti a. Tin, ani chuan an hnenah, "Hrilh che u mah i la in awih lo ang;

⁶⁸zawt che u mah i la in chhang lo ang.

⁶⁹Nimahsela tun achinah chuan Mihring Fapa hi Pathian thiltihtheihna ding lamah a thu tawh ang," a ti a.

⁷⁰Tin, an zain, "Nang hi Pathian Fapa chu i ni em ni le?" an ti a. Tin, ani chuan an hnenah, "Ni e," a ti a.Tin, anni chuan, "Eng hriatna dang nge kan ngaih tawh ang? Keimahni ngeiin ama ka chhuak kan hre tawh alawm," an ti a.

⁷¹Tin, anni chuan, "Eng hriatna dang nge kan ngaih tawh ang? Keimahni ngeiin ama ka chhuak kan hre tawh alawm," an ti a.