Read Baibul, Mizo Luka 23 Bible Online

Luka 23 - Baibul, Mizo bible

Luka 23

¹Tin, pungho zawng zawng chu an tho a, Isua chu Pilata hnenah an hruai ta a.

²Tin, "He mi hian kan chite a tikhawlo a, Kaisara hnenah chhiah chawi a khap a, Krista, lal, a intih kan hria e," tiin an hek ta a.

³Tin, Pilatan a hnenah, "Judate lal i ni em?" tiin a zawt a. Tin, ani chuan a hnenah, "Ni e," a ti a, a chhang a.

⁴Tin, Pilatan puithiam lalte leh mipuite hnenah chuan, "He mi chungah hian engmah sual ka hmu lo e," a ti a.

⁵Nimahsela anni chuan, "Galili ramah a tan a, he mi hmun thleng hian, Judai ram khaw tinah zirtirin mi zawng zawng a chawk hnawk thin a ni," tiin an bei lehzual sauh a.

⁶Tin, Pilatan chu chu a hriatin, chu mi chu Galili rama mi a nih leh nih loh a zawt a.

⁷Tichuan Heroda biala mi a ni tih a hriat veleh Heroda hnenah a tir ta a; chung lai chuan ani pawh chu Jerusalem khuaah a awm bawk a.

⁸Tin, Herodan Isua a hmuh chuan a lawm em em a; a chanchin a hriat avangin, hman ata tawh hmuh a duh hle reng a, a thilmak tih eng emaw tal hmuh pawh a beisei a.

⁹Tin, thu tam tak a zawt a; nimahsela a engmah chu a chhang si lo.

¹⁰Tin, puithiam lalte leh lehkhaziaktute chuan dingin nasa takin an hek chiam a.

¹¹Tin, Heroda leh a sipaite chuan Isua an hmusit a, nuihza siamna'n an hmang a, tin, puan ropui tak sintirin Pilata hnenah a tir leh ta a.

¹²Tin, chu mi ni tak chuan Heroda leh Pilata chu an inngeih ta a; chu mi hma zawng chu an intai thin a ni.

¹³Tin, Pilatan puithiam lalte, hotute, mi zawng zawngte a ko khawm a,

¹⁴an hnenah, "'Mite a tikhawlo,' tiin he mi hi ka hnenah in rawn hruai kha a ni a; tin, ngai rawh u, in hmaah ka chhuahchhal a, in hekna thu-ah khan he mi chungah hian engmah sual ka hmu lo a ni;

¹⁵Heroda pawhin a hmu hek lo; kan hnenah a rawn tir leh ta mai a nih hi; ngai rawh u, thihna khawp meuhin engmah a ti lo e.

¹⁶Chutichuan ka vel ang a, ka chhuah mai dawn a ni," a ti a.

¹⁷Kut niah chuan mi pakhat anmahni a chhuahsak ngei tur a ni si a.

¹⁸Nimahsela rual takin an au a, "He mi hi chu tiboral la, Barabba kha min chhuahsak zawk rawh," an ti a.

¹⁹(Chu mi chu khawpuia helna eng emaw avang leh, tual a thah avanga tan ina tang a ni.)

²⁰Pilata erawh chuan Isua chhuah a duh a, an hnenah thu a sawi leh a;

²¹nimahsela an au a, "Kraws-ah khengbet rawh, kraws-ah khengbet rawh," an ti a.

²²Tin, ani chuan a vawi thumnaah an hnenah, "Engah maw? He mi hian eng nge a tihsual ni? Thihna khawp meuh a chungah engmah ka hmu lo; chutichuan ka vel ang a, ka chhuah mai dawn a ni," a ti a.

²³Anni erawh chuan aw ring takin kraws-a khengbet turin an ngen lui hram a. Tin, an aw chuan a vaudai ta a.

²⁴Tin, Pilata chuan an ngen anga ti turin thu a titlu ta a.

²⁵Helna leh tualthah avanga tan ina tang an dil kha, a chhuah a; Isua erawh chu an duh duha tihah a pe ta a.

²⁶Tin, an hruai bo laiin Simona, Kurini khuaa mi, ram lam ata lo kal an man a, Isua hnung lama pu turin a chungah kraws chu an nghat a.

²⁷Tin, mi naran leh hmeichhia awm chuma tap tap, mipui tam takin an zui a.

²⁸Isua erawh chuan an lam a hawi a, "Jerusalem fanute u, mi tah suh u, nangmahni leh in fate tan tap rawh u.

²⁹Ngai teh u, a ni a lo la thleng ang, chung niah chuan, 'Hmeichhe chingte, nau pai ngai lohna pumte, nau hnek ngai loh hnutete chu a eng a thawl e,' an la ti ang.

³⁰Chutih hunah chuan mitten tlang hnenahte, 'Min delh rawh,' an la ti ang a; mual hnenahte,'Min khuh rawh,' an la ti ang.

³¹Thing hring maha hetiang an tih chuan a rovah chuan eng ti takin ti ang maw?" a ti a.

³²Tin, a hnenah mi dang pahnih, mi sual, tihhlum turin an hruai ve a.

³³Tin, Lu Ruh an tih hmun chu an thlenin, chutah chuan kraws-ah an khengbet a, mi sualte nen, a ding lamah pakhat, a vei lamah pakhat.

³⁴Tin, Isua'n, "Ka Pa, anni hi ngaidam rawh; an thiltih hi an hre lo a nih hi," a ti a. Tin, a silhfente chu an insemin thum an vawr a.

³⁵Tin, vantlangho chuan dingin an thlir a. Tin, hotute pawhin, "Mi dang mah a tidam thin alawm; Pathian thlan Krista a nih tak zet chuan amah pawh intidam ang hmiang," tiin an tiel a.

³⁶Tin, sipaite pawhin amah chu nuihza siamna'n an hmang a, a hnenah an lo kal a, zu thur an pe a,

³⁷Judate lal i nih zet chuan, intidam rawh," an ti a.

³⁸Tin, a chung lamah chuan, "He Mi hi Judate Lal a ni," tiin lehkha a awm.

³⁹Tin, an mi sual khai pakhat chuan Isua a hau a, "Krista chu i ni lo em ni? Intidam la, keini pawh min tidam ta che," a ti a.

⁴⁰Nimahsela pakhat chuan chhan pahin a zilhhau a, "Pathian meuh pawh i hlau na nge? Thuhmun rengin an hrem che hi.

⁴¹Keini zawng hremzia reng kan ni; kan thiltih man chauh hmu kan nih hi; he mi hi zawngin engmah a tisual si lo," a ti a.

⁴²Tin, "Isu, i ram i thlen hunah mi hre reng ang che," a ti a.

⁴³Tin, ani chuan a hnenah, "Tih tak meuhin ka hrilh a che, vawiinah hian ka hnenah Paradis-ah i awm ve ang," a ti a.

⁴⁴Tin, chawfak hun lai a lo ni a, chumi achin behliang mun hun thlengin khawvel a lo thim ta vek a,

⁴⁵ni eng a reh ta a; tin, Pathian biak in puan zar chu a laiah a lo thler ta a.

⁴⁶Tin, Isua aw ring takin a au a, "Ka Pa, i kutah ka thlarau ka kawltir e," a ti a. Tin, chu chu a tih zawhin a thlarau a thlah ta a.

⁴⁷Tin, sipai za hotu chuan thil awmzia chu a hmuhin, "He mi hi matheiloin mi fel tak a ni phawt mai," tiin Pathian a fak ta a.

⁴⁸Tin, chu ennawm chu thlir tura mipui rawn inkhawm zawng zawngte chuan thil awmziate chu an hmuhin an awmte chum chumin an haw leh ta a.

⁴⁹Tin, a hmelhriatte zawng zawng leh hmeichhia Galili ram atanga rawn zuite chu, chung thil chu thlirin hla takah an ding a.

⁵⁰Tin, ngai teh, mi pakhat a hming Josefa, roreltu, mi tha tak, fel tak a awm,

⁵¹(an rorel leh an thiltih pawh kha a remti lo reng a ni) Judate khua Arimathaia mi a ni a, Pathian ram a beisei thin a.

⁵²Chu mi chu Pilata hnenah a kal a, Isua ruang a dil a.

⁵³Tin, a la thla a, puan zai sinin a tuam a, thlan, lung kerkuak, tumah la zalh ngai lohnaah a zalh a.

⁵⁴Tin, chu mi ni chu Inrinni a ni a, Chawlhni a lo ni lek lek tawh si a.

⁵⁵Tin, hmeichhia Galili ram atanga a hnena lo kalte khan an zui zel a, thlan leh a ruang zalhzia chu an hmu a.Tin, an haw leh a, englo rimtuite leh hriak rimtuite an siam a.

⁵⁶Tin, an haw leh a, englo rimtuite leh hriak rimtuite an siam a.