Read Baibul, Mizo Luka 24 Bible Online

Luka 24 - Baibul, Mizo bible

Luka 24

¹Tin, Chawlhni chuan thupek angin an chawl ta a; ni sarih ni hmasa berah erawh chuan vartianah, englo rimtui an siamte chu kengin thlanah chuan an va kal a.

²Tin, thlan ata lung chu lum sawnin an hmu a;

³tin, an lut a, Lal Isua ruang chu an hmu si lo.

⁴Tin, heti hi a ni a, chung avanga an mangan lai chuan ngai teh, mi pahnih puan mi enkhalhthei sin an kiangah an lo ding a;

⁵tin, an hlauha an hmaia lei an sik laiin anni chuan an hnenah, "Engati nge mitthi zinga mi nung in zawn?

⁶Hetah a awm tawh lo e, a tho leh ta; Galili rama a awm laia in hnena a thusawi kha hre leh rawh u,

⁷'Mihring Fapa hi mi sualte kuta mantirin a awm ang a, kraws-ah an khengbet ang a, ni thum niah chuan a tho leh tur a ni,' a tih kha," a ti a.

⁸Tin, a thu chu an lo hre leh ta a,

⁹thlan ata chu an haw leh a, sawm leh pakhatte leh mi dang zawng zawngte hnenah chuan chung thil zawng zawng chu an hrilh a.

¹⁰(Chung hmeichhiate chu Magdalini Mari te, Joani te, Jakoba nu Mari te an ni a; an hnena hmeichhe dangte pawhin tirhkohte hnenah chuan chung thu chu an hrilh bawk a.)

¹¹Nimahsela chung thu chu thu mai maiah an ruat a, an awihsak lo a.

¹²Nimahsela Petera chu a tho a, thlanah chuan a tlan ta a; tin, a kun a, a bih a, puan zai sin awmte chauh chu a hmu a; tichuan thil awmzia chu mak ti takin a inlamah a haw ta a.

¹³Tin, ngai teh, chu mi ni tak chuan an zinga mi pahnih chu khaw pakhat Emmau an tihah an kal dawn a, chu mi khua chu Jerusalem khua atangin fing sawmruk a ni a.

¹⁴Tin, thil lo thleng zawng zawng chu an sawi dun zel a.

¹⁵Tin, heti hi a ni a, an sawia an inhnial lai chuan Isua ngeiin a rawn pan a, an hnenah a kal ve ta a.

¹⁶Nimahsela amah chu an hriat theih lohna'n, an mit chu tihvaihin a awm a.

¹⁷Tin, an hnenah, "Kal paha in sawi dun kha, eng thu nge ni?" a ti a. Tin, ngui takin an ding ta a.

¹⁸Tin, a hming Kleopa zawkin a hnenah, "Jerusalem khuaah nangmah chauhin em ni i chen, tun laia thil awmzia hi i hriat loh ni?" a ti a, a chhang a.

¹⁹Tin, ani chuan an hnenah, "Eng thil maw?" a ti a. Tin, anni chuan a hnenah, 'Nazaret Isua,Pathian leh mi zawng zawng mithmuha a thu-ah leh a thiltiha zawlnei hmingthang tak chanchin thu;

²⁰puithiam lalte leh kan hotuten thah thu pek turin an hruai a, kraws-a an khenbehzia thute pawh kha.

²¹Keini'n Israelte tlantu tur kha a nih kan beisei tehlul nen. Engpawh ni se la, chung thil thlenna chin chu vawiin nen ni thum a ni tawh.

²²Chung lo pawh chu kan pawlte hmeichhia tute emaw, zingah a thlanah an va kal a, min rawn timangang a;

²³a ruang hmu si loin, 'Pathian vantirhkohte inlar kan hmu a, chu mite chuan a nung leh tih an sawi e,' an rawn ti a.

²⁴Tin, kan awmpui zinga tute emaw thlanah chuan an kal a, hmeichhiate sawi ang ngeiin an hmu a; nimahsela amah chu an hmu si lo a," an ti a.

²⁵Tin, ani chuan an hnenah, "Mi ate u! zawlneite thusawi zawng zawng awih kawnga ngawngte u!

²⁶Kristan chung thil chu tuarin a ropuinaah a lut tur a ni reng lo em ni?" a ti a.

²⁷Tin, Mosia leh zawlneite zawng zawng lehkhaah a tan a, Pathian Lehkha zawng zawnga ama chanchin ziak apiang chu anmahni a hrilhfiah zel a.

²⁸Tin, an kalna tur khua chu an thleng dawn ta a; tin, ani chu hla deuha kal tum angin a awm a.

²⁹Tin, kain an chelh a, "Kan hnenah awm ta che; khua a tlai dawn ta a, ni pawh a tlak dawn tawh hi," an ti a. Tichuan an hnena awm turin a lut ta a.

³⁰Tin, heti hi a ni a, an hnenah chaw kila a thutin chhang a la a, mal a sawm a, a phel a, an hnenah a pe a.

³¹Tin, an mit a lo var a, a hmel an lo hre ta a; tin, ani chu a ral ta mai a.

³²Tin, anni chuan, "Kalkawnga min biak laia Pathian Lehkha Thute min hrilhfiah lai khan kan thinlung a harh huai reng lawm ni kha?" an inti a.

³³Tin, chu mi lai tak chuan an tho a, Jerusalem khuaah an kir leh a, sawm leh pakhatte leh an thiante awm khawm chu an hmu a,

³⁴Lalpa chu a lo tho leh tak zet a ni, Simona hnenah pawh a inlar ta," an lo ti a.

³⁵Tin, anni pawhin kalkawnga thil lo thleng leh, chhang a phel a, a hmel an lo hriat takziate chu an hrilh ve bawk a.

³⁶Tin, chung thu chu an sawi laiin amah ngei chu an zingah a lo ding a, an hnenah, "In chungah thlamuanna awm rawh se," a ti a.

³⁷Nimahsela rapthlak an ti em em a, an hlau a, thlarau hmu-ah an inruat a.

³⁸Tin, ani chuan an hnenah, "Engati nge in mangan? Engah nge in rilruah rinhlelhna a lo awm?

³⁹Ka kutte, ka kephahte hi en rwh u, hei keimah ngei kha ka nih hi! Mi dek u la, en rawh u; mi hmuh ang hian thlarauin tisa leh ruh a nei lo e," a ti a.

⁴⁰Tin, chu chu a sawi zawhin a kutte, a kephahte an hnenah a entir a.

⁴¹Tin, an lawm luattuk avanga an la awih loh cheuva mak an tih chhungin an hnenah, "Hetah englo ei tur in nei em?" a ti a.

⁴²Tin, sangha rawh hrang khat an pe a.

⁴³Tin, a la a, an hmaah chuan a ei ta a.

⁴⁴Tin, an hnenah, "Heng hi ka thu kha a ni, Mosia Danahte, Zawlnei Lehkhabuahte, Fakna Hla Buahte ka chanchin ziak apiang a lo thlen turzia in hnena ka awm laia ka hrilh thin che u kha," a ti a.

⁴⁵Tichuan Pathian Lehkha Thu hriatna'n an thinlung a tifing ta a;

⁴⁶tin, an hnenah, "Hetiangin ziak a ni, 'Krista chuan hrehawm a tuar ang a, ni thum niin mitthi zing ata a tho leh ang a,

⁴⁷ama hmingin simna thu leh sual ngaihhnathiamna thu Jerusalem khuaa tanin, hnam tin hnenah an hril ang,' tiin.

⁴⁸Chung thil zawng zawng chu a hretu in ni e.

⁴⁹Tin, ngai teh u, ka Pa thil tiam chu in chungah ka rawn tir dawn e; nimahsela chung lam ata thiltihtheihnaa an thuam hma loh che u zawng khawpuiah hian awm reng rawh u," a ti a.

⁵⁰Tin, Bethani dai kiang thlengin anni chu a hruai chhuak a; tin, a ban a phar a, mal a sawmsak a.

⁵¹Tin, heti hi a ni a, mal a sawmsak lai takin anni chu a then a, vana hruai chhohin a awm ta a.

⁵²Tin, chibai an buk a, lawm em emin Jerusalem khuaah an kir leh ta a;tin, Pathian biak inah chuan Pathian fakin an awm fo thin a.

⁵³tin, Pathian biak inah chuan Pathian fakin an awm fo thin a.