Read Baibul, Mizo Luka 4 Bible Online

Luka 4 - Baibul, Mizo bible

Luka 4

¹Tin, Isua chu Thlarau Thianghlimin a khat a, Jordan lui atangin a kir leh a,

²diabola thlem chungin thlalerah ni sawmli Thlarau hruaiin a awm a.

³Tin, chung ni chuan engmah a ei lo; tin, a tawpah chuan a ril a lo tam ta a. Tin, diabola chuan a hnenah, "Pathian Fapa i nih chuan he lung hi chhanga chang turin thu pe rawh," a ti a.

⁴Tin, Isua'n a hnenah, " 'Mihring hi chhang chauhin an nung lo vng,' tih ziak a ni," a ti a, a chhang a.

⁵Tin, a hruai chho a, mit khap kar loah khawvel ram zawng zawng a entir a.

⁶Tin, diabola chuan a hnenah, "Heng zawng zawng chunga thuneihna leh a ropuina hi ka pe ang che; ka hnena pek a ni tawh si a, ka duh apiang hnenah ka pe bawk thin a ni.

⁷Chutichuan chibai mi buk la, a zain i ta a ni vek ang," a ti a.

⁸Tin, Isua'n a hnenah, " 'Lalpa i Pathian chibai buk la, ama rawng chauh bawl rawh,' tih ziak a ni," a ti a, a chhang a.

⁹Tin, diabola chuan Jerusalem khuaah a hruai a, Pathian biak in chip zumah chuan a dah a, tin, a hnenah, "Pathian Fapa I nih chuan heta tang hian tla thla rawh;

¹⁰'Nangmah humhim tur chein i chung thu-ah zawng a vantirhkohte chu thu a pe ang,' tih leh,

¹¹'An kutin an dawm ang chia, chutilochuan i kein lung i chhuih hlauh dah ang e,' tih ziak a ni si a," a ti a.

¹²Tin, Isua'n a hnenah, " 'Lalpa i Pathian fiah suh,' tih a ni e," tiin a chhang a.

¹³Tin, diabolan a thlemna tur tinrenga a thlem zawh chuan a remchan hun atan a kalsan ta a.

¹⁴Tin, Isua chu Thlarau thiltihtheihna puin Galili ramah a haw leh ta a; tin, a chanchin chu, chu mi vel ram tinah chuan a thang ta a.

¹⁵Tin, an inkhawmna inahte a zirtir zel a, mi zawng zawng fakin a awm a.

¹⁶Tin, a sei lenna khua Nazaret chu a lo thleng a; tin, Chawlhnia a tih dan pangngaiin inkhawmna inah a lut a, chhiar turin a ding a.

¹⁷Tin, zawlnei Isaia lehkhabu chu a hnenah an pe a. Tin, lehkhabu zial chu a phelh a, he thu ziakna lai hi a chhar a,

¹⁸Riangvaite hnenah Chanchin Tha hril tura mi ruat avangin Lalpa Thlarau chu ka chungah a awm; ani chuan salte hnena chhuahna thu leh, mitdelte hnena mitvar neih lehna thu sawi tur te, tihduhdah tuarte chhuahtirna tur te,

¹⁹Lalpa lungawi kum thu sawi tur tein, mi tir a ni," tih hi.

²⁰Tin, lehkhabu chu a zial a, rawngbawltu a pe leh a, a thu ta a. Tin, inkhawmna ina mi zawng zawng mit chu a chungah a fu a.

²¹Tin, an hnenah, "He Pathian Lehkha Thu hi vawiinah hian in hriatah a lo thleng ta," tiin a sawi tan a.

²²Tin, an zain amah an fak a, a kam chhuak kawngaih thute chu mak an ti hle a. Tin, "He mi hi Josefa fapa a ni lo em ni?" an ti a.

²³Tin, ani chuan an hnenah, "Nangni'n he tehkhin thu hi, 'Daktawr, nangmah intidam rawh,''Kapernaum khuaa i thiltih kan lo hriat apiang kha, hetah nangma khaw lamah pawh hian ti rawh,' tiin min la hrilh dawn ngei nak hi," a ti a.

²⁴Tin, amah vekin, "Tih tak meuhin ka hrilh a che u, zawlnei tumah mahni khaw lama miin an lawm ngai lo.

²⁵Chutichuan dik takin ka ti a che u, Elija dam laia kum thum leh thla ruk van a pin a, khawvela tam nasa tak a lo tlak khan, Israel ramah hmeithai tam tak an awm a;

²⁶nimahsela an zingah tuma hnenah Elija tirh a ni lo a, Sidon ram lama Sarepta khuaa hmeichhe pakhat hmeithai hnenah chauh tirh a ni zawk kha.

²⁷Tin, zawlnei Elisa dam lai pawh khan Israel ramah phar tam tak an awm a; nimahsela an zingah tumah tihthianghlimin an awm lo a, Naamana, Suria rama mi chauh tihthianghlimin a awm tak zawk kha," a ti a.

²⁸Tin, inkhawmna ina mi zawng zawng chuan chung thu chu an hriat veleh, an lo thinur em em a,

²⁹an tho hlawm a, khua ata chu an nam chhuak a, paih thlak turin an khaw awmna kham kovah chuan an hruai ta a.

³⁰Nimahsela ani chu an karah a kal tlang a, a kal ta zel mai a.

³¹Tin, Galili rama khaw pakhat, Kapernaum-ah chuan a zuk kal ta a. Tin, Chawlhniin mite a zirtir a;

³²tin, thu nei taka a sawi avangin a thu zirtir chu mak an ti hle a.

³³Tin, inkhawmna inah chuan ramhuai bawlhhlawh thlarau pai mi pakhat a lo awm a; ani chu aw ring takin

³⁴A! Nazaret Isu, keini leh nang eng nge kan inzawlna awm? min tiboral turin i lo kal em ni? Nang ka hria a che, Pathian Mi Thianghlim i ni e," tiin a au chhuak a.

³⁵Tin, Isua'n a hau a, "Ngawi la, a chhung ata lo chhuak rawh," a ti a. Tin, ramhuai chuan a laiah a titlu zet a, tina loin a chhung ata chu a lo chhuak ta a.

³⁶Tin, an zain mak an ti hle a, "Hei hi eng thu nge ni le? Thu nei tak leh thiltithei takin ramhuai bawlhhlawhte thu a pe a, an chhuah hi," tiin an inbia a.

³⁷Tin, chu mi vel ram khaw tinah a chanchin a thang ta a.

³⁸Tin, a tho a, inkhawmna in ata chu a chhuak a, Simona inah a lut ta a. Tin, Simona nupuia nu chu nasa takin a khua a lo sik a, tichuan a tan an lo ngensak a.

³⁹Tin, a kiangah a ding a, khawsik chu a hau a, a reh ta a; tin, a tho ta nghal a, an rawng a bawlsak ta a.

⁴⁰Tin, ni tlak dawn laiin natna hrang hranga na, dam lo nei apiangin a hnenah an rawn hruai a; tin, an zaa chungah chuan a kut a nghat theuh a, a tidam ta zel a.

⁴¹Tin, ramhuaite pawh, "Pathian Fapa i ni," tia auin mi tam tak kawchhung ata an lo chhuak a. Tin, anmahni a hau a, Krista a ni tih an hriat avangin an tawng a phal lo.

⁴²Tin, khawvar veleh a chhuak a, thlaler hmunah a kal a, tin, mipuite chuan an zawng a, a hnenah an lo kal a, anmahni a kalsan lohna'n chelh an tum a.

⁴³Nimahsela ani chuan an hnenah, "Khaw dangate pawh Pathian ram Chanchin Tha ka hril tur a ni, chu mi avang chuan tirh ka ni si a," a ti a.Tichuan Galili rama inkhawmna inahte thu a hril a.

⁴⁴Tichuan Galili rama inkhawmna inahte thu a hril a.