Read Baibul, Mizo Luka 5 Bible Online

Luka 5 - Baibul, Mizo bible

Luka 5

¹Tin, heti hi a ni a, mipuiin Pathian thu an ngaihthlak a, amah an bawr huai huai laiin, ani chu Gennesaret dil kamah chuan a ding a;

²tin, dil kamah chuan lawng pahnih awm a hmu a, nimahsela sangha mantute chu an chhuak a, an lente an su a.

³Tichuan lawng pakhat Simona ta zawkah chuan a chuang a, a hnenah vaukam ata tlema tawlh luh deuh a dil a. Tin, a thu a, lawng atang chuan mipuite chu a zirtir ta a.

⁴Tin, thusawi a ban chuan Simona hnenah, "Li thuk lam pan la, sangha man turin in lente deng rawh," a ti a.

⁵Tin, Simonan a hnenah, "Zirtirtu, rim takin zankhuain kan bei a, engmah kan man lo a, nimahsela i thuin lente ka deng leh ang e," a ti a, a chhang a.

⁶Tin, an han den chuan sangha tam tak an khuh a, an lente chu a chat pheuh pheuh a.

⁷Tin, lawng danga an pawlpui awmte chu anmahni rawn pui turin kutin an hui a. Tin, an lo kal a, lawng pahnih chu pil lek lek khawpin an chhung khat ve ve a.

⁸Tin, Simon Petera'n chu chu a hmuh chuan Isua khup kiangah a bawkkhup a, "Lalpa, mi kalsan rawh, mi sual ka nih hi," a ti a.

⁹An sangha man chu ani leh a thianten mak an ti hle si a.

¹⁰Simona pawl vek Zebedaia fapa Jakoba leh Johana pawhin mak an ti hle bawk a. Tin,Isua'n Simona hnenah, "Hlau suh, tun hnuah zawng mihring i man tawh ang," a ti a.

¹¹Tin, an lawngte chu vaukamah an hruai kai a, engkim kalsanin amah chu an zui ta a.

¹²Tin, heti hi a ni a, khaw pakhata a awm laiin ngai teh, mi pakhat phar bawm hi a awm a, ani chuan Isua a lo hmu a, lei siin a bawkkhup a, "Lalpa, i duh chuan mi tithianghlim thei e," a ti a, a ngen chiam a.

¹³Tin, ani chuan a han ban a, a dek a, "Ka duh e, lo thianghlim tawh ang che," a ti a. Tin, chawplehchilhin a phar chu a lo reh ta nghal a.

¹⁴Tin, a hnenah, "Tumah hrilh suh, amaherawhchu puithiam va inentir la, i inthen nan Mosia ruat angin hlan rawh, mite hriattirna turin," a ti tlat a.

¹⁵Nimahsela a chanchin thu chu a thang lehzual sauh a; mipui tam tak a thu hriat duh leh an nate tihdam duhin an rawn inkhawm chiam a.

¹⁶Nimahsela ani chu thlalerahte a kal hrang a, a tawngtai thin a.

¹⁷Tin, heti hi a ni a, chung lai chuan ni khat chu a zirtir a. Tin, a kiangah Pharisaite leh dan zirtirtute thuin an awm a, chungte chu Galili leh Judai ram khaw tin atang leh Jerusalem khua atanga lo chhuak an ni a; tin, mi tihdam nan Lalpa thiltihtheihna chu a hnenah a awm.

¹⁸Tin, ngai teh, khum chawpin zeng pakhat an rawn zawn a; a hmaa dah turin zawn luh an tum a.

¹⁹Tin, mipui avang chuan zawn luhna reng an hmu lo a, in chungah an lawn chho a, in chung atang in a lai takah, Isua hmaah, a khum chawpin an puh thlaktir a.

²⁰Tin, an rinzia chu a lo hmuhin a hnenah chuan, "Mihring, i sualte ngaihdam a ni tawh e," a ti a.

²¹Tin, lehkhaziaktute leh Pharisaite chuan, "Pathian sawichhia hi tu nge maw a nih le? Pathian chauh lo chuan tuin nge sualte ngaidam thei ni?" tiin an ngaihtuah a.

²²Chutichuan Isua'n an ngaihtuah chu a hria a, an hnenah chuan, "In thinlungah eng nge in ngaihtuah?

²³'I sualte ngaihdam a ni tawh,' tih leh 'Tho la, kein kal tawh rawh,' tih hi a eng nge sawi awl zawk ni?

²⁴Engpawh ni se la, khawvelah Mihring Fapa hian sual ngaihdam theihna a nei tih in hriatna'n," a ti a, (zeng hnenah chuan) "Tho la, i khum la la, i inah kal rawh; ka ti a che," a ti a.

²⁵Tichuan an mithmuhah a tho ta nghal a, a mutna chu a la a, Pathian fak chung zelin a inah a haw ta a.

²⁶Tin, an zain mak an ti hle a, Pathian an fak a, "Vawiinah chuan thil mak tak kan hmu a ni," an ti a, an hlau ta em em a.

²⁷Tin, chung zawhah chuan a chhuak a, chhiah chawina hmuna thu, chhiahkhawntu pakhat a hming Levia a hmu a; tin, a hnenah, "Mi rawn zui rawh," a ti a.

²⁸Tichuan engkim a kalsan a, a tho a, a zui ta a.

²⁹Tin, Levia chuan a inah Isua tan ruai ropui tak a theh a; tichuan chhiahkhawntute, mi dangte nen, mi tam takin anmahni an kilpui hlawm a.

³⁰Tin, Pharisaite, an lehkhaziaktute nen chuan a zirtirte chungah an phunnawi a, "Engati nge chhiahkhawntute leh mi sualte hnena in ei a, in in le?" an ti a.

³¹Tin, Isua'n an hnenah, "Mi hriselte chuan daktawr an ngi lo a, mi bawrhsawmte zawkin an ngai a ni.

³²Mi fel takte lam tura lo kal ka ni lo a, mi sualte lama simtir tura lo kal ka ni zawk," a ti a, a chhang a.

³³Tin, anni'n a hnenah, "Johana zirtirten chaw an nghei fo a, an tawngtai thin; Pharisai zirtirte pawhin chutiang bawkin an ti thin; nimahsela i zirtirte hian an eiin an in thin," an ti a.

³⁴Isua'n an hnenah, "Mo hruaitute hnena a pasal tur chu a awm chhung zawng mo hruaitute chu in ngheitir thei thin em ni?

³⁵nimahsela a pasal tur chu an hnen ata hruai bo nite a la thleng ang a, chu mi niah erawh chuan an la nghei ang," a ti a.

³⁶Tin, an hnenah tehkhin thu pawh a sawi a:"Tuma'n puan thar pawt thlain puan hlui an bel ngai lo, bel ang se la, a thar chu an titet ang a, a thar them leh a hlui chu a inpawl bawk hek lo ang.

³⁷Tin, tuma'n uain thar savun uain peng hluiahte an thun ngai lo, thun ang se la, uain thar chuan savun pengte chu a tawn puak ang a, a bua ang a, savun pengte pawh chu a lo chhia ang.

³⁸Uain thar chu savun uain peng tharahte an thun zawk tur a ni.Tin, tuma'n uain rei in zawhin a thar an duh ngai lo; 'A rei a tha zawk,' an ti si a," a ti a.

³⁹Tin, tuma'n uain rei in zawhin a thar an duh ngai lo; 'A rei a tha zawk,' an ti si a," a ti a.