Read Baibul, Mizo Luka 6 Bible Online

Luka 6 - Baibul, Mizo bible

Luka 6

¹Tin, heti hi a ni a, Chawlhni vawi khat chu, buh hmunahte a kal tlang a; a zirtirte chuan buh vuite chu an thliak a, an kutphahin an nuai fai a, an ei a.

²Tin, Pharisai tute emaw chuan, "Engati nge Chawlhnia tih thiang lo chu in tih ni?" an ti a.

³Tin, Isua'n a chhang a, "Davida a riltam laia a thiante nena an thiltih kha, khang angte pawh kha in chhiar lo em ni?

⁴Khatia Pathian ina a luh a, puithiamte chauh lo chuan ei thian loh chhangdah chu a lak a, a ei a, a thiante hnena a pek ve thu kha," a ti a.

⁵Tin, amah vekin an hnenah chuan, "Mihring Fapa hi Chawlhni Lal a ni," a ti a.

⁶Tin,heti hi a ni a, Chawlhni dangah chuan inkhawmna inah a lut a, a zirtir a; tin, chutah chuan mi pakhat kut ding lam zeng a lo awm a.

⁷Tin, lehkhaziaktute leh Pharisaite chuan a hekna tur an hmuh theihna'n, Chawlhniin a tih dam dawn leh dawn loh an mit mei a.

⁸Nimahsela ani'n an rilru chu a hria a, kut zeng hnenah chuan, "Tho la, a laiah ding chhuak rawh," a ti a. Tin, a tho a, a ding chhuak ta a.

⁹Tin, Isua'n an hnenah, "Chawlhniah hian tihthat nge thiang, tihchhiat? chhandam nge thiang, tihhlum? Ka zawt a che u," a ti a.

¹⁰Tin, an za chuan a en vel a, a hnenah, "I kut phar rawh," a ti a. Tin, a phar a, a kut chu a dam ta a.

¹¹Chutichuan an thin tawtin an puak keh lek lek a, Isua chunga an tihzia tur an inrawn ta a.

¹²Tin, heti hi a ni a, chung lai chuan a chhuak a, tawngtai turin tlangah a kal a, Pathian hnenah a tawngtai zankhua a.

¹³Tin, khawvar veleh a zirtirte chu a ko a; an zing ata sawm leh pahnih a thlang a, an hmingah pawh tirhkoh a vuah a:

¹⁴chungte chu Simona (Petera an vuah bawk kha) leh a unau Andria te, Jakoba leh Johana te, Philipa leh Bartholomaia te,

¹⁵Matthaia leh Thoma te, Alphaia fapa Jakoba te, Simona, Zelota an vuah te,

¹⁶Jakoba fapa Juda te, mi vervek Juda Iskariota te an ni.

¹⁷Tin, an rualin a kal chhuk a, hmun zawlah a ding a, a zirtirte mipui tam tak nen, Judai ram zawng zawng ata leh Jerusalem khua ata leh, Tura leh Sidon khaw lama tuifinriat kam ata mi tam tak nen; chungho chu a thu ngai duh leh an nate intihdam duhin an lo kal a ni;

¹⁸Tichuan ramhuai bawlhhlawh sawisakte pawh an lo dam ta a.

¹⁹Tin, a hnen ata thiltihtheihna a chhuak a, mi tin a tihdam avangin mipui zawng zawng chuan amah deh an tum a.

²⁰Tin, a dak chhuak a, a zirtirte chu a en a. "Nangni rethei te u, in eng a thawl e; Pathian ram in ta a ni si a.

²¹Nangni tuna riltamte u, in eng a thawl e; in la tlai dawn si a, "Nangni tuna tapte u, in eng a thawl e; in la nui dawn si a.

²²Mihring Fapa avanga miten an huat che u a, an tuithlara an hau che u a, in hming a tha lo tiin an paih bo der hunah in eng a la thawl ang.

²³Chu mi niah chuan lawm u lang, hlimin zuang rawh u; ngai teh u, vanah in lawman a awm hnem si a; chutiang bawkin an thlahtuten zawlneite chunga an tih thin kha.

²⁴Amaherawhchu nangni mi hausate u, in chung a pik e; in thlamuanna in hmu tawh si a.

²⁵Nangni tuna tlaipuarte u, in chung a pik e; in ril a la tam dawn si a. "Nangni tuna nuite u, in chung a pik e; lungngaiin in la tap dawn si a.

²⁶Mi zawng zawngin an fak hunah che u in chung a la pik ang, chutiang bawkin an thlahtuten zawlnei derte chunga an tih kha.

²⁷Ka thu ngaitute u, ka hrilh a che u, In hmelmate chu hmangaih u la, a hua che u chu an thatna tur ti u la,

²⁸anchhe lawhtu che u chu malsawmsak u la, a sawisatu che u chu tawngtaisak rawh u.

²⁹Biang lehlama bengtu che chu lehlam pawh dawh rawh; tin i puan laksaktua hnenah chuan i kawr lak pawh hnial suh.

³⁰A diltu apiang che hnenah pe rawh; tin, i sum laksaktu che hnenah chuan dil leh tawh suh.

³¹Tin, miin in chunga an tiha in duh tur ang zelin mi chungah pawh ti ve rawh u.

³²Tin, in hmangaitute chauh in hmangaih hian, lawm eng nge in hlawh ang? mi sualte pawhin an hmangaitute chu an hmangaih thin a sin.

³³Tin, in chunga thate chungah chauh in that hian, lawm eng nge in hlawh ang? mi sualte pawhin chutiang bawkin an ti thin a sin.

³⁴\ Tin, hmuh leh beiseina hnen chauha thil in puktir hian, lawm eng nge in hlawh ang? mi sualte pawhin a ngai veka hmu leh turin mi sualte hnenah an puktir thin,

³⁵Amaherawhchu in hmelmate hmangaih u la, an thatna tur ti u la, puktir rawh u, beidawng hauh loin; tichuan in lawmman a tam ang a, Chungnungbera fate in ni bawk ang; ani chuan mi lawm nachang hre lote leh mi sualte a khawngaih thin.

³⁶In Pain mi a khawngaih angin mi khawngaih ve rawh u.

³⁷Sawisel suh u, chutichuan sawiselin in awm loing; tumah thiam loah ruat suh u, chutichuan thiam lohin in awm lo ang; ngaidam rawh u, chutichuan ngaihdamin in awm ang;

³⁸pe rawh u, chutichuan pekin in awm ang, thahnemngai taka the a, beng muk a, sawi muk a, liam zawih zawihin, inmal chungah an pe ang che u. In tehna ngai bawkin an tehsak leh dawn si che u a," a ti a.

³⁹Tin, an hnenah tehkhin thu a sawi a, "Mitdelin mitdel vek a hruai thei ang em? an pahnihin khuarkhurumah an tla dun lo ang em?

⁴⁰Zirtir chu a zirtirtu chungah a awm lo; nimahsela mi tin an zir zawhin an zirtirtu angin an awm ang.

⁴¹Tin, engati nge mahni mita khanchhuk awm chu ngaihtuah si loin, i unau mita hmawlh te tak te awm chu i hmuh ni?

⁴²Mahni mita khanchhuk awm chu hmu si loin, i unau hnenah, 'Unau, i mita hmawlh te takte awm kha mi lak chhuahtir rawh,' engtin nge i tih theih le? Mi vervek! I mit ata khanchhuk kha la chhuak hmasa rawh, chutichuan i unau mit ata hmawlh te tak te lak chhuah tur chu fiah takin i hmu ang.

⁴³Thing tha reng reng rah chhiaa rah a awm lo; thing chhia lah rah thaa rah a awm hek lo.

⁴⁴Thing tin anmahni rah theuhvah a hriat a ni. Miin hruihlingnei kungah theipui an lo ngai lo, nghardai kungah grep rah an lo ngai bawk hek lo.

⁴⁵Mi tha chuan a thinlung ro bawm tha ata thil thate a theh chhuak thin a; mi sual chuan a thinlung ro bawm chhia ata thil chhiate a theh chhuak thin; a thinlunga khat liam chu a kain a sawi thin a ni si a.

⁴⁶Tin, nangni'n eng atan nge, ka thu zawm si lo a, 'Lalpa, Lalpa,' mi tih thin?

⁴⁷Mi tin ka hnena lo kal a, ka thu hriaa zawm apiang chu tu ang nge an nih ka hriattir ang che u:

⁴⁸In satu, thuk taka lai a, lungpui chunga lungphum rema ang chu an ni; tin, tui a lo lenin, tuizangkhauhin chu mi in chu a khawh a, a tinghing thei lo a, a sak ngun avangin.Amaherawhchu hriaa zawm lo chu, lung phum lo a, lei chung maia in satu ang chu a ni; tin, tuizangkhauhin chu chu a khawh a, a chim ta nghal a; chu mi in sawp chu nasa tak a ni," a ti a.

⁴⁹Amaherawhchu hriaa zawm lo chu, lung phum lo a, lei chung maia in satu ang chu a ni; tin, tuizangkhauhin chu chu a khawh a, a chim ta nghal a; chu mi in sawp chu nasa tak a ni," a ti a.