Read Baibul, Mizo Luka 7 Bible Online

Luka 7 - Baibul, Mizo bible

Luka 7

¹Tin, mite beng hriata a thu zawng zawng a sawi zawhin Kapernaum khuaah a lut a.

²Tin, sipai za hotu tu emaw a bawih duh tak a dam lo a, a thi lek lek a.

³Tichuan, Isua chanchin a hriat veleh a bawih rawn tidam tura ngen chiam turin a hnenah Judaho upate a tir a.

⁴Tin, anni chu Isua hnenah an va thleng a, thahnemngai takin an ngen chiam a, "Ani hi hei hi i tihsak tlak a ni e;

⁵kan hnamte a hmangaih a, kan inkhawmna in pawh aman min saksak a ni," an ti a.

⁶Tichuan Isua chu an hnenah a kal ta a. Tin, in a thlen dawn dawnin, sipai za hotu chuan a hnenah a thiante a tir a, "Lalpa, lo kal harsa suh, ka in chhung i luhna tlak a ni lo e;

⁷chuvangin i hnena lo kal tlak pawh niin ka inring lo a; thu chauh sawi la, ka naupang a dam mai ang.

⁸Kei pawh mi thua awm ka ni a, ka hnuaiah sipaite an awm a; chu mi kha mi chu, 'Kal rawh,' ka tih leh, a kal thin; mi dang hnenah pawh, 'Lo haw rawh,' ka tih leh, a lo haw thin; ka bawih hnenah pawh, 'Hei hi ti rawh,' ka tih leh, a ti thin," a ti a.

⁹Tin, Isua'n chung thu chu a hriatin amah chu mak a ti hle a, a hawi a, mipui a zuitute hnenah chuan, "Ka hrilh a che u, Israelte zingah pawh heti ema rinna nasa hi ka hmu lo," a ti a.

¹⁰Tin, a mi tirhte chu inah an haw leh a, bawih chu damin an hmu ta a.

¹¹Tin, rei lo tean khaw pakhat Nain an tihah chuan a kal a; a zirtirte leh mipui tam tak a hnenah an kal ve a.

¹²Tin, kulh kawngkhar kianga a thlenin, ngai teh, mitthi an rawnzawn chhuak a, a nu fapa neih chhun a ni a, a nu chu hmeithai a ni si a; an khuate tam tak chu a hnenah an awm a.

¹³Tin, Lalpa chuan hmeithai chu a hmuh veleh, a khawngaih em em a, "Tap suh," a ti a.

¹⁴Tin, a va hnaih a, hlang chu a khawih a; tichuan a zawntute chu an ding ta a. Tin, "Rawlthar, Tho rawh, ka ti a che," a ti a.

¹⁵Tin, mitthi chu a thu chhuak a, a lo tawng ta a. Tin, Isua chuan a nu hnenah a pe ta a.

¹⁶Tin, mi zawng zawngin an hlau a, Pathian an fak a, "Kan zingah zawlnei ropui tak a lo awm ta a ni," an ti a, "Pathianin a mite a rawn tlawh ta a ni," an ti bawk a.

¹⁷Tin, chu mi chungchang thu chu Judai ram zawng zawngah leh a kiang vel ram tinah a thang chhuak ta a.

¹⁸Tin, Johana zirtirte chuan chung thu zawng zawng chu Johana an hrilh a.

¹⁹Tichuan Johanan a zirtirte pahnih a ko a, Lalpa hnenah chuan a tir a, "Lo kal tura chu i ni nge, mi dang kan la ngai ang?" tiin.

²⁰Tin, mite chu a hnenah an lo thlen chuan, "Baptistu Johanan, 'Lo kal tura chu i ni nge, mi dang kan la ngai ang?' tiin i hnenah min tir a ni," an ti a.

²¹Tin, chung lai tak chuan Isua'n nate, hripui veite, ramhuai mante tam tak a tidam a, mitdel tam takte pawh an mit a tivar a.

²²Tin, an hnenah, "Kal leh ta u lang, thil in hmuh leh in hriat hi Johana va hrilh rawh u; mitdelte an mit a lo var ta, kebaite kein an lo kal ta, pharte an lo thianghlim ta, bengngawngte pawh an beng a lo var ta, mitthite kaihthawhin an awm ta, pachhiaten Chanchin Tha hrilh an dawng ta.

²³Tin, tupawh ka chunga lungnih lohna hmu lo chu an eng a thawl e," a ti a, a chhang a.

²⁴Tin, Johana tirhkohte chu an hawn hnuin Isua'n mipui hnenah chuan Johana thu a sawi ta a, "Eng en turin nge thlalera in kal chhuah kha? Luang thli chhem nghin maw?

²⁵A nih loh leh, eng en tur berin nge in kal chhuh kha? Puan nem sin maw? Ngai rawh u, puan ropui sin leh mi nuamsate chu lal inahte a sin an awm.

²⁶A nih loh leh, eng en tur berin nge in kal chhuah kha? Zawlnei maw? A nih ngei kha, ka ti a che u, Zawlnei ai pawha ropui zawk -

²⁷'En teh, ka tirhkoh i hmaan ka tir a ni, Ani chuan i hmaah i kawng a siam ang,' tih, a chanchin an ziaka kha, he mi hi a ni.

²⁸Hmeichhe hrin zingah Johana aia ropui zawk an awm lo; nimahsela Pathian rama mi te deuh pawh ani ai chuan an ropui zawk, ka ti a che u," a ti a.

²⁹Tin, mi zawng zawngin an hriatin, chhiahkhawntute nen, Johana baptisma lo chang tawh an ni a, Pathian an thiam a.

³⁰Pharisaite leh dan hretute erawh chu a hnenah baptisma lo chang tawh an ni ve lo a, anmahni tan Pathianin rem a ruatsak kha an duh lo.

³¹Chutichuan Isua vekin, "Tun lai chhuante hi eng nen nge ka tehkhin ang le? eng ang nge nih pawh an nih?

³²Naupang, dawr hmuna thu a, 'Phenglawng kan tumsak che u a, in lam si lo a; kan tap vak a, in tap si lo a,' tia inauvate ang hi an ni.

³³Baptistu Johana chu a lo kal a, chhang a ei lo a, uain pawh a in lo a, nangni'n 'Ramhuai azawl a nih hi,' in ti a.

³⁴Mihring Fapa a lo kal a, a eiin a in a, nangni'n, 'En teh u, chaw heh mi, uain heh mi, chhiahkhawntute leh mi sulte thian saw!' in ti si a.

³⁵Nimahsela Finna chu a rah atangin a dikzia a lang a ni" a ti a.

³⁶Tin, Pharisaite zinga mi pakhatin a hnena chaw eiah a sawm a. Tin, Pharisai inah chuan a lut a, chaw a kil a.

³⁷Tin, ngai teh, chu mi khuaa hmeichhe sual pakhat awm chuan, Pharisai inah chaw kilin a thu tih a hriat veleh alabasta bawmin hriak rimtui a rawn keng a,

³⁸a hnungah a kephah bulah chuan tap chungin a ding a, a mittuiin a kephah a lo far huh a, a samin a hru a, a kephah chu a fawp ngawih ngawih a, hriak rimtui chuan a chulh a.

³⁹Tin, a sawmtu Pharisai chuan chu chu a hmuh chuan a rilruin, "He mi hi zawlnei a nih chuan a dektu hmeichhia hi tu nge a nih, mi eng ang nge a nih hriat awm tak lah ni, mi sual a ni sia," a ti a.

⁴⁰Tin, Isua'n a hnenah, "Simon, i hnenah thu kam khat sawi tur ka nei," a ti a, a chhang a. Tin, ani chuan, "Sawi ta che, Zirtirtu," a ti a.

⁴¹Tin, Isua'n, "Tangka puktirtu tuin emaw leiba pahnih a nei a; pakhatin duli zanga a ba a, pakhatin sawmnga.

⁴²Tin, rulhna an nei lo a, a ngaihhnathiam ve ve a. Chutichuan chu mite chuan a tuin nge ani chu hmangaih zawk ang?" a ti a.

⁴³Simona chuan, "A ngaihhnathiam zual zawka chuan niin ka ring," a ti a, a chhang a. Tin, ani'n a hnenah, "I ti dik e," a ti a.

⁴⁴Tin, hmeichhe lam chu a hawi a, Simona hnenah chuan, "He hmeichhia hi i hmu em? I inah ka lo lut a, nangin ka kephah silna tur tui mi pe lo a, ani erawh hi chuan a mittuiin ka kephah a tihuh a, a samin a hru a ni.

⁴⁵Nangin fawh reng reng mi fawp lo; ani erawh hi chuan ka lo luh tirh ata ka kephah fawh a bang lo.

⁴⁶Nangin ka lu-ah hriak mi thih lo; ani erawh hi chuan ka kephahah hriak rimtui a chulh.

⁴⁷Chuvangin ka ti a che, A sual tam tak kha ngaihdamin a awm ta; ani pawhin a hmangaih ta em em a nih hi; amaherawhchu ngaihdam tlem chuan, tlemin a hmangaih thin," a ti a.

⁴⁸Tin, hmeichhe hnenah chuan, "I sualte ngaihdam a ni ta," a ti a.

⁴⁹Tin, a chaw kilpuiten, "Sualte pawh ngaidam hi tu nge maw ni le?" an inti a.Tin, ani'n hmeichhe hnenah chuan, "I rinna hi chhandam i nih phah a ni, thlamuang takin kal rawh," a ti a.

⁵⁰Tin, ani'n hmeichhe hnenah chuan, "I rinna hi chhandam i nih phah a ni, thlamuang takin kal rawh," a ti a.