Read Baibul, Mizo Luka 8 Bible Online

Luka 8 - Baibul, Mizo bible

Luka 8

¹Tin, heti hi a ni a, nakin deuhvah chuan Isua'n thu hril leh Pathian ram Chanchin Tha thlen chungin khaw lian leh khaw te te a fang zel a, a hnenah sawm leh pahnihte chu an awm a,

²hmeichhia tute emaw ramhuai zawl dam leh te leh na dam lehte nen. Chung hmeichhiate chu Mari, a kaw chhung ata ramhuai pasarih chhuak Magdalini an tih te,

³Heroda sum enkawltu Chuza nupui Johani te, Susani te, mi dang tam tak te nen an ni; chungte chuan mahni neihin an rawng an bawlsak thin.

⁴Tin, mipui tam tak an rawn inkhawm a, khaw tina mi a hnena an lo kalin, tehkhin thuin thu a sawi a:

⁵Buh chi thehtu a buh chi thehin a feh a; tin, a theh laiin a then kalkawng dungah a tla a, miin an rap a, chungleng savaten an tlan zo ta a.

⁶Tin, a then pialtlep chungah a tla a; tin, a tiah veleh a hnawn loh avangin a rawp ta mai a.

⁷Tin, a then hnimhlingnei zingah a tla a, hnim chuan a to rualpui a, a dip ral ta a.

⁸Tin, a then lei thaah a tla a, a lo to a, a leh zain a rah ta a," a ti a. Tin, chung thu chu a sawi laiin a au a, "Tupawh hriatna tura beng nei chuan hre rawh se," a ti a.

⁹Tin, a zirtirte chuan a hnenah, "He tehkhin thu hi eng tihna nge ni?" tiin an zawt a.

¹⁰Tin, ani chuan, "Pathian ram thurukte chu nangni hriat zawng phal a ni a, mi dang hnenah erawh chuan tehkhin thu chauhin sawi a ni; hmu mah se la, hmu lo an nih theihna'n, bengin hre mah se la, a ngaihna an hriat theih lohna'n.

¹¹Tehkhin thu kha hei hi a ni:Buh chi chu Pathian thu a ni.

¹²Tin, kawng dunga mi chu thu hre tawhte hi an ni; tin, diabola chu a lo kal a, an awih loh a, chhandam an nih theih lohna'n an rilru ata chu a laksak thin.

¹³Tin, pialtlep chunga mi chu he'ng mi hi an ni:an hriat veleh thu chu lawm taka pawmte hi; nimahsela zung reng an nei lo - rei lo te chauh an awih a, thlem hunin an bansan leh thin.

¹⁴Tin, hnimhlingnei zinga tla chu he'ng mi hi an ni; an hriat hnuin an kal a, dam chhung khawsak lungkhamnate, hausaknate, nawmsaknate chuan a dip a, an rah puitling thin lo a ni.

¹⁵Lei thaa mi erawh chu he'ng mi hi an ni:rilru fel leh thain thu an hria a, an vawng reng a, chhel takin an rah thin.

¹⁶Tuma'n khawnvar halin belin an khuh lo, khum hnuaiah pawh an dah lo; a lut apiangin a eng an hmuh theihna'n a dahnaah an dah zawk thin a ni.

¹⁷Puang lo tura zep engmah a awm si lo a, hriat loh tur leh lang lo tura thuhruk engmah a awm hek lo.

¹⁸Chutichuan eng angin nge in hriat fimkhur rawh u; tupawh a nei apiang an pe belhchhah ang a; tupawh a nei lo apiang neia an inruat chhun pawh an laksak ang," a ti a.

¹⁹Tin, a nu leh a unaute chuan Isua lam an rawn pan a, nimahsela mipui avang chuan a kiang an thleng thei si lo.

²⁰Tin, "I nu leh i unaute nangmah hmuh tumin pawnah sawn an ding reng e," tiin an hrilh a.

²¹Tin, ani chuan an hnenah, "Heng Pathian thu hriaa awihte hi ka nu leh ka unaute an ni e," a ti a, a chhang a.

²²Tin, heti hi a ni a, chung lai chuan ni khat chu lawngah a chuang a, a zirtirte nen; tin, an hnenah, "Dil ral lehlamah sawn i kai ang u," a ti a. Tichuan lawng chu an phelh a, an kal ta a.

²³Tin, an kal laiin Isua a lo muhil ta a; tin, dilah chuan thlipui a lo tleh chhuk phut a, an lawng chu tuiin a khat dawn a, hlauhthawnawm takin an awm ta a.

²⁴Tin, a hnenah an va kal a, an kaitho a, "Zirtirtu, zirtirtu, kan boral dawn hi le," an ti a. Tin, ani chu a lo harh a, thli leh tuifawn chu a hau ta a; tin, a bang a, a reh ta mai a.

²⁵Tin, an hnenah, "Khawiah nge in rinna?" a ti a. Tin, an hlau a, mak an ti hle a, "He mi hi tu nge ni le? thli leh tui lam pawh thu a pe a, an awih hi?" an inti hlawm a.

²⁶Tin, Galili ram zawna Gerasin mite ram chu an thleng a.

²⁷Tin, khawmuala a chhuahin, khuaa mi ramhuaiman tuin emaw a rawn tawk a; chu mi chu rei tak puan reng reng sin loin a awm a.inah reng pawh a awm lo a, thlanahte a awm zawk thin a.

²⁸Tin, Isua a hmuh veleh a au a, a hmaah a bawkkhup a, aw ring takin, "Isu, Pathian Chungnungbera Fapa, kei leh nang eng nge kan inzawlna awm? mi nghaisa lul suh ang che, ka ngen a che," a ti a.

²⁹(Isua'n ramhuai bawlhhlawh chu, chu mi kawchhung ata chu chhuak turin thu a lo pe tawh si a. Chu mi chu ramhuai chuan a man fo thin a ni; mitten khaidiat leh kawl an buntir a, an veng reng thin a; nimahsela a phuarnate a tichat a, ramhuaiin thlalerahte a hnawt chhuak thin).

³⁰Tin, Isua'n, "I hming eng nge ni?" tiin a zawt a. Tin, ani chuan, "Nuaia," a ti a, (a kawchhunga ramhuai tam tak an luh avangin).

³¹Tin, leilawta kal thu an hnena pe lo turin Isua hnenah an ngen a.

³²Tin, chutah chuan tlangah vawk rual tam tak an tla a; tin, a hnenah vawk kawchhungahte luh theihna thu an ngen a. Tin, ani chuan thu a pe a.

³³Tin, ramhuaite chu mi kawchhung ata an chhuak a, vawk kawchhungahte an lut a; tin, vawk rual chu khamah an tlan chhuk chiam a, dilah an tlan lut a, tui hakin an thi ta a.

³⁴Tin, a vulhtute chuan chu thil awmzia chu an hmu a, an tlan a, khuaah leh lovahte chuan an sawi a.

³⁵Tin, "Engnge lo ni ta?" ti a, en turin an chhuak hlawm a; tin, Isua hnen an lo thleng a, ramhuai chhuahsan hnua chu puan sina rilru pangngai puin, Isua ke bula thu an rawn hmu a; tichuan an hlau ta a.

³⁶Tin, a hretute chuan ramhuai man a tihdamzia thu chu chungho chu an lo hrilh a.

³⁷Tin, a vel Gerasin mite rama mi zawng zawng chuan an hlauh em em avangin, ani chu an hnen ata kal bo turin an ngen a; tin, lawngah a chuang a, a kir leh ta a.

³⁸Tin, ramhuai chhuahsan hnua erawh kha chuan Isua hnena awm reng a ngen a.

³⁹Nimahsela Isua'n, "I inah haw la, Pathianin i tan thil a tihsak che hi a ropuizia va hrilh rawh," tiin a kaltir ta a. Tichuan a kal a, khawpui chhung zawng zawngah chuan Isua'n a tan thil a tihsak ropuizia chu a tlangaupui a.

⁴⁰Tin, Isua a lo kir leh chuan mipuiin amah an lawm a; amah lo nghak reng an ni hlawm si a.

⁴¹Tin, ngai teh, mi pakhat a hming Jaira, inkhawmna in hotu chu a lo kal a, Isua ke bulah a bawkkhup a, a ina kalah a ngen a,

⁴²fanu mal kum sawm leh kum hnih emaw lai tur a nei a, chu mi chu thi chhawnga a lum reng avangin. Tin, Isua a kal laiin mipuihoin an nek huai huai a.

⁴³Tin, hmeichhe pakhat kum sawm leh kum hnih thi putin a dam lo a, a sum neih zawng zawng chu daktawrte lakah a dek ral zo tawh a, tumahin an tidam thei tawh si lo a;

⁴⁴chu mi chu a hnungah a lo kal a, a puan hmawr a dek a; chawplehchilhin a thi put chu a lo reh ta nghal a.

⁴⁵Tin, Isua'n, "Mi dek kha tu nge ni?" a ti a. Tin, "Kei chu ka ni lo," an ti theuh a, Petera leh a thianten, "Zirtirtu, mipui hoin an nek huai huai chia, an chil huai huai che alawm," an ti a.

⁴⁶Nimahsela Isua'n, "Tuin emaw zawng mi dek a ni, thiltihtheihna ka chhung ata a chhuak tih ka hre nghe nghe a sin," a ti a.

⁴⁷Tin, hmeichhia chuan a inthup theih loh a hria a, khur chungin a lo kal a, a hmaah a bawkkhup a, a deh chhan leh chawplehchilha a dam tak nghalzia chu mi zawng zawng hmuhah chuan a sawi ta a.

⁴⁸Tin, ani chuan a hnenah, "Ka fanu, i rinna i dampui a ni e, thlamuang takin kal rawh," a ti a.

⁴⁹A la tawng lai mekin inkhawmna in hotu in ata chu mi pakhat a lo kal a, "I fanu a thi ta, zirtirtu hi tihah duh suh," a ti a.

⁵⁰Isua erawh chuan chu thu chu a hriat chuan, "Hlau suh, ring mai rawh, chutichuan a dam leh ang," a ti a, a chhang a.

⁵¹Tin, in chu a va thlen chuan Petera te, Johana te, Jakoba te, naupang nu leh pate chauh loh chu tumah luh ve a phal lo.

⁵²Tin, an zain an lo tap tuar tuar a, an awm an chum an chum a; chutichuan ani chuan, "Tap suh u, a thi lo e, a muhil a ni zawk," a ti a.

⁵³Tin, a thi tawhin an hre reng si a, an nuihsan ta mai a.

⁵⁴Isua erawh chuan a kut a chelh a. "Chemte, tho rawh," a ti a, a ko a.

⁵⁵Tin, a thlarau chu a lo kir leh a, a tho ta nghal a; tin, englo ei tur pek thu a pe a.Tin, a nu leh a pa chuan mak an ti hle a; nimhsela ani chuan a thiltih chu tumah hrilh lo turin a ti tlat a.

⁵⁶Tin, a nu leh a pa chuan mak an ti hle a; nimhsela ani chuan a thiltih chu tumah hrilh lo turin a ti tlat a.