Read Baibul, Mizo Luka 9 Bible Online

Luka 9 - Baibul, Mizo bible

Luka 9

¹Tin, Isua'n sawm leh pahnihte chu a ko khawm a, ramhuai zawng zawng chunga thiltihtheihna leh thuneihna leh nate tihdam theihna a pe a.

²Tichuan Pathian ram thu hril tur leh damlote tidamturin a tir chhuak ta a.

³Tin, an hnenah, "Zinna atan tiangte emaw, ipte emaw, chhang emaw, tangka emaw engmah keng suh u; kawr pahnih pawh nei suh u.

⁴Tin, in thlenna in apiangah thleng reng zel ang che u.

⁵Tin, a lawm lo apiang che u chu chu mi khua ata in chhuah hun chuan anmahni hriattirna turin inkephaha vaivut chu thing thla ang che u," a ti a.

⁶Tichuan an kal ta a, khua an fang zel a, ram tinah Chanchin Tha an hril a, mi an tidam zel a.

⁷Tin, lal Herodan a thiltih zawng zawng chu a lo hre ta a; thenkhatin, "Johana kha a nung leh ta a nih hi," an tih a,

⁸thenkhatin, "Elija a lo inlar ta a nih hi," an tih avangin a mangang ta a.

⁹Tin, Herodan, "Johana chu a lu ka tan tawh kha; nimahsela heti kauva a thu ka hriat thina hi tu nge ni?" a ti a. Tin, amah chu hmuh a tum ta a.

¹⁰Tin, tirhkohte chu an lo hawn lehin, a hnenah an thiltihte an hrilh a. Tin, ani chu anmahni hruaiin Bethsaida khua an tihah chuan a kal hrang ta a.

¹¹Nimahsela mipuiho chuan an hria a, an zui zel a; tin, ani chuan anni chu a lo lawm a, Pathian ram thu a hrilh a, tihdam ngai apiang a tidam a.

¹²Tin, khua chu a lo tlai dawn ta a; tin, sawm leh pahnihte chu an lo kal a, a hnenah, "Kan kiang vel khuaahte leh loahte kalin, thlen in leh ei tur an hmuh theihna turin mipui hi kaltir ta che; hei thlaler hmuna awm kan ni si a," an ti a.

¹³Ani erawh chuan anhnenah, "Nangmahni'n ei tur pe rawh u," a ti a. Tin, anni chuan, "Heng mi zawng zawng tan hian ei tur kan va leisak loh chuan, chhangper panga leh sangha pahnih chauh lo chu engmah kan nei lo," an ti a.

¹⁴(Patling hlir pawh sangnga emaw lai an ni si a.) Tin, a zirtirte hnenah, "Apawl pawlin thuttir rawh u, sawmnga lai zelin," a ti a.

¹⁵Chutiangin an ti a, an thuttir ta vek a.

¹⁶Tin, chhangper panga leh sangha pahnih chu a la a, van lam enin mal a sawm a, a phel a, mipui hmaa hlui turin a zirtirte hnenah chuan a pe a.

¹⁷Tin, an ei a, an puar ta vek a; tin, an ei bang nawite chu bawmrang sawm leh pahnih an rut khat a.

¹⁸Tin, heti hi a ni a, Isua'n amah chauha a tawngtai laiin a zirtirte chu a hnenah a awm a; an hnenah, "Mipuiten tu nge a ni mi tih?" tiin a zawt a.

¹⁹Tin, anni chuan, " 'Baptistu Johana a ni,' an ti chia; nimahsela thenkhat erawh chuan, 'Elija a ni,' an ti chia; thenkhatin, 'Hman lai zawlnei tua emaw a tho leh ta a ni,' an ti che," tiin an chhang a.

²⁰Tin, ani chuan an hnenah, "A nih leh, nangni'n tu nge a ni mi tih?" a ti a. Tin, Petera'n, "Pathian Krista chu," tiin a chhang a.

²¹Tin, chu mi thu chu tumah hrilh loh tur ti tlatin thu a pe a;

²²Mihring Fapa hian thil tam tak a tuar tur a ni a, upate, puithiam lalte, lehkhaziaktute duh lohin a awm tur a ni a, thahin a awm tur a ni a, ni thum niah kaihthawhin a awm bawk tur a ni," a ti a.

²³Tin, amah vekin, mi zawng zawng hnenah, "Tupawhin mi zui a duh chuan mahni hrehawm pawisa loin, ni tin a kraws puin mi zui rawh se.

²⁴Tupawh a nun humhim duh apiangin a chan ang a; tupawh keimah avanga a nun chan apiangin, chu mi ngei chuan a humhim ang.

²⁵Miin khawvel hi a pumin nei se la, intiboralin emaw intichhe si se la, a tan eng nge sawt ang?

²⁶Tupawh keimah leh ka thu zahpui apiang, Mihring Fapa hian ama ropuina nen, a Pa ropuina nen, a vantirhkoh thianghlimte ropuina nen a lo kal hunah chuan chu mi chu a rawn zahpui ang.

²⁷Dik takin ka hrilh a che u, heta dingho a thente hi, Pathian ram an hmuh hma loh chuan thihna tem tawp lo tur an awm," a ti a.

²⁸Tin, heti hi a ni a, chung thusawi achin ni riat emaw laiah, Isua'n Petera te, Johana te, Jakoba te chu a hruai a, tawngtai turin tlangah a kal chho a.

²⁹Tin, a tawngtai laiin a hmel awmzia chu a lo danglam a, a silhfente chu a lo var a, mi enkhalh theiin a lo awm ta a.

³⁰Tin, ngai teh, mi pahnih amah nen an inbia a, chu mite chu Mosia leh Elija an ni a;

³¹ropuinaa inthuamin an inlar a, Jerusalem khuaa a thih tleitlakna tur thu an sawi a.

³²Petera leh a thiante erawh chu an muthlu a; tin, an harh veleh a ropuizia leh a hnena mi pahnih ding chu an hmu ta a.

³³Tin, heti hi a ni a, chu mite chuan Isua an then dawn laiin, Petera'n Isua hnenah, "Zirtirtu, kan tan heta awm hi a tha e; bawkte pathum kan khawh ang e, i tan pakhat, Mosia tan pakhat, Elija tan pakhat," a ti a - a thusawi pawh hre loin.

³⁴Tin, chung thu chu a sawi laiin chhum a lo zing a, anmahni a hliah ta a; chhumah chuan an luh laiin an hlau a.

³⁵Tin, chhumah chuan aw a lo chhuak a, "Hei hi ka Fapa, ka thlana chu a ni, ama thu ngai rawh u," a ti a.

³⁶Tin, aw chu a reh veleh Isua chu amah chauhin an hmu ta a. Tin, an ngawi reng a, chung lai vel chuan an thil hmuh chu tumah engmah an hrilh lo.

³⁷Tin, heti hi a ni a, atukah tlang ata chu an chhuk hnu chuan mipui tam takin amah chu an lo hmuak a.

³⁸Tin, ngai teh, mipui zingah chuan mi pakhat a au a, "Zirtirtu, ka fapa en turin ka ngen a che, ka fapa neih chhun a ni si a.

³⁹Ngai teh, ramhuaiin a man thin a, a au chhuak thut thin:tichuan a chilphuante tla khawpin a sawisa thin a, nasa taka tihthitlinin a kalsan tawk thin.

⁴⁰Tin, i zirtirte hnenah hnawt chhuak turin ka ngen a; an thei si lo a," a ti a.

⁴¹Tin, Isua'n, "Thangthar rinna nei loa tihmawhte u, eng chen nge in hnenah ka awm ang a, ka ngaihtheih ang che u? I fapa chu hetah rawn hruai rawh," a ti a, a chhang a.

⁴²Tin, a lo kal laiin ramhuai chuan a titlu vak a, nasa takin a sawisa ta a. Nimahsela Isua'n ramhuai bawlhhlawh chu a hau a, naupang chu a tidam a, a pa hnenah chuan a kaltir leh ta a.

⁴³Tin, mi zawng zawngin Pathian ropuizia chu mak an ti hle a. Chutichuan mi zawng zawng chuan a thiltih zawng zawng chu mak an tih lai chuanin, Isua'n a zirtirte hnenah chuan,

⁴⁴Chung thu chu in bengah lut rawh se:Mihring Fapa hi mihringte kuta mantirin a awm dawn si a," a ti a.

⁴⁵Nimahsela a thusawi chu a ngaihna an hre lo a, an hriat theih lohna'n a inthup a ni, chu mi thusawi chanchin chu amah lah an zawt ngam si lo a.

⁴⁶Tin, "Kan zingah tu nge ropui ber ang?" tiin an lo inhnial a.

⁴⁷Tichuan Isua'n an rilrua an ngaihtuah chu a hria a, naupang te a kai a, a sirah a dintir a,

⁴⁸an hennah, "Tupawh ka hming avanga he naupang te hi lawm apiang chu keimah mi lawm an ni ang; tupawh kei mi lawm apiang chu mi tirtu lawm an ni ang; in zavaia zinga te ber hi a ni, ropui ni," a ti a.

⁴⁹Tin, Johana chuan, "Zirtirtu, tu emaw i hminga ramhuaite hnawt chhuak kan hmu a, kan zuinaah che a tel ve loh avangin ka khap ta a sin le," a ti a, a chhang a.

⁵⁰Isua erawh chuan a hnenah, "Khap tawh suh u, tupawh nangni dodal lo chu in lama tang an ni si a," a ti a.

⁵¹Tin, heti hi a ni a, amah hruai chhoh a hun dawnin, Jerusalem khuaa kal tumin a hawi tlat a,

⁵²a hmaah zualkote a tlantir a; tin, an kal a, amah lo buatsaihsak turin Samari mite khaw khatah an lut a.

⁵³Tin, a mitmei chu Jerusalem khaw lam pana a lan avangin amah an lo lawm lo.

⁵⁴Tichuan a zirtir Jakoba leh Johana chuan chu chu an hriat veleh, "Lalpa, hengho kan vekna'n hian van ata mei ko thla i la rem i ti em?" an ti a.

⁵⁵Ani erawh chu a han hawi a, a kamkhat a.

⁵⁶Tin, khaw dangah an kal ta a.

⁵⁷Tin, kalkawnga an kal laiin tuin emaw a hnenah, "I kalna apiangah ka zui ang che," a ti a.

⁵⁸Tin, Isua'n a hnenah, "Sihalten kua an nei a, chungleng savate pawhin bu an nei a, Mihring Fapa erawh hi chuan a lu nghahna a nei lo," a ti a.

⁵⁹Tin, mi dang hnenah, "Mi zui rawh," a ti a. Nimahsela ani chuan, "Lalpa, ka pa mi vuitir zet rawh," a ti a.

⁶⁰Isua erawh chuan a hnenah, "Mitthiin anmahni mitthi chu vui rawh se; nang chuan Pathian ram thu va hril darh zawk rawh," a ti a.

⁶¹Tin, mi dang pawhin, "Lalpa, ka zui ang che; amaherawhchu ka ina mite tawng thain mi thlahtir zet rawh," a ti a.Tin, Isua'n a hnenah, "Tupawh leilehnaa kut nghata hnung lam en chu, Pathian rama mi ni tlak a ni lo e," a ti a.

⁶²Tin, Isua'n a hnenah, "Tupawh leilehnaa kut nghata hnung lam en chu, Pathian rama mi ni tlak a ni lo e," a ti a.