Read Baibul, Mizo Deuteronomy 19 Bible Online

Deuteronomy 19 - Baibul, Mizo bible

Deuteronomy 19

¹LALPA in Pathianin an ram a pek che u hnam LALPA'n a tihbo a, in luah a, an khuaah te, an inah te in awm hunah chuan,

²LALPA in Pathianin luah tura a pek che u in ramah chuan in tan khaw pathum in ruat tur a ni.

³Tualthat apiang an tlan luhna turin, LALPA'n a luahtir tur che u ram chu hmun thumah in then ang a, in ramrite in siam ang a, kawngte in buatsaih tur a ni.

⁴Tin, tualthatte chuta tlan luta him theite chu hengte hi an ni; miin a thenawm khawveng tun hma lama huatna paw nei lem loa that palh apiangte,

⁵mi a thenawm khawveng nen thing kit tura ram kala thing kit tura a hrei han chek a, hrei fang thlawnin thenawm khawveng chu vawm hlum ta ang te hi, chu mi zinga khaw pakhatah chuan a tlan ang a, a him ang a,

⁶thisen phuba latu chuan a thinur lin laia tualthattu chu a um a, kawng a thui avanga umphakin a va vaw hlum hlauh dah ang e: tun hma lama huatna te lo nei lem lo a ni avangin thi awm a ni si lo.

⁷chuvangin, 'Khaw pathum in tan in ruat tur a ni,' tiin thu ka pe che u a ni.

⁸Tin, LALPA in Pathianin in pi leh pute hnena chhia a lo chham anga in pi leh pute pek a lo tiam ram chu a pek che u a,

⁹LALPA in Pathian chu hmangaih tur leh a kawng zawh fo tura a thupek zawng zawng, tuna thu ka pek che u hi in pawm a, in ram chu a tihzau chuan he mi khaw pathum tiam loin in tan khaw pathum dang in belhchhah leh ang.

¹⁰LALPA'n luah tura a pek che u in ram chhungah chuan pawi khawih lo thisen chhuah a awm loh a, inchunga thisen a awm lohna'n.

¹¹Amaherawhchu miin athenawm khawveng a huat a, a chan a, a beih a, thikhawp hiala a vuak a, chu mi khaw zinga pakhata a tlan chuan,

¹²an khaw upaten mi tir se la, chuta ta chu va hruai se la, tihhlum turin thisen phuba latu kutah hlan rawh se.

¹³In khawngaih tur ani lo a, in tana tha turin Israel ram ata pawi khawih lo thisen chauhna chu in tibo tur a ni.

¹⁴LALPA in Pathianin luah tura a pek che u ram, in luah tur rama a hmaa an lo phun tawh in thenawm ramri chu in sawn tur a ni lo.

¹⁵Mi a khawlohna emaw, a sualna reng reng emaw hretu pakhat chu a tawk lo ang; hretu pahnih ka emaw, hretu pathum ka emaw thuin tihngheh tur a ni.

¹⁶Hretu fel lo takin mi thil ti dik loa a puh chuan,

¹⁷an inkhinnaa an pahnihin LALPA hmaah chu mi huna puithiamte leh roreltute hmaa chuan an ding tur a ni;

¹⁸tin, roreltute chuan ngun takin an dap ang a, tin, ngai teh, thu hretu chu hretu der a nih a, a unau chu dawta puh anih chuan,

¹⁹a unau chunga tih alo tum ang chuan a chungah in ti tur a ni; chutiang chuan inzinga thil tha lo chu intibo tur a ni.

²⁰A la awmhote chuan an hria ang a, an hlau vang a, tun hnuah chutiang thil tha lo reng reng chu in zingah an ti tawh dawn lo nia.In khawngaih tur a ni lo a; nun aiah nun, mit aiah mit, ha aiah ha, kut aiah kut, ke aiah ke a ni ang.

²¹In khawngaih tur a ni lo a; nun aiah nun, mit aiah mit, ha aiah ha, kut aiah kut, ke aiah ke a ni ang.