Read Baibul, Mizo Deuteronomy 20 Bible Online

Deuteronomy 20 - Baibul, Mizo bible

Deuteronomy 20

¹In hmelmate do tura in chhuah a, sakawr te, tawlailir te, mipuite in aia tam inhmuhin, anmahni chu in hlau tur a ni lo. Aigupta ram ata hruai chhuaktu che u LALPA in Pathian chu in hnenah a awm si a.

²Tin, in indo dawn hnaih chuan puithiam chuan mipuite chu va pan se la, bia se la,

³an hnenah, 'Aw Israelte u, hre rawh u khai, tunah chuan in hmelmate in do dawn ta ani a, zam suh u la, tih suh u la, khur hek suh u, anni chu hlau hek suh u;

⁴nangmahni chhandam tura in hmelmate beihsak tur che ua in hnena awm zel chu LALPA in Pathian a ni si a,' ti rawh se.

⁵Tin, hotute chuan mipuite hnenah, 'In thar saa la hlan lo in awm em? A inah haw leh rawh se, indonaah a va thi hlauh vang a, mi dangin an hlan dah ang e.

⁶Tin, grep huan siam a, a ra la chawr lo in awm em? A in lamah hawleh rawh se, indonaah a thi hlauh vang a, midangin an chhawr dah ang e.

⁷Tin, nupui huala la nei lo in awm em? A in lamah haw leh rawh se, indonaah a thi hlauh vang a, midangin an nei dah ang e,' tiin sawi rawh se.

⁸Tin, hotute chuan mipuite hnenah, 'Hlau leh zam im awm em? A in lamah haw rawh se, a unaute thinlung chu a thinlung angin a tuiral ve dah ang e,' lo ti zel rawh se.

⁹Tin, heti hi a ni ang a, hotuten mipuite hnena thu an sawi zaw chuan mipuite hmahruaitu tur sipai hotute an ruat tur a ni.

¹⁰Bei tura khua in va hnaih hun chuan remna thu han sawi phawt u la.

¹¹Tin, heti hi a ni ang a, an lo rem che u a, an lo inpek chuan heti hi a ni ang a, chuta mi awm zawng zawngte chu hnathawka in rawih tur an ni ang a, in rawng an bawl ang.

¹²Tin, an lo remduh loh che u a, an lo do dawn che u chuan in hual ang a;

¹³tin, LALPA in Pathianin in kuta a pek hun che u chuan chuta mipa zawng zawng chu khandaihin in tihlum vek tur a ni:

¹⁴hmeichhia le an fanaute te te te, rante leh khuaa thil awm reng rengte erawh chu chuta rallak thl zawng zawngte nen lam in pualah in la tur a ni; tin, LALPA in Pathian in a pek che u in hmelmate laka rallak thil chu in chen tur a ni.

¹⁵Heng hnamho khuate ni lo, in awmna atanga khaw hla zawng zawngte chu chutiang chuan in ti zel tur a ni.

¹⁶LALPA in Pathianin luah tura a pek che u he'ng hnam khuate erawh hi chu LALPA in Pathianin thu a pek che u angin nung tawh phawt chu engmah in zuah tur ani lo a,

¹⁷Hit mi te, Amor mi te, Kanaan mi te, Periz mi te, Hiv mi te, Jebus mi te chu in tiboral vek tur a ni;

¹⁸an pathiante chunga an tih thin thil tenawm zawng zawngte chu an zirtir lohna tur che uin, chutilochuan LALPA in Pathian chungah thil in tisual dah ang e.

¹⁹Lak tuma in beih a, khua chu rei tak in hual pawhin chunga thingte chu hreipuiin in kit tur a ni lo va in ei atan a ni a, in kit tur a ni lo: thing chu mihring em an niha in hual ni?A rah ei loh mi thing ani tih inhriatte erawh zawng zawng in tichiain in kit ang a, dotu che u khua chu a chhiat hma loh chuan kulhin in hung hnan tur a ni.

²⁰A rah ei loh mi thing ani tih inhriatte erawh zawng zawng in tichiain in kit ang a, dotu che u khua chu a chhiat hma loh chuan kulhin in hung hnan tur a ni.