Read Baibul, Mizo Deuteronomy 22 Bible Online

Deuteronomy 22 - Baibul, Mizo bible

Deuteronomy 22

¹In unaute bawngpa emaw, an beram emaw bo chu in hmuinin ngawihsan mai tur a ni lo a, in unaute inah in hruaihawsak leh ngei tur a ni.

²Tin, in unaute in kiang hnaia awm an nih loh a, a neitu chu in hriat loh emaw ani chuan, in in lamah in hruai haw ang a, in hnenah a awm reng ang a, in unauin a rawn zawn hun hunah in lo pek leh tur a ni.

³An sabengtung pawh chutiang bawk chuan in ti tur ani a, chutiang bawk chuan an silhfente pawh in ti tur ani a, chutiang bawk chuan in unau thil hloh in chhar tawh phawt chu in ti tur ani a, in ngawih bopui tur a ni lo.

⁴In unaute sabengtung emaw, an bawngpa emaw, kawnga tlu in hmuhin in ngawihsan mai tur a ni lo a, in tunthawhpui ngei tur a ni.

⁵Hmeichhiain mipa thuamhnaw an inbel tur ani lo a, mipain hmeiche silhfen an inbel tur ani hek lo; tupawh chutiang ti apiang chu LALPA in Pathian ngaihin mi tenawm an ni.

⁶Kalkawnga thingah emaw, leiah emaw, sava bu a puiin a no emaw, a tui emaw awm, a awp lai in inhmuh chuan a no chu a pui chawpin in la tur ani lo a,

⁷a pui chu chhuah ngei ngei tur ani a, a no erawh chu in la thei ang: chutichuan in tan a tha ang a, in dam rei dawn nia.

⁸In thar in sak chuan chuta mi an tlaka inin chu thisen chhuahna in a nih lohna'n in in chung in hung tur a ni.

⁹Tin, in grep huanah chuan thil chi hni inching tur ani lo; chutilochuanin chi tuh leh in grep huana thil hawng zawng zawng chu LALPA pual ani mai ang.

¹⁰Bawngpa leh sabengtung lei in leh duntir tur a ni lo.

¹¹Sahmul leh la tah pawlh in inbel tur a ni lo.

¹²In intuamna puan chu a tlang pali-ah fem in neihtir tur a ni.

¹³Miin a nupui a neih a, a pawl a, a huat leh si a,

¹⁴He hmeichhia hi ka nei a, ka han pawl a, nula thianghlim a nihna ka hmu lo a,' tia mualpho taka a siam a, a hming a tihchhiat chuan,

¹⁵nula nu leh pa chuan kulh kawngkaah chu mi khaw upate hnenah nula thianghlim a nihna chu an rawn tilang tur a ni a;

¹⁶tin, nula pa chuan upate hnenah, 'He mi hi ka fanu ka neihtir a, a haw leh si a,

¹⁷tin, ngai teh u, I fanu hi nula thianghlim a nihna ka hmu lo e, tiin mualpho takin a siam a, mahse hengte hi ka fanu nula thianghlim a nihna chu ani alawm,' a ti ang a. Tichuan mi khaw upate hmaah chuan puan an phah ang a.

¹⁸Tin, chu khaw upate chuan chu mi chu an hrem ang a;

¹⁹Israel nula thianghlim a tihhmingchhiat avangin tangka sekel za an chawitir ang a; nula pa chu an pe tur a ni, ani chu a nupui ani ang a, a dam chhungin a then thei lo ang.

²⁰Amaherawhchu chu mi thu chu a lo dik a, nula chu nula thianghlim a nihna a lo lan loh chuan

²¹nula chu a pa kawngakah an hruai chhuak ang a, a awmna khuaa mite chuan lungin an deng hlum ang, a pa ina nawhchizuara Israelte zinga thil sual atthlak tak a tih avangin; chutiang chuan in zing ata, chu thil tha lo chu in tibo tur a ni.

²²Miin palsal nei a mutpui an hmuh chuan an pahnih chuan an thi tur a ni, a mutpuitu mipa leh hmeichhia chu; chutiang chuan Israel zing ata, chu thil tha lo chu in tibo tur a ni.

²³Nula thianghlim, mi nupui hual, miin khuaah ahmuh a, a mutpui chuan

²⁴an pahnihin khaw kulh kawngkaah in hruai chhuak ang a, lungin in denghlum tur a ni; hmeichhia chu khuaa awm si a au loh avangin; tin, mipa chu a thenawm nupui a tihhminghliau avangin; chutiang chuan in zing ata, chu thil tha lo chu in tibo tur a ni.

²⁵Amaherawhchu miin ramhnuaiah nula, mi hual a hmuh a, a tihluih a, a mutpui chuan a mutpuitu mipa chauh chu tihhlum tur ani a,

²⁶a nula chu engmah in tih tur a ni lo, nula chungah chuan thihna khawp sual a awm lo; heitang hi chu, mi athenawm beia that ang a ni a;

²⁷ramah a va tawng fu a, mi hual nula chu a au a, chhantu an awm si lo a.

²⁸Miin nula thianghlim hual loh a hmuh a, a man a,a mutpui an hmuh chuan,

²⁹a mutpuitu mipa chuan nula pa chu tangka sekel sawmnag a pe tur ani a, tin, ani chu a nupui a ni ang, a tihhminghliau tawh avangin; a dam chhungin a then thei lo ang.Tuma'n mahni pate nupui mutpuiin an pate an timualpho tur a ni lo.

³⁰Tuma'n mahni pate nupui mutpuiin an pate an timualpho tur a ni lo.