Read Baibul, Mizo Deuteronomy 24 Bible Online

Deuteronomy 24 - Baibul, Mizo bible

Deuteronomy 24

¹Miin nupui a neih a, a chunga thil mawi lo eng emaw a hriat avanga a mit a tlun loh chuan heti hi a ni ang a, inmakna lehkha a ziaksak ang a, a pe ang a, a in ata a chhuahtir tur a ni.

²Tin, a in ata a chhuah hnu chuan mi dang a va nei thei ang.

³Tin, a pasal hnuhnung zawk chuan a huat a, inmakna lehkha a ziaksak a, a pek a, a in ata a chauhtir emaw, a pasal hnuhnung zawk, nupuia neitu chu a thi emaw a nih chuan,

⁴a pasal hmasa, amah kaltirtu khan, tihbawlhhlawh tawh a ni a, a nei leh thei lo vang; LALPA ngaihin thil tenawm a ni: LALPA'n luah tura a pek che u rama chuan sual in luhtir tur a ni lo.

⁵Mi, nupui nei hlim chu sipaiah a kal tur a ni lo a, eng hnathawkah mah phut tur ani lo; a in lamah kum khat chu a duh ang angin a awm ang a, a nupui nen hlim takin an awm tur a ni.

⁶Buh rawtsawmna emaw, a chung lam lung emaw tumah in hrensak tur ani lo, mi nunna hrensak a ni dawn si a.

⁷Tupawh, Israela thlah, a unaute zinga mi ru a, sal deha dek emaw, zuar emaw hriat chhuah an nih chuan, chu rukrupa chu tihhlum tur a ni; chutiang chuan in zing ata, chu thil tha lo chu in tibo tur a ni.

⁸Phar hri chungchang thuah chuan, ngun taka dap chhuak a, puithiam, Levi hote zirtir dan ang zela ti turin fimkhur rawh u; anmahni thu ka pek angin fimkhur takin in ti tur a ni.

⁹Aigupta ram ata in lo chhuahna kawnga LALPA in Pathianin Miriami chunga a tih dan kha hre reng rawh u.

¹⁰Engpawh in thenawm in puktirin a hreng la turin a inah in lut tur a ni lo.

¹¹Pawnah in ding ang a, in puktira chuan hreng chu pawnah a rawn laksak tur che a ni.

¹²Mi rethei ani chuan a hreng chu in mutpui tur a ni lo;

¹³a silhfenah chuan a mut a,a fak theihna'n che u a hreng chu ni tlakah in pe kir leh ngei tur a ni, tichuan LALPA in Pathian ngaihin in tan thil fel a ni ang.

¹⁴In mi rawih, mi rethei leh tlachhamte chu in unau emaw, in ram in awmnaa awm ram dang mi emaw pawh ni se la in hnehchhiah tur ani lo;

¹⁵a thawh ni chuan ahlawh chu in pe tur ani a, niin a tlak hnan tur ani lo; mi rethei ani a, chutah chuan a rilru a dah thin a ni; chutilochuan in chungchang thuah LALPA a au vang a, in tan sual a lo ni da ang e.

¹⁶Fate avangin pate tihhlum tur a ni lo a, pate avangin fate tihhlum tur a ni hek lo; mi tin, mahni sual avang theuha tihhlum tur a ni.

¹⁷Ram dang mite leh pa nei lote ro chu dik lo takin in relsak tur a ni lo a, hmeithai puan chu hrengah in laksak tur ani hek lo;

¹⁸nangni pawh Aigupta ramah khan bawih in ni tawh a, LALPA in Pathianin chuta ta chu a tlan che u a ni tih inhre reng tur a ni; chuvang chuan a ni, he'ng thil hi ti tura thu ka pek che u ni.

¹⁹In loa buh in seng a, buhphal in khawm hmaih chuan in lak leh tur a ni lo, ram dang mi te, pa nei lo te, hmeithaite ta tur a ni; tichuan LALPA in Pathian chuan in kutkawih zawng zawngah mal a sawm dawn che u nia.

²⁰In oliv thing in vuakin a zarte chu in vaw nawn tur a ni lo; ram dang mi te, pa nei lo te, hmeithaite ta tur a ni.

²¹In grep huana mi in lawhin a to in zawng tur ani lo; ram dang mi te, pa nei lo te, hmeithaite ta tur a ni.Tin, Aigupta ramah khan bawih in ni tawh tih in hre reng tur a ni; chuvang chuan a ni, he'ng thil hi ti tura thu ka pek che u ni.

²²Tin, Aigupta ramah khan bawih in ni tawh tih in hre reng tur a ni; chuvang chuan a ni, he'ng thil hi ti tura thu ka pek che u ni.