Read Baibul, Mizo Deuteronomy 25 Bible Online

Deuteronomy 25 - Baibul, Mizo bible

Deuteronomy 25

¹Mi an inkhin chuan, rorelnaah an kal ang a, roreltuten an lo relsak ang a, mi fel chu thiam an chantir ang a, mi sual chu thiam loh an chantir tur a ni;

²tin, heti hi a ni ang a, mi sual chu vuak awm anih chuan, roreltu chuan a muttir ang a, a hmaah a vuaktir tur a ni, a sual dan a zirin vuak zat tur chu thliah a ni ang.

³Vawi sawmli thleng vuak theih ani ang a, chu aia chuang liam chu ni loin; hei aia chuanga a vuak chuan in unaupa chu inmualpho lu dah ang e.

⁴Sebawngpain buha chil laiin a hmui in phuar tur a ni lo.

⁵Unauza awmho se la, fapa nei loin an zinga mi chu thi se la, a thia nupui chuan pawn lama mi, mi dang a nei tur ani lo; a pasal unau chuan a rochung ang a, nupuiah a nei ang a, pasal unau tih tur chu a chungah a ti tur a ni.

⁶Tin, heti hi ani ang a, a fa tir hrinsak chuan Israel zinga a hming a bo lohna'n a unau thi taa hming chu a pu tur a ni.

⁷Tin, ani chuan a unaupa nupui chu neih a duh loh chuan, a unaupa nupui chu kulh kawngkaa upate hnenah a han chho ang a, 'Ka pasala unaupain Israel zingah a unau hming awmtir zel a duh lo a, pasal unaupa tih tur chu ka chungah a ti duh lo,' a han ti tur ani.

⁸Chutichuan an khaw upate chuan ani chu an ko ang a, an bia ang a, tin, ani chuan, 'Ka nei duh lo a ni,' tia a tan tlat chuan

⁹a unaupa nupui chuan upate hmaah a han pan ang a, a pheikhawk a hlihsak ang a, a hmaiah chil a chhak ang a, 'A unaupa chhungkaw din duh lotu chungah chuan heti anga tih ni zel rawh se,'a ti ang a, a chhang tur a ni.

¹⁰Tichuan, 'chhungkaw pheikhawk hlihsak a,' tiin Israelte zingah chuan a hming puttir tur a ni ang.

¹¹Mi insual se la, a pakhat zawka nupui chuan a sualpui lak ata a pasal chhanchhuak turin a zahmawhah pawhsak se la,

¹²a kut chu in tansak tur a ni a, in khawngaih tur a ni lo.

¹³In ipah chuan khin chi dang dang, a rit leh a zang in nei tur a ni lo.

¹⁴In inah tehna chi dang dang, a lian leh a te in kawl tur a ni lo.

¹⁵Khin dik tak leh fel tak in nei tur a ni. Tehna dik tak leh fel tak in nei tur a ni si; tichuan LALPA'n ram a pek che uah hian in dam rei dawn nia.

¹⁶Chutiang thil titu, fel lo taka titu zawng zawngte chu LALPA in Pathian ngaihin tenawm an ni.

¹⁷Aigupta ram ata in lo chhuahna kawnga Amalek-ho lo tih dan che u kha hre reng rawh u;

¹⁸Pathian pawh hlau loin in chauh lai leh in ngui laia kawnga a lo tawh che u a, in zinga hnufual mi chhiathaho a hnufualte zawng a lo beih dan te kha.Chuvangin heti hi a ni ang a, LALPA in Pathianin luah tura ram apek hun che u a, in vela in hmelmate zawng zawng laka LALPA in Pathianin ralmuanna a pek hun che u chuan van hnuai chhina Amalek-ho hriat rengna chu in tibo hlauh tur a ni; in theihnghilh hauh tur ani lo.

¹⁹Chuvangin heti hi a ni ang a, LALPA in Pathianin luah tura ram apek hun che u a, in vela in hmelmate zawng zawng laka LALPA in Pathianin ralmuanna a pek hun che u chuan van hnuai chhina Amalek-ho hriat rengna chu in tibo hlauh tur a ni; in theihnghilh hauh tur ani lo.