Read Baibul, Mizo Deuteronomy 27 Bible Online

Deuteronomy 27 - Baibul, Mizo bible

Deuteronomy 27

¹Tin, Mosia leh Israel upate chuan mipuite chu, "thupek zawng zawng vawiina ka pek che u hi pawm rawh u.

²LALPA in Pathianin ram a pe che ua kal tura Jordan in kan ni chuan heti hi a ni ang a, lung lian tak tak in phun ang a, lung charna in hnaih tur a ni;

³tin, in kai hnuin a chungah chuan he dan thu zawng zawng hi in ziak tur a ni; tichuan LALPA, in pi leh pute Pathianin a lo tiam che u ang khan hnutetui leh khawizu luana ram, LALPA in Pathianin a pek che u ramah chuan in kal thei ang.

⁴Tin, Jordan lui in kan zawh chuan heti hi a ni ang a, vawiina thu ka pek che u ang hian Ebal tlangah lungte chu in pun ang a, lung charna in hnawih tur a ni.

⁵Tin, chutah chuan LALPA in Pathian tan maicham, lung maicham in siam tur ani a, thir hmanrua in hmang tur a ni lo.

⁶LALPA in Pathian maicham chu lung chher loin insiam tur ani a; chu miah chuan LALPA in Pathian tan halral thilhlante in hlan ang a;

⁷remna thilhlantein in inthawi ang a, chutah chuan in ei ang a, LALPA in Pathian hmaah chuan hlim takin in awm tur a ni.

⁸Tin, lung chungahte chuan he dan thu zawng zawng hi fiah takin in ziak tur a ni," tiin thu an pe a.

⁹Tin, Mosia leh puithiam Levi-ho te chuan Israel mi zawng zawngte chu an bia a, "Aw Israel mite u, nguntakin ngaithla rawh u; vawiinah hian LALPA in Pathian mite in lo ni ta a.

¹⁰Chuvangin LALPA in Pathian thu chu in awih tur ani a, vawiina thu ka pek che u, a thupek te leh a dan te chu in zawm tur a ni," tiin.

¹¹Tin, chu mi ni vek chuan Mosia'n mipuite chu thu a pe a,

¹²Jordan lui ral in kai hnu chuan mipuite malsawm atan Gerizim tlangah hengho hi an ding tur a ni: Simeon hnam te, Levi hnam te, Juda hnam te, Isakar hnam te, Josef hnam te, Benjamin hnam te hi;

¹³tin, anchhia atan hengho hi Ebal tlangah an ding tur a ni; Reuben hnam te, Gad hnam te, Aser hnam te, Zebulun hnam te, Dan hnam te, Napthali hnamte hi.

¹⁴Tin, Levi-hote chuan an han sawi tan ang a, Israel mi zawng zawngte hnenah chuan aw ring takin,

¹⁵'Themthiamte kut chhuak LALPA tana tenawm milem din chawp emaw, chhun chawp emaw vawng ru apiang chu anchhe dawngin awm rawh se,' an ti ang a. Tin, mipui zawng zawng chuan, 'Amen,' an lo ti ang a, an lo chhawn tur a ni.

¹⁶'A nu emaw, a pa emaw zah lo apiang chu anchhe dawngin awm rawh se,' an ti ang a. Tin, mipui zawng zawng chuan, 'Amen,' an lo ti ang a, an lo ti tur a ni.

¹⁷'A thenawm ramri sawntu chu anchhe dawngin awm rawh se,' an ti ang a. Tin, mipui zawng zawng chuan, 'Amen,' an lo ti ang a, an lo ti tur a ni.

¹⁸'Kawng ata mitdel kawng loa kaltirtu chu anchhe dawngin awm rawh se,' an ti ang a. Mipui zawng zawng chuan, 'Amen,' an lo ti ang a, an lo ti tur a ni.

¹⁹'Ram dang mi te, pa nei lo te, hmeithai te ro dik lo taka relsaktu chu anchhe dawngin awm rawh se,' an ti ang a. Mipui zawng zawng chuan, 'Amen,' an lo ti ang a, an lo ti tur a ni.

²⁰'A pa nupui mutpuitu chu anchhe dawngin awm rawh se, a pa timualpho a nih avangin,' an ti ang a. Mipui zawng zawng chuan, 'Amen,' an lo ti ang a, an lo ti tur a ni.

²¹'Ran engpawh pawltu chu anchhe dawngin awm rawh se,' an ti ang a, Mipui zawng zawng chuan, 'Amen,' an lo ti ang a, an lo ti tur a ni.

²²'A farnu, a pa fanu emaw, a nu fanu emaw mutpuitu chu anchhe dawngin awm rawh se,' an ti ang a. Mipui zawng zawng chuan, 'Amen,' an lo ti ang a, an lo ti tur a ni.

²³'A pizawn mutpuitu chu anchhe dawngin awm rawh se,' an ti ang a. Mipui zawng zawng chuan, 'Amen,' an lo ti ang a, an lo ti tur a ni.

²⁴'A thenawm that rutu chu anchhe dawngin awm rawh se,' an ti ang a. Mipui zawng zawng chuan, 'Amen,' an lo ti ang a, an lo ti tur a ni.

²⁵'Pawi khawih lo thahna'na thamna latu chu anchhe dawngin awm rawh se,' an ti ang a. Mipui zawng zawng chuan, 'Amen,' an lo ti ang a, an lo ti tur a ni.'He dan thu pawm nghehpui lotu chu anchhe dawngin awm rawh se,' an ti ang a. Mipui zawng zawng chuan, 'Amen,' an lo ti ang a, an lo ti tur a ni.

²⁶'He dan thu pawm nghehpui lotu chu anchhe dawngin awm rawh se,' an ti ang a. Mipui zawng zawng chuan, 'Amen,' an lo ti ang a, an lo ti tur a ni.