Read Baibul, Mizo Deuteronomy 29 Bible Online

Deuteronomy 29 - Baibul, Mizo bible

Deuteronomy 29

¹Horeb tlanga an hnena thu a thlun tiam lo a, LALPA'n Moab rama Israela thlahte hnena mosia thu a thluntir, a thuthlung thute chu he'ng hi a ni.

²Tichuan Mosia'n Israel mi zawng zawng chu a ko a, an hnenah, "Aigupta rama Pharaoa chungah te, a mite zawng zawng chungah te, a ram zawng zawng chungah te in mithmuh ngeia LALPA'n thil a tih zawng zawngte kha in hmu a;

³fiahna nasa tak te, chhinchhiahna te, thil mak te in mit ngeia in hmuh kha:

⁴nimahsela LALPA'n vawiin thleng hian hriat thiamna thinlung te, hmuh theihna mit te, hriat theihna bengte a la pe lo che u a ni.

⁵Thlalerah kum sawmli ka hruai ta che u a; in silhfente chu in sin chul lo a, in pheikhawk bunte chu in bun chul lo bawk a.

⁶Kei hi LALPA in Pathian ka ni tih in hriat theihna'n chhang in ei lo a, uain pawh, zupui pawh in in lo a.

⁷Tin, he hmun in lo thlen hian Hesbon lal Sihona leh Basan lal Oga chu min do turin an lo thawk a, anni chu kan lo hneh a;

⁸tin, an ram chu kan la a, Reuben-ho te, Gad-ho te, Manase hnam zatve te luah atan kan pe a.

⁹Chutichuan in thiltih zawng zawnga in hmuingil zel theihna'n he thuthlung thute hi pawm u la, zawm rawh u.

¹⁰Tunah hian in zain hnam puipa te,

¹¹in upa te, in hotute Israel mi zawng zawng, in fanau tete te, in nupui te, in awmpui ram dang mi, in thing kittu leh in tui chawitute chenin LALPA hmaah in ding a ni.

¹²LALPA in Pathianin in pawm tura thuthlung a siamah hian vawiinah in lut dawn ta a;

¹³in thlahtu Abrahama te, Isaaka te, Jakoba te hnenah leh in hnena a lo tiam tawh anga in pathian a nih theihna'n, ama mi atan a tinghet che u a ni.

¹⁴He chhechham leh thuthlung thu hi in hnenah chauh thlung ka ni lo a,

¹⁵vawiina LALPA kan Pathian hmaa dingte leh tuna kan hnena awm ve lote hnenah pawh hian a ni;

¹⁶(Aigupta rama kan awm dan te, hnam dangte tawn tlanga in kal tlang dan te in hria a;

¹⁷an zinga an thil tenawm te leh an milem, thing leh lung te, tangkarua leh rangkachakte in hmu bawk a.)

¹⁸Chutilochuan in zinga mipa emaw, hmeichhia emaw, chhungkua emaw, hnam emaw, chung hnam pathiante be tur chuan an thinlungin tunah hian LALPA kan Pathian chu hawisanin, in zingah thil kha leh sai chawr chhuahna bulte in lo awm dah ang e;

¹⁹tin, chuti a nih zawngin he chhechham thu hi hre reng si a, luhlul taka duh ang agna a awm pawha a tan engmah pawi lo tur anga mahni inthlamuan chawp chu,

²⁰chutiang mi chu LALPA'n a ngaidam dawn hauh lo a, LALPA thinurna leh athikna chuan chu mi chu a ur ang a, he lehkhabua anchhe chuang zawng zawng hi a chungah a awm ang a, LALPA'n van hnuai ata a hming chu a thai bo zawk ang.

²¹He dan bua chuang anchhe thuthlung zawng zawng ang hian Israel hnam zawng zawng zing ata tihrangin thil tha lo lamah LALPA'n a teltir ang.

²²Tin, thangthar lo la awm tur, in hnua in fate lo la awm tur leh, ram dang mi hla tak atanga lo kal turte chuan, chu mi rama hri leh LALPA'n natna a veitir te,

²³a ram pum pui chu kat leh chi leh kanghlum, engmah chin lohna, engmah chawr lohna, hlobette pawh chawr lohna, Sodom leh Gomora leh Adma leh Zeboiim tihchhiat, LALPA thinur leh thinrima a tihchhiat anga chhia a nih an hmuh hun chuan

²⁴hnam tinin, 'Engvangin nge he ram hi hetianga LALPA'n a tih? He thinur ling nasa tak hi engtizia nge ni?' an ti ang.

²⁵Chutichuan miin, 'Aigupta ram ata a hruai chhuah laia a thuthlun, LALPA an pi leh pute pathian thuthlung chu an hawisan a,

²⁶pathian dang, an hriat ngai loh pathian te, anin a ruatsak ni lote rawng an bawl a, an biak vang a ni;

²⁷chuvang chuan he lehkhabua chuang anchhia zawng zawng thlentir turin he ram chungah hian LALPA thin a thawk a ni;

²⁸tin, thinrim leh thinur leh thinrim tak maiin an ram ata a pawt chhuak vek a, ram dangah a theh lut a ni, tuna an awm dan ang hi,' an ti ang.Thil inthupte chu LALPA kan Pathian ta a ni a, thil tihlante erawh chu he dan thu zawng zawng hi kan zawm theihna'n keini leh kan thlahte ta kumkhua tur a ni.

²⁹Thil inthupte chu LALPA kan Pathian ta a ni a, thil tihlante erawh chu he dan thu zawng zawng hi kan zawm theihna'n keini leh kan thlahte ta kumkhua tur a ni.