Read Baibul, Mizo Deuteronomy 30 Bible Online

Deuteronomy 30 - Baibul, Mizo bible

Deuteronomy 30

¹Tin, LALPA'n a hnawhdarhna che u hnam dang zinga in awm laia in chungah he'ng tuna malsawmna leh anchhia in hnena ka sawi hi a lo thlenin, duh thlan tur in neih hi hre reng ang che u.

²LALPA in Pathian lam in hawi leh a, tuna thu ka pek che u ang hian nangni leh in fate nen in thinlung zawng zawng leh in rilru zawng zawnga a awka in zawm hunah chuan,

³LALPA in Pathianin in sal nihna, a tibo ang a, a khawngaih ang che u a, LALPA in Pathianin hnam tin zinga a tihdarhna che u ata a hruai khawm leh ang che u.

⁴In zinga mi van tawp thlenga hnawhchhuah an awm chuan, LALPA in Pathian in chuta ta chu a hruai khawm ang che u a, chuta ta chu a hruai chhuak ang che u;

⁵tin, LALPA in Pathianin in pi leh puten an luah ramah khan a hruai lut leh ang che u a, in luah ang a; ani chuan a tihmuingil ang che u a, in pi leh pute khumin a tipung ang che u.

⁶Tin, in nun theihna tura LALPA in Pathian chu in thinlung zawng zawng leh in rilru zawng zawnga in hmangaih theihna turin LALPA in Pathianin in thinlung leh in thlahte thinlung a tansak ang che u.

⁷Tin, LALPA in Pathianin he'ng anchhia zawng zawngte hi a tiduhdahtu che u, in hmelmate leh a hawtu che u chungah a awmtir ang.

⁸Tin, in lo hawi leh ang a, LALPA awka hi in pawm ang a, vawiina thu ka pek che u, a thupek zawng zawngte hi in zawm ang.

⁹Tin, LALPA in Pathian chuan in kutkawih zawng zawngah te, in rila rahah te, in bawng rual pungah te, in lei rahah te nasa takin a tipung ang che u a, in pi leh pute chunga a lawm ang khan in chungah LALPA a lawm leh ang;

¹⁰he dan bua chuang a thupek te, a dan te zawm tura LALPA awka in zawm a, in thinlung zawng zawng leh in rilru zawng zawnga LALPA in Pathian lam in hawi phawt chuan.

¹¹He thupek, tuna ka pek che u hi in tan a har lutuk lo a, a hlat lo bawk che u a ni.

¹²'Kan hriata kan zawm theihna turin tu nge vanah min kalsak ang a, min han laksak ang?' tih turin vana mi an ni lo a,

¹³'kan hriata kan zawm theihna turin tuifinriat ralah tu nge min kalsak ang a, min rawn laksak ang?' ti turin tuifinriat rala mi ani hek lo.

¹⁴In zawm theihna'n thu chuan a hnaih hle che u a, in kaah leh in thinlungah a awm a ni.

¹⁵Tunah hian in hmaah nunna leh thatna, thihna leh thil tha lo ka dah a;

¹⁶LALPA in Pathian hmangaih tur te, a kawng zawh tur te, a thupek te, a dan te, a rorel te pawm tura tuna thu ka pek che u hi in zawm chuan nungdamin in awm ang a, in lo pung ang a, in va luah tur ramah chuan LALPA in Pathianin mal a sawm dawn che u a ni.

¹⁷Amaherawhchu in thinlungin khaw dang a hawi a, in ngaihthlak loh a, hruai bova in awm a, pathian dangte in biak a, a rawngte in bawl chuan,

¹⁸in boral ngei ngei ang tih tunah hian ka hrilh che u a ni; Jordan lui kan a, luah tura in va luhna ramah chuan in dam rei lo ang.

¹⁹In hmaah nunna leh thihna, malsawmna leh anchhia ka dah tih tunah hian in chungchang thua hretu atan lei leh van ka ko a ni; chutichuan nunna chu thlang rawh u, in nun theihna'n, nangni leh inthlahte nen;LALPA in Pathian hmangaih a, a awka awih a, amah vuan tlatin; amah chu in nunna, in dam reina a ni si a; tichuan in pu Abrahama te, Isaaka te, Jakoba te chhechhama pek a tiam ramah chuan in awm dawn a ni," a ti a.

²⁰LALPA in Pathian hmangaih a, a awka awih a, amah vuan tlatin; amah chu in nunna, in dam reina a ni si a; tichuan in pu Abrahama te, Isaaka te, Jakoba te chhechhama pek a tiam ramah chuan in awm dawn a ni," a ti a.