Read Baibul, Mizo Deuteronomy 5 Bible Online

Deuteronomy 5 - Baibul, Mizo bible

Deuteronomy 5

¹Tin, Mosia'n Israel-ho zawng zawng chu a ko khawm a, an hnenah, "Aw Israel mite u, in zira in pawm tura dan te, rorel te in benghriata vawina ka sawi hi ngaithla rawh u.

²LALPA kan Pathianin Horeb-ah chuan kan hnenah thu a thlung a.

³LALPA chuan he thu kan pi leh pute hnenah khan a thlung lo a, keiniho, tun thlenga mi nungdama la awm zawng zawngte hnenah ngei hian a ni, a thlun zawk ni.

⁴LALPA chuan tlangah mei atangin inhmatawnin a bia he u a,

⁵(chu mi lai chuan LALPA thu kawhmuh tur che uin LALPA nena in inkarah ka ding a; mei avang chuan in hlau si a, tlangah chuan in han chho lo e).

⁶Kei hi LALPA i Pathian, Aigupta ram ata, bawih ata hruai chhuaktu che ka ni.

⁷Keimah lo chu pathian dang reng reng i nei tur a ni lo.

⁸Milem siam chawp chung lam vana mi emaw, hnuai lam leia mi emaw, lei hnuai lama tuia mi emaw, a eng anpui mah i insiam tur a ni lo;

⁹chung chu chibai i buk tur a ni lo a, an rawng i bawl tur a ni hek lo. Kei LALPA i Pathian hi Pathian thikthuchhia, pate khawlohna avanga fate hrem thin, mi hawtute chu chhuan thumna leh chhuan lina thlenga hrem thin leh,

¹⁰mi hmangaiha ka thupekte pawmtu sang tam takte chunga khawngaihna lantir thin ka nih hi.

¹¹LALPA i Pathian hming chu i lam mai mai tur a ni lo. LALPA chuan a hming lam mai maitu chu thiam loh chantir lohin a chhuah dawn si lo a.

¹²LALPA i Pathianin thu a pek che angin chawlhni chu thianghlim reng turin serh rawh.

¹³Ni ruk chhungin i thawk ang a, i hna zawng zawng chu i thawk tur a ni;

¹⁴a ni sarih ni erawh chu LALPA i Pathian tan chawlhni a ni e; chu mi ni chuan hna reng reng i thawk tur a ni lo, nang pawhin, i fapa pawhin, i fanu pawhin, i bawihpa pawhin, i bawihnu pawhin, i bawngpa pawhin, i sabengtung pawhin, i ran a enga pawhin, i ina ramdang mite pawhin; nangmah ang bawka i bawihpa te, i bawihnute pawh an chawlh theina'n.

¹⁵Nang pawh Aigupta ramah khan bawih i ni tawh a, LALPA i Pathianin chuta ta chu kut chak tak leh ban phara a hruai chhuah che i ni tih hre reng rawh; chuvang chuan a ni, LALPA i Pathianin chawlhni serh tur thu a pek che ni.

¹⁶LALPA i Pathianin thu a pek che angin i nu leh i pa chawimawi rawh; tichuan LALPA'n ram a pekah che hian i hmuingil ang a, i dam rei dawn nia.

¹⁷Tual i that tur a ni lo.

¹⁸I uire tur a ni lo.

¹⁹I ru tur a ni lo.

²⁰I vengte chungah hretu derah i insiam tur a ni lo.

²¹I vengte nupui i awt tur ani lo a, i vengte in emaw, a lo emaw, a bawihpa emaw, a bawihnu emaw, a bawngpa emaw, a sabengtung emaw, i vengte thil a engmah i awt tur a ni lo' tiin.

²²Heng thute hi tlangah mei te, chhum te, thim chhah mup atangtein LALPA'n aw ring takin in zavaia pungkhawmho hnenah a sawi a, a belhchhah leh chuang lo a. chung chu lungphek pahnihah a ziak a, mi pe a.

²³Tin, tlang chu a kan laia, thim atanga aw chu in han hriat chuan heti hi a ni a, min rawn hnaih a, in hnam puipa zawng zawng leh in upate chuan;

²⁴Tin, 'ngai teh, LALPA kan Pathian chuan kan hnenah a ropuizia leh a lenzia a lantir a, mei atanga a awm chu ka hria a; Pathianin mihring a biak pawha thihna a ni chuan lohna chu vawiinah kan lo hre ta a.

²⁵Chuvangin engah nge kan thih ang? He mi mei nasa tak hian min kangral mai ang a sin; LALPA kan Pathian aw chu kan hriat leh chuan ka thi mai ang.

²⁶Mei atanga Pathian nung aw kan hriat anga hre vea dam si tisa pu zawng zawng zingah tu nge awm?

²⁷Nangin va hnaih la, LALPA kan Pathianin a sawi tur zawng zawng chu va ngaithla teh khai; tin, LALPA kan Pathianin i hnena a sawi zawng zawng chu nangin kan hnena i sawi ang a; tichuan kan lo ngaithla ang a, kan zawm dawn nia,' in ti a.

²⁸Tin, mi biak laia in thusawi chu LALPA'n a lo hria a; tichuan LALPA'n ka hnenah, 'Heng mipuiten i hnena thu an sawi chu ka lo hria a; an thusawi zawng zawng chu a tha hle mai.

²⁹Chutiang rilru chu pu thin se la aw, mi tih ang a, ka thupekte chu an zawm fo vang a, anmahni leh an fate pawh kumkhuain an hmungil hle tur!

³⁰An hnenah, in puan inah te va haw rawh u, ti rawh.

³¹Nang erawh chu ka kiangah ding la, luah tura ram ka peka an pawm tura i zirtir tur thupek zawng zawng te, dan te, rorel te chu ka hrilh ang che,' a ti a.

³²Chuvangin LALPA in Pathianin thu a pek che u anga ti turin fimkhur rawh u; ding lamah emaw, vei lamah emaw in peng tur a ni lo.In va luah tur ramah in awm a, in hmuingilna tur leh in chen rei theina'n LALPA in Pathianin thu a pek che u kawng in zawn tluan chhuak tur a ni.

³³In va luah tur ramah in awm a, in hmuingilna tur leh in chen rei theina'n LALPA in Pathianin thu a pek che u kawng in zawn tluan chhuak tur a ni.