Read Baibul, Mizo Johana 1 Bible Online

Johana 1 - Baibul, Mizo bible

Johana 1

¹Atirin Thu a awm, Thu chu Pathian hnenah a awm, Thu chu Pathian a ni.

²Chu mi chu atirin Pathian hnenah a awm.

³Engkim azain ama siam a ni;thilsiam zawng zawng hi ama siam loh engmah a awm lo.

⁴Amahah chuan nunna a awm; chu mi nunna chu mihringte enna a ni a.

⁵Eng chu thim zingah a lo eng a; thimin chu chu a hre lo.

⁶Pathian tirh mi pakhat a lo awm a, a hming chu Johana a ni.

⁷Chu mi chu hriattir turin a lo kal a, eng thu chu hriattir turin; amah avanga mi zawng zawngin an rinna turin.

⁸Ani chu eng chu a ni lo, eng thu chu hriattir tura lo kal a ni zawk e.

⁹Eng tak mi tin tieng thin kha a awm a, khawvelah a lo kal mek a ni.

¹⁰Ani chu khawvelah a awm, khawvel ama siam a ni, khawvelin amah a hre si lo.

¹¹Amah a mite hnenah a lo kal a, amaha miten an lo lawm si lo.

¹²Nimahsela amah lawm apiang chu, an hnenah Pathian fate nih theihna tur a pe, a hming ringtute chu;

¹³chung mite chu thisen hrin an ni lo a, tisa duhzawnga hrin an ni hek lo, mipa duhzawng pawha hrin an ni hek lo, Pathian hrin an ni zawk e.

¹⁴Tin, Thu chu tisaah a lo chang a, kan zingah a awm ta a, (Pa fa mal neih ropui angin a ropuizia kan hmu,) khawngaih leh thutakin a khat.

¹⁵Johanan a thu a hriattir a, a au a, " 'Ka hnunga mi zui tur khan mi lehkhalh tawh a ni, ka hmaa awm tawh reng a nih avangin,' tia a thu ka sawi kha amah hi a ni," a ti a.

¹⁶A famkimna kan chang theuh, khawngaih chunga khawngaih leh chhawnna nen.

¹⁷Dan thu Mosia'n a pe, khawngaihna leh thutak Isua Krista avangin a lo awm.

¹⁸Tuma'n eng lai mahin Pathian an hmu lo, a Fapa mal neih, Pa angchhunga awm ngei khan a chanchin a hril tawh a ni.

¹⁹Tin, Judaten, "Tunge i nih?"tia zawt tura Jerusalem khua ata a hnena puithiamte leh Levia chia mite an tirh lai khan he'ng hi Johana thu lo hriattir chu a ni:

²⁰tang loin a inpuang a, "Krista chu ka ni lo e," tiin a inpuang a.

²¹Tin, anni chuan a hnenah, "Tunge i nih le? Elija i ni em?" an ti a, an zawt a. Tin, ani chuan, "Ka ni lo e," a ti a. "Zawlnei kha i ni em?" an ti a. Tin, ani chuan, "Ni lo e," a ti a, a chhang a.

²²Tin, anni chuan a hnenah, "A nih leh, tu nge i nih? Min tirtute kan chhan theih nan min hrilh ta che. I chanchin reng eng nge i sawi dawn?" an ti a.

²³Tin, ani chuan, " 'Lalpa kalkawng tirual rawh u,' tia thlalera autu aw ka ni, Zawlnei Isaia sawi ang khan," a ti a.

²⁴An mi tirhate chu Pharisaite hnena mi an ni a.

²⁵Tin, anni chuan a hnenah, "Krista tal, Elija tal, zawlnei tal chu i nih si loh chuan engati nge i baptis thin le?" an ti a, an zawt leh a.

²⁶Tin, Johanan an hnenah, "Keiin tuiin ka baptis thin, in zingah mi pakhat in hriatloh a ding a ni.

²⁷ani chu mi zuitu tur chu a ni a, a pheikhawk hrui phelh tlak pawh ka ni lo e," a ti a, a chhang a

²⁸Chung thil chu Jordan rala Bethani khuaah, Johana baptisnaah khan an ti a ni.

²⁹Tin, atukah chuan Johanan Isua a hnenah lo kal dawnin a hmu a. Tin, a sawi a, "En teh u, Pathian Beram No, khawvel sual kalpuitu tur saw!

³⁰Saw mi saw a ni, 'Mi pakhat mi lehkhalh khan mi zui dawn,ka hmaa awm sa reng a ni,' ka tiha kha.

³¹Amah chu ka lo hre si lo; nimahsela Israelten amah an hriat theihna'n, tuia baptis-in ka lo kal a ni," a ti a.

³²Tin, Johanan a thu a hriattir a, a sawi a, "Thlarau chu thuro angin van atanga chhuk ka hmu a, a chungah a fu reng a.

³³Amah chu ka hre si lo a, nimahsela tuia baptis tura mi tirtu khan ka hnenah, 'Tu chungah pawh Thlarau zuk fua a chunga awm reng i hmuh apiang, amah chu Thlarau Thianghlima baptistu tur chu a ni ang,' mi ti a.

³⁴Chu chu ka hmu tawh a, he mi hi Pathian Fapa a ni tih ka hriattir tawh," a ti a.

³⁵Tin, atuk lehah Johana a ding a, zirtirte pahnih nen:

³⁶tin, Isua veivak lai a en a, "En teh u, Pathian Beram No saw," a ti a.

³⁷Tin, a zirtirte pahnih chuan a thusawi chu an hria a, Isua an zui ta a.

³⁸Tin, Isua a hawi a, an rawn zui a hmu a, an hnenah, "Engnge in zawn?" a ti a. Tin, anni chuan, "Rabbi (chu chu Zirtirtu tihna a ni), khawiah nge i awm?" an ti a.

³⁹Ani'n an hnenah, :Lo kal u la in hmu ang," a ti a. Chutichuan an kal a, a awmna chu an hmu a, chu mi ni chuan a hnenah an awm reng a; zanriah chum hun lai a ni a.

⁴⁰Johana thusawi chu hriaa Isua zuitute pahnih chu, a pakhat zawk chu Andria, Simon Petera unau a ni.

⁴¹Ani chuan a hmasa berin ama unau Simona a hmu a, a hnenah, "Messia kan hmu ta," a ti a (chu chu Krista tihna a ni).

⁴²Tichuan Isua hnenah a rawn hruai a. Isua'n ani chu a lo en a, "Johana fapa Simona i ni, Kiphaa an vuah ang che," a ti a (chu chu Petera tihna a ni).

⁴³Tin, atukah chuan Isua chuan Galili rama kal a tum a, Philipa a hmu a, a hnenah, "Mi zui rawh," a ti a.

⁴⁴Philipa chu Bethsaida khuaa mi a ni, chu chu Andria leh Petera awmna khua bawk a ni.

⁴⁵Philipa chuan Nathanaela a hmu a, a hnenah, "A chanchin Mosia'n Dan Lehkhabua a ziak leh, Zawlneiten an ziak kha, amah chu kan hmu ta, Nazaret Isua, Josefa fapa chu," a ti a.

⁴⁶Tin, Nathanaela chuan a hnenah, "Nazaret khuaah thil tha a chhuak thei em ni?" a ti a. Philipa chuan a hnenah, "Lo kal la, en rawh," a ti a.

⁴⁷Isua'n Nathanaela a hnena lo kal dawnin a hmu a, a chanchin a lo sawi a, "En teh u, Israel mi tak, ngamthlemna reng nei lo saw," a ti a.

⁴⁸Nathanaela chuan a hnenah, "Nangin engtin nge mi hriat?" a ti a. Isua'n a hnenah, "Philipan a koh hma che a , theipui bula i awm lai khan ka hmu che a sin , a ti a, a chhang a.

⁴⁹Nathanaelan a hnenah, "Rabbi, Pathian Fapa i ni, Israelte Lalber i nih hi," tiin a chhang a.

⁵⁰Isua'n a hnenah, " 'Theipui bulah ka hmu che a sin,' i hnena ka tih avangin i ring a ni maw? Heng aia thil ropui zawk hi i la hmu ang," a ti a, a chhang a.Tin, Isua vekin a hnenah, "Tih tak meuhin, tih tak meuhin ka hrilh a che u, van inhawngah, Pathian vantirhkohte Mihring fapa chungah hian chhuk leh chho in la hmu ang," a ti a.

⁵¹Tin, Isua vekin a hnenah, "Tih tak meuhin, tih tak meuhin ka hrilh a che u, van inhawngah, Pathian vantirhkohte Mihring fapa chungah hian chhuk leh chho in la hmu ang," a ti a.