Read Baibul, Mizo Johana 13 Bible Online

Johana 13 - Baibul, Mizo bible

Johana 13

¹Tin, Kalhlen Kut hmain Isua'n he khawvel hi chhuahsana Pa hnena a kal hun a thleng tawh tih a hria a, amaha mi khawvela awm a hmangaih thinte chu a tawp thleng pawhin a hmangaih reng a.

²Tin, zanriah ei laiin, (chu mi hma pawhin diabolan Simona fapa Iskariot Juda chu Isua mantir a rilruktir a),

³Isua'n, - Pain a kutah thil engkim a vawntir te, Pathian hnena lo chhuak a nih te, Pathian hnena a kal dawn te hre reng chungin -

⁴a zanriah chaw kil chu a tho a, a puante a dah a, inhrukna puan a la a, a veng a.

⁵Tin, maihunah tui a bun a, zirtirte ke a sil ta a, inhrukna puan a ven chuan an hru zel a.

⁶Chutichuan Simon Petera hnenah a lo kal a. Ani chuan, "Lalpa, nang emin ka ke i sil dawn em ni?" a ti a.

⁷Isua'n a hnenah, "Ka thiltih hi tunah i hre lo; nimahsela nakin hnuah i la hria ang," a ti a, a chhang a.

⁸Petera'n a hnenah, "Ka ke i sil tawp lo ang," a ti a. Isua'n a hnenah, "Ka sil loh che chuan ka hnenah engmah chan i nei lo ang," a ti a.

⁹Simon Petera'n a hnenah, "Lalpa, chuti a nih chuan ka ke chauh ni loin, ka kut leh ka lu pawh le," a ti a.

¹⁰Isua'n a hnenah, "Inbual tawh chu a ke lo chu sil a ngai lo, a fai var alawm; nangni in fai e - in za erawh chuan a ni lo," a ti a.

¹¹(A mantirtu tur chu a hre si a; chuvangin, "In za chuan in fai lo," a ti a ni).

¹²Chutichuan an ke a sil a, a puante a lak a, a thut leh chuanin an hnenah, "In chunga ka thiltih hi engtihna nge ni in hria em?

¹³Nangni'n Zirtirtu leh Lalpa mi ti thin; in tidik e, ka ni nge reng a.

¹⁴Kei Lalpa leh Zirtirtu mahin in ke ka sil chuan nangni pawhin in ke in insilsak tur a ni.

¹⁵In chunga ka tih ang hian nangni pawhin in tih vena turin ka tihhmuh che u a ni si a.

¹⁶Tih tak meuhin, tih tak meuhin ka hrilh a che u, bawih a pu aiin a ropui lo; tirhkoh pawh a tirtu aiin a ropui hek lo.

¹⁷Chung thil chu in hriat chuan ti u la in eng a thawl ang.

¹⁸In zaa thu ka sawi lo e; ka thlante chu ka hria, nimahsela chu chu, 'Ka chhang eituin a keartui ka chungah a lek ta,' tih Pathian Lehkha Thu kha a lo thlen theihna tur a ni.

¹⁹Tun achinah a lo thlen hmain ka hrilh che u hi, a lo thlen hunah kei, amah kha ka ni tih in rin theihna turin.

²⁰Tih tak meuhin, tih tak meuhin ka hrilh a che u, tupawh ka tirh apiang lawm chu, keimah mi lawm a ni; tupawh kei mi lawm chu, mi tirtu lawm a ni," a ti a.

²¹Isua'n chutianga a sawi zawhin a rilruin a mangang a, "Tih tak meuhin, tih tak meuhin ka hrilh a che u, in zinga mi pakhatin mi mantir ang," tiin a hriattir ta a.

²²Tin, zirtirte chuan a tih bik an hre lo a, an inen hlawm a.

²³Tin, a zirtirte zinga mi pakhat Isua'n a hmangaiha chu dawhkan sirah Isua angchhungah bawkin a awm a.

²⁴Tin, Simon Petera'n chu mi hnenah chuan, "Tu thu ber nge a sawi, min hrilh teh," tiin a zaizir a.

²⁵Tin, ani chu a awmna ngaiah a awm a, Isua awm nghengin a lo thle phei a, a hnenah, "Lalpa, tu ber nge ni?" a ti a.

²⁶Tin, Isua'n, "Chhang them ka chhiahsaka ka peka chu a ni ang," a ti a, a chhang a. Chutichuan chhang them chu a chiah hnuin a la a, Iskariot Simona fapa Juda hnenah chuan a pe a.

²⁷Tin, chhang them chu a pek hnu chuan Setana a chhungah a lut ta nghal a. Chutichuan Isua'n a hnenah, "I tih tur chu ti thuai rawh," a ti a.

²⁸(Tin, dawhkan sira mite chuan tuma'n engtiziaa ti nge a nih an hre lo.

²⁹Thenkhatin, Juda chuan tangka ip a vawn avangin, "Isua'n, 'Kut atan thil kan chakkhai apiang lei rawh,' a ti emaw, 'Mi retheite hnenah englo pek tur,' a ti emaw," an ti a ni).

³⁰Tin, ani chuan chhang them chu a la a, a chhuak ta nghal a; chu mi lai chu zan a ni a.

³¹Chutichuan a chhuah hnuin Isua'n a sawi a, "Tunah chuan Mihring Fapa chawimawiin a awm ta, amah avangin Pathian pawh chawimawiin a awm a ni.

³²Pathianin amahah chuan ani chu a chawimawi ang, a chawimawi nghal ang.

³³Naute u, rei lo te in hnenah ka la awm rih e. Nangnin mi zawng ang; tin, Judate hnenah, 'Ka kalna turah in lo kal thei lo ang,' tih ka sawi ang khan, tunah chuti bawkin in hnenah ka sawi hi.

³⁴Thupek thar ka pek che u hi, inhmangaih u la; keiin ka hmangaih ang che u hian nangni pawh inhmangaih u la.

³⁵In inhmangaih chuan mi zawng zawngin ka zirtirte in ni tih chu miah chuan an hria ang," a ti a.

³⁶Simon Petera'n a hnenah, "Lalpa, khawiah nge i kal dawn?" a ti a. Isua'n, "Ka kalna turah nangin tunah mi zui thei lo ang; nakin hnuah erawh chuan mi zui ang," a ti a,a chhang a.

³⁷Petera'n a hnenah, "Lalpa engati nge tunah pawh ka zui theih loh vang che? Nangmah avangin ka nun ka paih ang," a ti a.Isua'n, "Keimah avangin i nun i paih ang maw? Tih tak meuhin, tih tak meuhin ka hrilh a che, nangin vawi thum mi phat hma loh chuan ar a khuang lo ang.

³⁸Isua'n, "Keimah avangin i nun i paih ang maw? Tih tak meuhin, tih tak meuhin ka hrilh a che, nangin vawi thum mi phat hma loh chuan ar a khuang lo ang.