Read Baibul, Mizo Johana 15 Bible Online

Johana 15 - Baibul, Mizo bible

Johana 15

¹Kei grep hrui taktak ka ni, ka Pa a huan enkawltu a ni.

²Ka zawmpui peng rah lo apiang a paih thin a; a rah apiang a tithianghlim thin, a rah tam lehzualna'n.

³In hnena ka thusawi avang chuan tunah pawh in thianghlim tawh pang a ni.

⁴Keimahah awm reng rawh u, kei pawh nangmahniah ka awm reng ang. Peng chu grep hruia a awm reng loh chuan amahin a rah thei lo ang bawkin, nangni pawh keimahah in awm reng loh chuan in rah thei lo ang.

⁵Kei grep hrui chu ka ni, nangni a pengte chu in ni; tupawh keimaha awm renga kei pawh amaha ka awm rengna chu, chu mi chu tam takin a rah thin; keimah loin engmah in ti thei si lo.

⁶Mi keimaha a awm reng loh chuan peng anga paih chhuahin a awm a, a vuai thin; tin, an fawm a, meiah an paih a, a kang thin.

⁷Nangni keimaha in awm reng a, ka thu nangmahnia a awm reng bawk chuan in duh apiang dil rawh u, in tan tihin a awm zel ang.

⁸He mi avangin ka Pa chu chawimawiin a awm thin, tam taka in rah hian; chutichuan ka zirtirte in ni ang.

⁹Pain mi hmangaih ang bawkin kei pawhin ka hmangaih che u hi; ka hmangaihin awm reng rawh u.

¹⁰Nangni'n ka thupekte in zawm chuan ka hmangaihin in awm reng ang; keiin ka Pa thupekte ka zawm a, a hmangaihin ka awm reng ang bawk hian.

¹¹Ka lawm nangmahnia a awm rengna'n leh, in lawm a kimna'n, he'ng thu hi in hnenah ka sawi hi.

¹²Hei hi ka thupek a ni, keiin ka hmangaih che u ang bawkin nangni inhmangaih u la.

¹³Mihringin a thian aia a nun a paih aliama hmangaihna nasa zawk tuma'n an nei lo.

¹⁴Thu ka pek apiang che u in tih chuan ka thiante in ni ang.

¹⁵Bawih ka ti leh tawh lo ang che u; a pu thiltih bawihin a hre si lo; thiante ka ti tawh zawk ang che u; Pa hnena thil ka hriat zawng zawng in hnenah ka puang tawh si a.

¹⁶Nangni'n mi thlang lo, keima'n ka thlang zawk che u a, va rah tur leh in rah awm reng turin ka ruat bawk a che u; ka hminga Pa hnena in dil apiang a pekna tur che u in.

¹⁷In inhmangaih theihna'n he'ng thu hi ka pe a che u.

¹⁸\ "Khawvelin a huat che u chuan, a huat hma che u pawhin keimah mi hua tih in hria e.

¹⁹Nangni khawvela mi ni u la, khawvelin amaha mi a hmangaih tur; khawvela mi in ni si lo a, khawvela mi ka thlan chhuah zawk che u avang hian khawvelin a hua che u a ni e.

²⁰'Bawih a pu aiin a ropui lo,' tih thu ka hrilh tawh che u kha hre reng rawh u. Anni'n kei mi tihduhdah tawh chuan nangni pawh an tiduhdah ang che u; ka thu an zawm tawh chuan nangni thu pawh an zawm ang.

²¹Nimahsela he'ng thil zawng zawng hi ka hming avangin in chungah an ti ang, mi tirtu an hriat loh avangin.

²²Kei lo kalin anhnenah thu sawi suh i la, sual an nei lo tur; tunah erawh zawng an sual chhuanlam tur an nei ta lo a ni.

²³Tupawh kei mi hua chuan ka Pa pawh a hua a ni.

²⁴Thil, mi dang tuma tih ngai lohte an zingah ti suh i la, sual an nei lo tur; tunah erawh zawng anni'n kei leh ka Pa kan pahnihin min hmu tawh a, huat pawh min haw tawh a ni.

²⁵Engpawh ni rawh se, an Dan Lehkhabuah, 'Anni'n enga khawlawi loin mi hua,' tih thu ziak kha a lo thlenna turin an ti a nih hi.

²⁶Tin, Pa hnen ata Thlamuantu in hnena ka tirh tur, Paa chhuak Thlarau dik tak chu a lo thlen hunah, ani chuan ka thu a hriattir ang;nangni pawhin in hriattir bawk ang, atir ata ka hnena in awm avangin.

²⁷nangni pawhin in hriattir bawk ang, atir ata ka hnena in awm avangin.