Read Baibul, Mizo Johana 16 Bible Online

Johana 16 - Baibul, Mizo bible

Johana 16

¹Tihlungnihloha in awm lohna turin he'ng hi in hnenah ka sawi tawh hi.

²inkhawmna inahte an hnawntir ang che u a; a ni, tupawh a tihlum tur che u apiangin Pathian chungah thil tha tiin an inhria ang, chutiang hun chu a thleng dawn.

³Chung thil chu an ti ang, Pa leh kei min hriat loh avangin.

⁴Heng thu hi in hnenah ka sawi tawh hi, a hun a lo thlen hunah, ka hrilh tawh che u tih in hriat lehna turin. Heng thil hi atir ata ka la hrilh lo reng che u a ni, in hnena ka la awm avangin.

⁵Tunah erawh zawng mi tirtu hnenah ka kal dawn a ni; nangniho tuma'n, 'Khawiah nge i kal dawn?' tiin mi zawt si lo.

⁶Heng thu in hnena ka sawi avangin in thinlung chu lungngaiin a khat thlu hial ta zawk a.

⁷Nimahsela thu dik tak ka hrilh a che u; ka kal in tan a tha e; ka kal loh chuan Thlamuantu chu in hnenah a lo kal dawn si lo; ka kal erawh chuan in hnenah ka rawn tir ang.

⁸Ani chu a lo thlen chuan sual thu-ah te, fel thu-ah te, rorel thu-ah te khawvel an thiam loh a hriattir ang:

⁹sual thu-ah te thiam loh an chang ang, kei mi rin loh avang hian;

¹⁰fel thu-ah te thiam loh an chang ang; Pa hnenah ka kal dawn a, nangni'n mi hmuh leh dawn tawh loh avang hian;

¹¹rorel thu-ah te thiam loh an chang ang, he khawvel lal hi thiam loha a tluk tawh avang hian.

¹²In hnenah thusawi tur tam tak ka la nei cheu a, nimahsela tunah zawng in tlin rih lo ang.

¹³Nimahsela amah, Thlarau dik tak chu, a lo thlen hun chuan thutak zawng zawngah chuan a hruai lut ang che u: amaha phuahchawpin thu a sawi dawn si lo; thu a dawn apiang chu a hril zawk ang; thil lo thleng turte pawh a hriattir ang che u.

¹⁴Ani chuan mei mi chawimawi ang; ka taa mi a la ang a, in hnenah a hriattir dawn si che u a.

¹⁵Pa-in thil a neih zawng zawng ka ta a ni; chuvang, 'Ka taa mi a la ang a, in hnenah a hriattir ang che u,' ka tih hi.

¹⁶Rei lo teah nangni'n kei mi hmu lo ang a; rei lo teah bawk nangni'n kei mi hmu leh ang," a ti a.

¹⁷Tin, a zirtirte thenkhatin, "Kan hnena a thusawi hi eng nge ni, 'Rei lo teah nangni'n kei mi hmu lo ang a, rei lo teah bawk nangni'n kei mi hmu leh ang,' a tih leh, 'Pa hnena ka kal dawn avangin,' a tih hi?" an inti a.

¹⁸Tin, anni vek chuan, "Hei, 'Rei lo te,' a tih hi eng tihna nge ni? A thusawi hi a ngaihna kan hre lo," an ti a.

¹⁹Tin, amah zawh an duh tih Isua'n a hria a, an hnenah, " 'Rei lo teah nangni'n kei mi hmu lo ang a, rei lo teah bawk nangni'n kei mi hmu leh ang,' tia hei ka thusawi hi in inzawt maw?

²⁰Tih tak meuhin, tih tak meuhin ka hrilh a che u, nangni in mittui a tla ang a, in tap vak bawk ang a, khawvel erawh chu an lawm ang; nangni in lungngai ang a, nimahsela in lungngaih chu lawmah a chang ang.

²¹Hmeichhiain nau a veiin a lungngai thin, a hun a thlen tawh avangin; nimahsela nau a hrin veleh a thlaphan chu a hre leh tawh thin lo, khawvela mihring lo piang chu a lawm avangin.

²²Tin, tunah nangni in lungngai e; nimahsela ka hmu leh ang che u a, in thinlung a lawm ang , in lawm chu tuma'n an laksak lo ang che u.

²³Chu mi niah chuan nangni'n engmah kei mi zawt lo ang. Tih tak meuhin, tih tak meuhin ka hrilh a che u, Pa hnenah engpawh in dil chuan, keima hmingin a pe ang che u.

²⁴Tun thlengin ka hmingin engmah in la dil lo; dil rawh u, tichuan in hmu ang, in lawm a kimna turin.

²⁵Chung thu chu athawiin in hnenah ka sawi tawh; a hun a thleng dawn, chu mi hunah huan in hnenah athawiin ka sawi leh tawh lo ang a, fiah takin Pa chanchin ka hrilh zawk ang che u.

²⁶Chu mi niah chuan keima hmingin thil in dil ang; tin, 'Pa hnenah keiin ka ngensak ang che,' ka ti lo a che u;

²⁷Pa ngeiin a hmangaih si che u a, nangni'n kei mi hmangaih a, Paa chhuak ka ni tih mi rin vangin.

²⁸Kei, Pa hnen ata lo chhuaka khawvela lo kal ka ni; khawvel kalsana Pa hnena hawng leh ur ka ni," a ti a.

²⁹Tin, zirtirten, "Ngai teh, tunah zawng fiah takin thu i sawi a, athawi reng rengin i sawi tak loh hi.

³⁰Nangin engkim i hria a, tuma zawh che i ngai lo tih tunah kan hre ta; he mi avang hian Pathian hnen ata lo chhuak i ni tih kan awih e," an ti a.

³¹Tin, Isua'n a chhang a, an hnenah, "Tunah chuan in awih ta maw?

³²Ngai rawh u, a hun a thleng dawn, a ni, a thleng tawh mek, chu mi hunah chuan mahni in theuhvah in darh vek ang a, keimah chauhin mi thlahthlam ang; nimahsela Pa ka hnenah a awm avangin mahni chauhin ka awm si lo.Heng thu hi in hnenah ka sawi tawh hi, keimahah hian in thlamuanna turin. Khawvelah hian hrehawmin in awm thin; nimahsela thlamuang takin awm rawh u, keiin khawvel ka ngam ta," a ti a.

³³Heng thu hi in hnenah ka sawi tawh hi, keimahah hian in thlamuanna turin. Khawvelah hian hrehawmin in awm thin; nimahsela thlamuang takin awm rawh u, keiin khawvel ka ngam ta," a ti a.