Read Baibul, Mizo Johana 17 Bible Online

Johana 17 - Baibul, Mizo bible

Johana 17

¹Chung thu chu Isua'n a sawi a; tin, vanvadakin, "Ka Pa, a hun a thleng ta; i Fapa chawimawi rawh, Fapain a chawimawina'n che;

²khatia mi zawng zawng chunga thuneia i siam khan, a hnena i pek apiangte chu chatuana nunna a pek theihna'n.

³Hei hi chatuana nunna a ni, nang Pathian tak chauh leh I tirh Isua Krista hriat hi.

⁴Nangin thil tihtur mi pek kha ka ti zo a, khawvelah ka chawimawi tawh a che.

⁵Aw ka Pa, khawvel awm hmaa i hnena mawina ka neih khan, tunah nangma hnen ngeiah mi chawimawi rawh.

⁶Nangin khawvel zinga chhuak mite kei mi pek hnenah khan i hming ka tilang ta; anni chu i ta an nih kha, nangin anni chu kei mi pe a ni; anni chuan i thu an zawm ta a.

⁷Nangin thil kei mi pek apiang, i hnena chhuak a ni tih tunah an hre ta.

⁸Nangin thu mi pekte kha an hnenah ka pe tawh si a; chung chu an vawng a, i hnena chhuak ka ni tih dik takin an hre ta a, nangin mi tir tih pawh an awi ta.

⁹An tan ka ngensak hi; khawvel tana ngensak ka ni lo, nangin mi pekteho tan zawk a ni; i ta an ni si a.

¹⁰Thil zawng zawng ka ta apiang i ta a ni e, i ta chu ka ta a ni e; anmahni avangin chawimawiin ka awm thin.

¹¹Tin, kei zawng khawvelah ka awm tawh lo ang, hengho erawh hi chu khawvelah an awm ang, kei i hnenah ka lo haw dawn ta. Ka Pa thianghlim, nangin kei mi pekteho hi i hmingin hum rawh, pumkhat an nih theihna'n, keimahni ang bawk hian.

¹²An hnena ka awm chhung khan, nangin kei mi pekteho hi i hmingin ka hum thin; anni chu ka veng a, an zingah pakhat mah an boral lo, boral fapa lo kha chu; Lehkha Thu kha a lo thlenna turin.

¹³Nimahsela tunah i hnenah ka lo haw dawn ta; khawvelah he'ng thu hi ka sawi a ni, ka lawm anmahnia an neih kimna turin.

¹⁴I thu an hnenah ka pe ta e; tin, khawvelin anni chu an hua a, khawvela mi an nih loh avangin, kei khawvela mi ka ni lo ang bawk hian.

¹⁵Nangin anni chu khawvel ata i lak chhuah tura ngen ka ni lo a, mi sual lakah chuan i hum tur ka ti zawk a ni.

¹⁶Anni chu khawvela mi an ni lo, kei khawvela mi ka ni lo ang bawk hian.

¹⁷Anni chu thutakin tithianghlim rawh, i thu chu thutak a ni.

¹⁸Nangin khawvela kei mi tir ang khan, kei pawhin anni chu khawvelah ka tirh hi.

¹⁹Anmahni avangin ka intithianghlim a ni, anni pawh thutaka an thianghlimna turin.

²⁰Henghote tan chauh hian ngensak ka ni lo, an thu avanga kei mi la ring turte tan pawh ngensak ka ni bawk e;

²¹an zaa pumkhat an nihna turin; ka Pa, nang keimaha i awm leh, kei nangmaha ka awm ang bawk hian, anni pawh keimahnia an awmna turin; nangin kei mi tir tih khawvelin an awih theihna turin.

²²Tin, nangin ropuina mi pek kha keiin anmahni ka pe ta; anni chu pumkhat an nihna turin, keini pumkhat kan ni ang bawk hian;

²³kei anmahniah, nang keimahah, anni pumkhata an awm a, an famkim theihna turin; nangin kei mi tir tih leh, mi hmangaih angin anni hi i hmangaih tih, khawvelin an hriat theihna turin.

²⁴Ka Pa, nangin kei mi pekte hi ka awmnaa ka hnena awmah ka duh; nangin mi pek ka ropuina kha an hmuhna turin; leilung pian hma pawhin nangin mi hmangaih tawh si a.

²⁵Aw ka Pa, fel tak, khawvel zawngin an hre lo chia, kei erawh chuan ka hriat che kha; hengho pawh hian nangin kei mi tir tih an hriat kha.Tin, an hnenah i hming ka hriattir a, ka hriattir leh fo ang; nangin kei mi hmangaihna kha anmahniah a awm a, kei pawh anmahnia ka awm theihna turin," a ti a.

²⁶Tin, an hnenah i hming ka hriattir a, ka hriattir leh fo ang; nangin kei mi hmangaihna kha anmahniah a awm a, kei pawh anmahnia ka awm theihna turin," a ti a.