Read Baibul, Mizo Johana 18 Bible Online

Johana 18 - Baibul, Mizo bible

Johana 18

¹Isua'n chung thu chu a sawi zawhin a zirtirte nen an chhuak a, Kidron luikawr an kan a; chutah chuan huan a awm a, chu miah chuan an lut a, amah leh a zirtirte nen.

²Tin, a mantirtu Juda pawh chuan chu mi hmun chu a hria; Isua chu a zirtirte nen chutah chuan a leng fo si a.

³Chutichuan Juda chuan sipai pawl nen, puithiam lalte leh Pharisaite hnena awm tiangkengtute nen a hruai a, khawnvarte, meichherte, hriamte kengin chutah chuan an lo kal a.

⁴Isua'n a chunga thil thleng tur zawng zawng chu a hre reng a, a va chhuak a, an hnenah, "Tunge in zawn?" a ti a.

⁵Anni chuan a hnenah, "Nazaret Isua," an ti a, an chhang a. Isua'n an hnenah, "Keimah hi ka ni," a ti a. Tin, a mantirtu Juda pawh chu an zingah a ding a.

⁶Tin, "Keimah hi ka ni," a tih veleh an hnungtawlh a, leiah an tlu hlawm a.

⁷Tin, ani chuan an hnenah, "Tunge in zawn?" a ti a, a zawt leh a. Tin, anni chuan, "Nazaret Isua," an ti a.

⁸Tin, Isua'n, "Keimah hi ka ni tih ka hrilh che u alawm; nangni'n kei mi zawng in nih chuan hengho hi thlah tha rawh u," a ti a, a chhang a.

⁹(A thusawi, "Nangin kei mi pekteho pakhat mah ka hloh ral lo," a tih kha a thlen nan).

¹⁰Tin, Simon Petera'n khandaih a vawng a, a phawi a, Puithiam Lalber bawih a sat a, a beng ding lam a sah thlaksak a. (Bawih hming chu Malka a ni a).

¹¹Tichuan Isua'n Petera hnenah, "Khandaih kha a paiah khung rawh; Pain no kei mi pek hi ka in lo ang em ni?" a ti a.

¹²Chutichuan sipai pawl nen, an hotu lalber nen, Judate tiangkengtute nen chuan Isua an man a, an phuar a,

¹³Ana hnenah an hruai hmasa a, Kaiapha puzawn a nih avangin. Kaiapha chu, chu mi kum chuan Puithiam Lalber a ni a.

¹⁴Kaiapha chu, "Mi zawng zawng aia mi pakhat thih a tha," tia Judate rawtpuitu kha a ni.

¹⁵Tin, Simon Petera'n Isua a zui a, a zirtir dang pakhat nen. Chu mi zirtir chu Puithiam Lalber hmelhriat a ni a, Puithiam Lalber in hual chhung kawtlaiah Isua hnenah a lut ve a;

¹⁶nimahsela Petera chu pawnah kawngkhar bu lah a ding reng a. Chutichuan zirtir dang, Puithiam Lalber hmelhriata chu a va chhuak a, kawngkhar vengtu a bia a, Petera a hruai lut a.

¹⁷Tin, kawngkhar vengtu nula chuan Petera hnenah, "Nang pawh he mi zirtirte zinga tel ve i ni em?" a ti a. Ani chuan, "Ka ni lo," a ti a.

¹⁸Tin, bawihte leh tiangkengtute chu chutah chuan an ding hlawm a, a vawh avangin meihawlin mei an chhem a, a lum an ai a; Petera pawh an hnenah a tel a, ding chungin mei lum a ai ve a.

¹⁹Tin, Puithiam Lalber chuan Isua chu a zirtirte chanchin leh a zirtirzia thu a zawt a.

²⁰Isua'n a chhang a, a hnenah, "Khawvel mi hnenah, vantlang hriatin thu ka sawi thin kha; inkhawmna in leh Pathian biak in, Juda zawng zawng awm khawmnaahte chuan ka zirtir fo thin kha, arukin engmah ka sawi lo.

²¹Engati nge kei mi zawh? An hnena ka thu sawizia chu ka thu hretu zawt rawh; ngai rawh, chung chuan ka thusawi chu an hria alawm," a ti a.

²²Chu chu a sawi veleh a kianga ding tiangkengtu pakhatin Isua a beng a, "Puithiam Lalber heti hian i chhang maw?" a ti a.

²³Isua'n a hnenah, "Thu sual sawi ka nih chuan ka sualna mi hriattir rawh; nimahsela thu tha ka sawi pawhin engah nge mi ben?" a ti a, a chhang a.

²⁴Tin, Ana chuan phuar chungin Puithiam Lalber Kaiapha hnenah a tir a.

²⁵Tin, Simon Petera'n dingin mei lum a ai a. Tin, "Nang pawh a zirtir zinga tel ve i ni em?" an ti a. Ani chuan, "Ka ni lo," tiin a pha a.

²⁶Tin, Puithiam Lalber bawih pakhat, Petera beng sah thlaka laichin chuan, "A hnenah huanah khan ka hmu lo che em ni?" a ti a.

²⁷Tichuan Petera a pha leh a; tin, ar a khuang ta nghal a.

²⁸Tin, Isua chu Kaiapha in atang chuan lal inah an hruai leh a; zing a ni a; tin, anni zawng lal inah an lut lo, an luh zawngin an bawlhhlawh ang a, Kalhlen Kut chaw an ei thei lo ang.

²⁹Tin, Pilata an hnenah a va chhuak a, an hnenah, "He mi chungah hian thupawi eng nge in neih?" a ti a.

³⁰Anni chuan a hnenah, "He mi hi mi sual ni suh se la i hnenah kan rawn hruai lo vang," an ti a, an chhang a.

³¹Tin, Pilata chuan an hnenah, "Nangni'n hruai u langin, in dan angin a thu rel rawh u," a ti a. Judate chuan a hnenah, "Keini thuin tumah tihhlum dan a ni lo," an ti a.

³²(A thihzia tur thu, Isua'n a sawi anga a thlenna'n).

³³Chutichuan Pilata chu a inah a lut leh a, Isua a ko a, a hnenah, "Judate lal i ni em?" a ti a.

³⁴Isua'n, "Hei hi nangma rilru puak chhuaka i sawi nge, mi dangin an hrilh che, ka chungchang thu hi?" a ti a, a chhang a.

³⁵Pilata'n, "Kei Juda kan ni em ni? Nangma chite leh puithiam lalte'n ka hnenah an rawn hruai che a nih hi; thil eng nge i tih?" a ti a, a chhang a.

³⁶Isua'n, "Ka ram chu he khawvela mi hi a ni lo; ka ram chu he khawvela mi hi ni se la, ka thuihruaiten an bei ang, Judate hnena peka ka awm lohna'n; nimahsela ka ram zawng heta mi hi a ni lo," a ti a, a chhang a.

³⁷Tin, Pilatan a hnenah, "Chu, lal i ni elo?" a ti a. Isua'n, "Ni e, lal ka ni a sin. Thutak hriattir hi ka pian chhan leh khawvela ka rawn kal chhan a ni. Tupawh thutaka mi apiangin ka thu an pawm thin," a ti a.

³⁸Pilatan a hnenah, "Thutak eng nge ni?" a ti a. Tin, chu thu chu a sawi zawh veleh, Judate hnenah a va chhuak leh a, an hnenah, "Engmah a sualna ka hmu lo.

³⁹Nimahsela, Kalhlen Kutah mi pakhat ka chhuahsak tur che u dan in nei; chutichuan Judate lal hi chhuahsak che u i la in duh em?" a ti a.Tin, anni chu an au leh a, "He mi hi chu ni suh se, Barabba kha ni zawk rawh se," an ti a. Barabba chu suam hmang a ni.

⁴⁰Tin, anni chu an au leh a, "He mi hi chu ni suh se, Barabba kha ni zawk rawh se," an ti a. Barabba chu suam hmang a ni.