Read Baibul, Mizo Johana 2 Bible Online

Johana 2 - Baibul, Mizo bible

Johana 2

¹Tin, ni thum niah, Galili rama Kana khuaah lawi chaw a awm a, chutah chuan Isua nu a awm.

²Isua leh a zirtirte pawh lawi chaw eiah an sawm a.

³Tin, uain-in a daih ta lo a, Isua nu chuan a hnenah, "Uain an tlachham ta e," a ti a.

⁴Tin, Isua'n a hnenah, "Hmeichhia, nanga mi lo hriatsak tur eng nge awm? ka hun a la thleng lo e," a ti a.

⁵Tin, a nuin rawngbawltute hnenah, "In hnena a sawi apiang chu ti zel ang che u," a ti a.

⁶Tin, Judate silfai dan angin lung tuibel paruk, buk sawmli hmun hnih emaw, hmun thum emaw leng theuh, chutah chuan an hung a.

⁷Tin, Isua'n an hnenah, "Tuibelahte tui tikhat rawh u," a ti a. Tin, a rawng rualin an tikhat theuh a.

⁸Tin, an hnenah, "Tunah thal u la, ruaitheh fatu hnenah kalpui rawh u," a ti a. Tin, an kalpui ta a.

⁹Tin, ruaitheh fatu chuan tui uain-a lo chang ta chu a tem a, a chhuahna chin a hre lo a, (tui thal rawngbawltute erawh chuan an hria a) nupui nei tura chu a ko ta a,

¹⁰a hnenah, "Mi tinin atirin uain tha an dah chhuak thin, tin, a tam deuh an in hnuin a tha lo deuh chu an dah chhuak thin; nang zawngin tun thlengin uain tha i la vawn hi," a ti a.

¹¹Isua'n he a chhinchhiahna tih tantirhna hi Galili ram Kana khuaah chuan a ti a, a ropuizia a lantir ta a; tin, a zirtirte chuan ani chu an ring a.

¹²Tin, chu mi hnuah chuan Kapernaum khuaah a zuk kal a, amah leh a nu nen, a unaute nen, a zirtirte nen; chutah chuan ni rei lo te an awm a.

¹³Tin, Judate Kalhlen Kut a hnai tawh a, Isua Jerusalem khuaah a han kal a.

¹⁴Tin, Pathian biak ina sebawngte, beramte, thurote zuartuho leh, tangka thlengtuho thu a hmu a.

¹⁵Tin, hruihrualin vuakna a siam a, beram leh sebawng azain Pathian biak in atang chuan a hnawt chhuak a, tangka thlengtute tangka chu a leihbua a, an dawhkante a namthluksak bawk a;

¹⁶tin, thuro zuartute hnenah chuan, "Heng thil hi heta tangin kalpui rawh u, ka Pa in sumdawnna inah siam suh u," a ti a.

¹⁷(Tin, "I ina ka thahnemngaihin mi ei zo ang," tih ziak a ni tih, a zirtirte chuan an hre leh ta a).

¹⁸Chutichuan Judaten a hnenah, "Heng thil i tih hi chhinchhiahna eng nge min hmuhtir theih?" an ti a, an chhang a.

¹⁹Isua'n an hnenah, "He in hi tichhia u lang, ni thum chhungin ka tungding leh ang," a ti a, a chhang a.

²⁰Tin, Judate chuan, "He in hi kum sawmli leh kum ruk sak a ni, nangin ni thum chhungin i tungding ang maw?" an ti a.

²¹(Nimahsela a taksa in thu sawi a lo ni zawk si.

²²Chuvangin, mitthi zing ata a thawhlehin, chu mi thu chu a saiw tawh tih a zirtirten an hre leh ta a; tin, Pathian Lehkha Thu leh Isua thusawi chu an ring ta a).

²³Tin, Kalhlen Kuta Jerusalem khuaa a awm lai chuan a thilmak tihte an hmu a, mi tam takin a hming an ring ta a.

²⁴Nimahsela Isua chu an lakah a ngampa lo, mi zawng zawng a hriata,mihring thu tumaha hrilhfiah a ngaih loh avangin; amahin mihring chhunga awm apiang chu a hre si a.

²⁵mihring thu tumaha hrilhfiah a ngaih loh avangin; amahin mihring chhunga awm apiang chu a hre si a.