Read Baibul, Mizo Johana 20 Bible Online

Johana 20 - Baibul, Mizo bible

Johana 20

¹Tin, ni sarih ni hmasa berah, zingah, khua a la thim laiin, Mari Magdalini chu thlanah chuan a va kal a, lung chu thlan ata lak sawnin a hmu a.

²Chutichuan a tlan a, Simon Petera leh zirtir dang Isua'n a hmangaiha hnenah chuan a lo kal a, an hnenah, "Thlan ata kha Lalpa chu an kal bopui ta, an dahna chin ka hre si lo," a ti a.

³Chutichuan Petera chu a chuak a, zirtir dang nen chuan, tin, thlan lam an pan a.

⁴Tin, an tlan dun a; zirtir dang chuan Petera a tlan khalh a, thlan chu a thleng hmasa a.

⁵Tin, a kun a, a bih a, puan zai sinte chu awm rengin a hmu a; nimahsela a chhungah a lut lo.

⁶Tin, Simon Petera pawhin a hnungah a rawn um thleng a, thlan chhungah a lut a; puan zai sinte chu awm reng leh,

⁷a lua inhrukna puan awm chu, puan zai sinte zinga awm loin, zial sain hmun hranga awm a hmu a.

⁸Chutichuan zirtir dang thlan thleng hmasaa pawh chu a lut ve a, a hmu a, a awih a.

⁹Mitthi zing ata a tho leh tur a ni tih Pathian Lehkha Thu kha an la hre si lo.

¹⁰Chutichuan zirtirte chu anmahni inah an haw leh ta a.

¹¹Nimahsela Mari chu pawnah thlan kiangah tap chungin a ding a; tichuan tap chungin a kun a, thlan chhung chu a bih a;

¹²tin, vantirhkoh pahnih puan var sinin, Isua ruang zalhna hmunah chuan, pakhat a lu lamah, pakhat a ke lamah thu a hmu a.

¹³Tin, anni chuan a hnenah, "Hmeichhia, engati nge i tah?" an ti a. Ani chuan an hnenah, "Ka Lalpa an kal bopui a, an dahna chin ka hriat loh avangin," a ti a.

¹⁴Tin, chutia a sawi veleh a hnung lam a hawi a, Isua ding a hmu a, Isua a ni tih a hre si lo a.

¹⁵Isua'n a hnenah, "Hmeichhia, engati nge i tah? Tunge i zawn?" a ti a. Ani chuan huan enkawltu emaw a ti a, a hnenah, "Ka pu, amah heta ta i kalpui a nih chuan i dahna chin mi hrilh ang che, chutichuan ka la ang," a ti a.

¹⁶Isua'n a hnenah, "Mari," a ti a. Ani chu a hawi a, a hnenah Hebrai tawngin, "Rabboni," a ti a; (chu chu Zirtirtu tihna a ni a).

¹⁷Tin, Isua'n a hnenah, "Mi vuan tawh suh; tun thleng pawhin Pa hnenah ka la lawn chho lo a ni; amaherawhchu ka unaute hnenah va kal la, an hnenah, 'Ka Pa, in Pa, a Pathian, in Pathian hnenah ka lawn chho dawn,' a ti e, ti rawh," a ti a.

¹⁸Mari Magdalini chu a va kal a, zirtirte hnenah, "Lalpa chu ka hmu ta," a ti a, a hnena thu a sawiziate pawh chu a hrilh a.

¹⁹Tin, chu mi ni, ni sarih ni hmasa berah, khua a lo tlai lamin, Judate hlauh avanga zirtirte awmna kawngkharte chu an khar hnu chuan, Isua an zingah a lo ding a, an hnenah, "In chungah thlamuanna awm rawh se," a ti a.

²⁰Tin, chu chu a sawi zawh chuan a kut leh a nak an hnenah a entir a. Tin, Lalpa chu an hmuh chuan zirtirte chu an lawm ta a.

²¹Tin, Isua'n an hnenah, "In chungah thlamuanna awm rawh se; Pain kei mi tir ang bawkin ka tirh che u hi," a ti leh a.

²²Tin, chung thu chu a sawi zawhin an chungah a thaw a, an hnenah "Thlarau Thianghlim nei rawh u; tu sual pawh in ngaihdam apiang ngaihdam a ni ang;

²³tu sual pawh in ngaihdam loh apiang ngaihdam loh a ni ang," a ti a.

²⁴Tin, Isua a lo kal lai khan sawm leh pahnihte zinga tel ve Thoma, Phira an tih chu, an hnenah a awm ve lo a.

²⁵Chutichuan zirtir dangte chuan a hnenah, "Lalpa chu kan hmu ta," an ti a. Nimahsela ani chuan an hnenah, "A kuta thir khenna serte kha ka hmuh a, thir khenna serahte chuan ka kutzung ka khawih luh a, a naka ka zen meuh loh chuan ka ring lo ang," a ti a.

²⁶Tin, ni riat hnuah, a zirtirte chu in chhungah an awm leh a, Thoma pawh an hnenah a awm ve a. Tin, Isua a lo kal a, kawngte chu khar a ni si a, an zingah a lo ding ta a, an hnenah, "In chungah thlamuanna awm rawh se," a ti a.

²⁷Tin, Thoma hnenah chuan, "I kutzungin han khawih la, ka kutte en rawh; i kut han ban la, ka nakah zen rawh; ring loin awm suh la, ring rawh," a ti a.

²⁸Thoma'n a hnenah, "Ka Lalpa leh ka Pathian i ni," a ti a, a chhang a.

²⁹Isua'n a hnenah, "Nang chuan mi hmuh avangin i ring a ni; hmu loa ring apiang te chu an eng a thawl e," a ti a.

³⁰Tin, Isua'n zirtirte hmaah chuan chhinchhiahna dang tam tak a ti teuh a, chung chu he lehkhabuah hian ziak a ni lo;nimahsela he'ng hi Isua chu, Krista, Pathian Fapa a ni tih in rinna tur leh, in rin a, a hminga nun in neihna turin ziak a ni.

³¹nimahsela he'ng hi Isua chu, Krista, Pathian Fapa a ni tih in rinna tur leh, in rin a, a hminga nun in neihna turin ziak a ni.