Read Baibul, Mizo Johana 21 Bible Online

Johana 21 - Baibul, Mizo bible

Johana 21

¹Chu mi hnuah chuan Tiberia dilah Isua a zirtirte hnenah a inlar leh a; heti hian a inlar:

²Simon Petera te, Thoma (Phira an tih) te, Galili rama Kana khuaa mi Nathanaela te, Zebedaia fapa pahnihte leh a zirtir dang pahnihte an awm khawm a.

³Simon Petera chuan an hnenah, "Sangha manin ka kal dawn e," a ti a. Anni chuan a hnenah, "Keini pawh i hnenah kan kal ve ang," an ti a. Tin, an kal chhuak a, lawngah an chuang a; chu mi zan chuan engmah an man lo.

⁴Tin, khawfing chahin Isua tiauphovah a ding a; nimahsela zirtirte chuan Isua a ni tih an hre si lo.

⁵Tin, Isua'n an hnenah, "Naute u, ei tur engilo in nei em?" a ti a. Anni chuan a hnenah, "Nei lo," an ti a, an chhang a.

⁶Tin, ani chuan an hnenah, "Lawng sir ding lamah khan len deng u lang in hmu ang," a ti a. Tin, an deng a, sangha tam avangin an hnuk chhuak zo ta lo a.

⁷Chutichuan, zirtir Isua'n a hmangaiha khan, Petera hnenah, "Lalpa a nih saw," a ti a. Chutichuan Lalpa a ni tih Simon Petera'n an hriat veleh a kawr a veng a, (saruaka awm a ni si a), dilah a zuang thla ta a.

⁸Nimahsela zirtir dangte chuan lawng te tak te chuan len, sangha chawpa hnuk chungin an rawn pan a, (khawmual atangin an hla si lo a, tawng zahnih emaw lek a ni a).

⁹Tin, khawmuala an chhuah veleh, chutah chuan meihawla mei chhem an hmu a, a chunga sangha leh chhangper rawh nen.

¹⁰Tin, Isua'n an hnenah, "Tunah in sangha man kha a then han la rawh u," a ti a.

¹¹Chutichuan Simon Petera a va chuang a, len chu sangha lian pui puia khatin khawmualah a hnuk chhuak a, za leh sawmnga leh pathum a ni; chuti zozai chu awm mah se la len chu a tet si lo.

¹²Tin, Isua'n an hnenah, "Tukthuan lo ei rawh u," a ti a. Tin, zirtirte zingah tumahin a hnenah, "Tunge i nih?" tiin an zawt ngam lo, Lalpa a ni tih an hre reng a.

¹³Tin, Isua a lo kal a, chhangper chu a la a, an hnenah a pe a, sanghate pawh chu chutiangin a pe bawk a.

¹⁴Chu chu Isua mitthi zinga ata a thawhleh hnua a zirtirte hnena a inlar a vawi thumna a ni.

¹⁵Tin, tukthuan an ei zawhin, Isua'n Simon Petera hnenah chuan, "Simon, Johana fapa, hengte ai hian nangin kei mi hmangaih zawk em?" a ti a. Ani chuan a hnenah," Aw, Lalpa; ka ngaina che tih i hria e," a ti a. Ani chuan a hnenah, "Ka beram note chawm rawh," a ti a.

¹⁶Tin, a vawi hnihnaah a hnenah, "Simon, Johana fapa, nangin kei mi hmangaih em?" a ti leh a. Ani chuan a hnenah, "Aw, Lalpa, ka ngaina che tih i hria e," a ti leh a. Ani chuan a hnenah, "Ka beramte enkawl rawh," a ti a.

¹⁷Tin, a vawi thumnaah chuan a hnenah, "Simon, Johana fapa, nangin kei mi ngaina em? a ti a. Tin, a vawi thumnaah, "Nangin mi ngaina em?" a hnena a tih avang chuan Petera a lungngai a, a hnenah, "Lalpa, engkim i hria a, ka ngaina che tih i hria e," a ti a. Isua'n a hnenah, "Ka beramte chawm rawh.

¹⁸Tih tak meuhin, tih tak meuhin ka hrilh a che, i naupan lai khan i taiah i inhreng a, i duhna apiangah i kal thin a; nimahsela i upat hunah i kutte i phar ang a, mi dangin an hrensak ang chia, i duh lohna lamah an kai ang che," a ti a.

¹⁹(Chung thu chu engtiziaa thiin nge Pathian a chawimawi ang tih hriattirna'n a sawi a ni). Tin, chu chu a sawi zawhin, a hnenah, "Mi zui rawh," a ti a.

²⁰Tin, Petera chu a hawi a, Isua'n zirtir a hmangaih, zanriah ei laia a awm nghenga lo thle phei a, "A mantirtu tur che chu tu ber nge ni?" titua khan a rawn zui a hmu a.

²¹Tin, Petera'n a ni chu a hmu a, Isua hnenah, " Lalpa he mi hian e nge a tih ang?", a ti a.

²²Isua'n a hnenah, "Ka lo kal leh thlenga awm rengah phei duh i la, chu chu enga i hman tur nge ni? Nangin mi zui mai rawh," a ti a.

²³Chutichuan chu zirtir chu thi lo turin a thu chu unaute zingah chuan a thang ta a; nimahsela Isua'n a thi lo ang tih a hnenah a sawi si lo, "Ka lo kal leh thlenga awm rengah phei duh i la, chu chu enga i hman tur nge ni?" a ti mai a ni si a.

²⁴Chu zirtir chu he'ng thu hriattirtu leh ziaktu hi a ni; a thu hriattir hi dik tak a ni tih kan hria e.Tin, he'ng lo hi Isua thiltih a dang tam tak a la awm, chung chu ziak fai vek ni dawn se la, lehkhabu ziak tur zawng zawng chu khawvelah pawh hian lengin ka ring lo.

²⁵Tin, he'ng lo hi Isua thiltih a dang tam tak a la awm, chung chu ziak fai vek ni dawn se la, lehkhabu ziak tur zawng zawng chu khawvelah pawh hian lengin ka ring lo.