Read Baibul, Mizo Johana 4 Bible Online

Johana 4 - Baibul, Mizo bible

Johana 4

¹Tin, Isua'n Johana aiin zirtir tam zawk a siam leh a baptis tih Pharisaite'n an hria tih Lalpa chuan a hriat veleh,

²(nimahsela Isua meuh chuan a baptis lo, a zirtirten an baptis zawk thin),

³Judai ram chu a kalsan a, Galili ramah a kir leh ta a.

⁴Tichuan Samari ram a kal tlang tur a ni.

⁵Chutichuan Samari ram khaw pakhat Sukar an tih chu a lo thleng a, Jakoba'n a fa Josefa hnena hmun a pek kiang kha;

⁶Jakoba tuichhunchhuah pawh kha chutah chuan a awm. Chutichuan Isua chu a kal hah avangin tuichhunchhuah sirah chuan a thu chawt a: chawfak hun lai a ni a.

⁷Tin, Samari hmeichhe pakhat tui chawiin a lo kal a. Isua'n a hnenah, "In tur mi pe rawh," a ti a.

⁸(A zirtirte lah chu ei tur leiin khuaah an kal tawh si a).

⁹Chutichuan Samari hmeichhia chuan a hnenah, "Nang Juda mi i ni si a, kei Samari hmeichhia ka ni si a, engtizia nge ka hnena in tur mi dil?" a ti a. (Judaten Samari mite engah mah an hmang ngai si lo).

¹⁰Tin, Isua'n a chhang a, a hnenah, "Pathian thilpek leh, 'In tur mi pe rawh,' i hnena titu hi hria la chu, nangin a hnenah i dil zawk tur a ni a, tin, ani'n tui nung a pe tawh tur che a ni," a ti a.

¹¹Tin, hmeichhia chuan a hnenah, "Ka pu, khaina engmah i nei si lo a, tuichhunchhuah a thuk vei nen, khawi ata nge tui nung chu i hmuh?

¹²Kan pu Jakoba aiin i ropui zawk em ni? Ani chuan he tuichhunchhuah hi min pe a, amah pawhin a in a, a fapate, a rante nen," a ti a.

¹³Tin, Isua'n a chhang a, a hnenah, "Tupawh he tui in apiang an tuihal leh ang;

¹⁴tupawh an hnena ka pek tur tui in apiang erawh chu kumkhuain an tuihal lo ang, keiin an hnena tui ka pek tur chu an kawchhungah tui hna a lo awm ang a, chatuana nun thlengin a chik chho ang," a ti a.

¹⁵Tin, hmeichhia chuan a hnenah, "Ka pu, chu tui chu mi pe rawh, ka tuihal lohna'n leh, he'ng thleng thlenga tui chawi tura ka lo kal thin lohna'n," a ti a.

¹⁶Tin, Isua'n a hnenah, "I pasal va ko la, hetah lo haw leh ang che," a ti a.

¹⁷Tin, hmeichhia chuan a hnenah, "Pasal ka nei hlei nem," a ti a, a chhang a. Isua'n a hnenah, " 'Pasal ka nei hlei nem' i tih hi i tidik e;

¹⁸pasal panga i nei tawh, tuna mi i neih hi i pasal a ni lo reng a ni, he thu hi i tidik e," a ti a.

¹⁹Hmeichhia chuan a hnenah, "Ka pu, zawlnei i ni tih ka hre ta.

²⁰Keini thlahtute chuan he tlangah hian Pathian chibai an buk thin; nimahsela nangni zawngin, 'Mihringin Pathian chibai an bukna hmun tur chu Jerusalem khuaah a awm,' in ti thin," a ti a.

²¹Tin, Isua'n a hnenah, "Hmeichhia, ka thu awih rawh, he tlangah kher lo pawh, Jerusalem khuaah kher lo pawh Pa chibai in buk hun a thleng dawn ta.

²²Nangni'n in hriat loh chibai in buk thin; keini zawngin kan hriata chu chibai kan buk thin. Chhanhimna Judate hnen ata a lo chhuak dawn si a.

²³Chutichuan a hun a thleng dawn ta, tunah pawh a thleng tawh mek, chu mi hunah chuan Pathian chibai buktu taktakten thlarau leh tih tak zetin Pa chibai an buk ang, Pain chutiang mi chu a chibai buktu turin a zawng a ni.

²⁴Pathian chu Thlarau a ni; a chibai buktuten thlarau leh tih tak zetin chibai an buk tur a ni," a ti a.

²⁵Tin,hmeichhia chuan a hnenah, "Messia, Krista an tih chu a lo kal dawn tih ka hria, ani chu a lo kal hunah engkim min la hrilh ang," a ti a.

²⁶Tin, Isua'n a hnenah, "Keimah a betu che hi amah chu ka ni a sin," a ti a.

²⁷Tin, chutih lai chuan a zirtirte chu an lo kal a, hmeichhia a bia chu mak an ti hle a; nimahsela tuma'n, "Engnge i zawn? Engati nge hmeichhia i biak?" pawh an ti lo.

²⁸Tin, hmeichhia chuan a tuibel a kalsan a, khuaah a kal a, mite hnenah,

²⁹Ka thil tih apiang min hrilh zeltu mi pakhat a awm a, lo kal u la, en teh u; Krista a ni thei awm em?" a ti a.

³⁰Tin, anni chu khua ata chu an lo chhuak a, a hnen lam an pan ta a.

³¹Chu mi hlanin zirtirte chuan a hnenah, "Zirtirtu ei rawh," an ti chiam a.

³²Nimahsela ani chuan an hnenah, "Chaw, in hriat loh ei tur ka nei e," a ti a.

³³Tin, zirtirte chu an inbia a, "A ei tur miin an rawn kensak em ni chu le?" an inti a.

³⁴Tin, Isua'n an hnenah a sawi a, "Mitirtu duhzawng tih leh, a hna thawh zawh tur hi ka chaw a ni.

³⁵Nangni'n, 'Buh sengna tur thla li a la awm,' in ti lo'm ni? Ngai rawh u, ka hrilh a che u, dak u lang lote en rawh u, tun apangin seng turin a eng a ni.

³⁶A attuin hlawh a hmu thin a, chatuana nun thlenga awm turin rah a seng thin, a tuhtu leh a attu an lawm dun theihna'n.

³⁷'Pakhatin a tuh thin a, mi dangin a at thin,' tih thu hi, chu miah chuan a dik hle a ni.

³⁸In thawhrim loh at turin ka tirh che u kha; mi dangin an thawk a, nangni'n an thawhsa chu in chhunzawm a ni," a ti a.

³⁹Tin, hmeichhia chuan, "Ka thiltih apiang mi hrilh zel," ti a, a hriattir thu avang khan, chu mi khuaa awm Samari mi tam takin Isua an ring ta a.

⁴⁰Chutichuan Samari mite chu Isua hnenah an lo kal a, an hnena awmah an ngen chiam a; tichuan chutah chuan ni hnih a cham a.

⁴¹Tin, mi dang tam takin ama thu avangin an ring ve ta a:

⁴²tin, anni chuan hmeichhe hnenah chuan, "Tunah zet chuan i thu sawi avanga ring kan ni ta lo; keimahni ngeiin a thu kan hria a, he mi hi khawvel Chhandamtu a ni ngei tih kan hre ta," an ti a.

⁴³Tin, chu mi ni hnih hnuah chuan chuta tangin a chhuak a, Galili ramah a kal ta a.

⁴⁴Isua ngeiin, zawlnei chu ama khaw lamah chuan chawimawiin a awm ngai lo tih a hriattir si thin a.

⁴⁵Chutichuan Galili ram a lo thlenin Galili rama miten an lo lawm a, Jerusalem khuaa kut laia a thiltih zawng zawng an hmuh avang khan; anni pawh chu kutnaah chuan an kal ve si a.

⁴⁶Tin, Galili rama Kana khua, tui uain-a a chantirna kha a lo thleng leh a. Tin, upa tu emaw a awm a, a fapa Kapernaum khuaah a dam lo a.

⁴⁷Tin, Isua Judai ram ata Galili ramah a lo kal tih a hriat veleh a hnenah a han kal a, a fapa zuk tidam turin a ngen chiam a, a thi lek lek si a.

⁴⁸Tin, Isua'n a hnenah, "Chhinchhiahnate leh thilmakte in hmuh loh chuan in ring tawp lo ang," a ti a.

⁴⁹Tin, upa chuan a hnenah, "Ka pu, ka fa thih hmain lo chhuk ta che," a ti a.

⁵⁰Tin, Isua'n a hnenah, "Haw leh ta mai rawh, i fapa chu a dam tawh e," a ti a. Tin, chu mi chuan Isua'n a hnena thu a sawi chu a ring a, a kal ta a.

⁵¹Tin, a kal chhuk lai mekin a bawihten an lo hmuak a, "I fapa chu a dam ta," an lo ti a.

⁵²Tin, ani chuan an hnenah a dam tirh lai a zawt a. Tin, anni chuan a hnenah, "Niminah ni her chauhin a khawsik a reh ta a ni," an ti a.

⁵³Chutichuan a pain Isua'n a hnenah, "I fapa chu a dam tawh e," a tih lai tak chu a ni tih a hre ta a; tin, amah leh a chhungten an zain an ring ta a.Chu chu Isua'n a chhinchhiahna tih a vawi hnihna a ni, Judai ram ata Galili rama a lo kalin.

⁵⁴Chu chu Isua'n a chhinchhiahna tih a vawi hnihna a ni, Judai ram ata Galili rama a lo kalin.