Read Baibul, Mizo Johana 5 Bible Online

Johana 5 - Baibul, Mizo bible

Johana 5

¹Chung thil hnuah chuan Judate kut pakhat a awm a; Isua Jerusalem khuaah a han kal a.

²Tin, Jerusalem-ah chuan beram kawngkhar kiangah dil a awm a, chu chu Hebrai tawngin Bethesda an ti a, hulhliap panga a nei nghe nghe a.

³Chungah chuan damlo te, mitdel te, kebai te, zengte tam tak an mu hlawm a.

⁴Dilah chuan vantirhkoh a zuk kal thin a, tui a tifawn thin; tichuan, tui a lo fawn huna zuang lut hmasa ber chu eng natnaa na pawh ni se, a lo dam thin a ni.

⁵Tin, chutah chuan kum sawmthum leh kum riat na mi tu emaw a awm a.

⁶Tin, Isua'n a mu chu a hmu a, chutiangin rei tak a awm tawh tih a hria a, a hnenah, "Tihdam i duh em?" a ti a.

⁷Tin, mi damlo chuan, "Ka pu, tui a fawnin dila mi dahtu ka nei lo a, ka kal chhungin mi dangin mi pen thlak khalh thin," a ti a, a chhang a.

⁸Tin, Isua'n a hnenah, "Tho la, i awngphah la la, kein kal tawh rawh," a ti a.

⁹Tin, thawklehkhatan chu mi chu a dam ta nghal a,a awngphah chu a la a,a kal ta a. Chu mi ni chu Chawlhni a ni a.

¹⁰Chutichuan Judaten a dam taa hnenah chuan, "Chawlhni a nih hi, i awngphah i lak a thiang lo e," an ti a.

¹¹Tin, ani chuan an hnenah, "Mi tidamtu ngeiin ka hnenah, 'I awngphah la la, kein kal tawh rawh,' mi ti a ni," a ti a, a chhang a.

¹²Tin, anni chuan a hnenah, " 'I awngphah la la, kein kal tawh rawh,' i hnena titu chu tu nge ni?" an ti a, an zawt a.

¹³Nimahsela a dama chuan tu nge a nih a hre lo a, chutah chuan mipui an awm avangin Isua a kal bo ta si a.

¹⁴Nakinah chuan Isua'n ani chu Pathian biak inah a hmu a, a hnenah, "Ngai rawh, i dam tak hi, thil tisual leh tawh su, chutilochuan thil tha lo lehzual i chungah a lo awm dah ang e," a ti a.

¹⁵Tin, chu mi chu a va kal a, Judate hnenah chuan a tidamtu chu Isua a ni tih a hrilh a.

¹⁶Chutichuan Chawlhnia chung thilte chu a tih avangin Judaten Isua an tiduhdah ta a.

¹⁷Nimahsela Isua'n anni chu a bia a, an hnenah, "Ka Pain tun thleng pawhinhna a thawk reng a ni, kei pawhin ka thawk ve a ni," a ti a.

¹⁸Chutichuan Judaten tihhlum an tum lehzual a, Chawlhni a bawhchhiat avang chauh pawh a ni lo a, Pathian ama Paah a vuah a, Pathian tluka a insiam avang pawhin a ni.

¹⁹Tin, Isua'n an hnenah, "Tih tak meuhin, tih tak meuhin ka hrilh a che u, Fapain mahniin engmah a ti thei lo, Pa thiltih a hmuhchauh lo chu; thil a tih ang apiang chu, Fapa pawhin a ti ve thin.

²⁰Pain Fapa a hmangaih a, a thiltih apiang a hnenah a entir thin; he'ng aia thiltih ropui zawk hi a hnenah a la entir ang, mak in tih atan.

²¹Pain mitthite a kai tho a, a tinung thin angin, Fapa pawhin a duh apiang a tinung thin.

²²Pain tuma thu a relsak ngai lo, thu zawng zawng Fapa a reltir ta zawk;

²³mi zawng zawngin Pa an zah angin, Fapa pawh an zahna turin. Tupawh Fapa zah lo chu, Pa a tirtu pawh chu zah lo a ni.

²⁴Tih tak meuhin, tih tak meuhin ka hrilh a che u, tupawh ka thu hriaa mi tirtu ring chuan, chatuana nunna a nei tawh, thiam lohin a awm lo a, thihna ata a chhuak a, nunnaah a lut ta zawk a ni.

²⁵Tih tak meuhin, tih tak meuhin ka hrilh a che u, a hun a thleng dawn ta, tunah pawh a thleng tawh mek, chutih hunah chuan mitthiten Pathian Fapa aw an hria ang a, a hria apiang an nung ang.

²⁶Pain mahnia nun a nei ang bawkin Fapa pawh mahnia nun neiin a siam:

²⁷tin, Mihring Fapa a nih avangin a hnenah rorel tur thu a pe.

²⁸Heng hi mak ti suh u, a hun a thleng dawn ta, chutih hunah chuan thlana awm zawng zawngin a aw an hria ang a, an chhuak vek ang;

²⁹thil tha titute chu nunna changing an tho leh ang a, thil sual titute chu thiam loh changing an tho leh ang.

³⁰Keimahin engmah ka ti thei lo: benga ka hriat ang zelin ro ka rel thin; ka rorel chu dik tak a ni, keima thu thuin awm ka tum lo a, mi tirtu thu thu zawka awm ka tum thin avangin.

³¹Mahni chanchin hriattir i la, ka thu hriattir a dik lo ang.

³²Ka chanchin hriattirtu chu mi dang a ni; ani chuan ka chanchin a hriattir chu a dik tih ka hria.

³³Nangni'n Johana hnenah mi in tir a, tin, ani chuan thutak chanchin a lo hriattir kha.

³⁴Thu hriattir ka pawm erawh chu mihring thu a ni lo, nimahsela in damna turin he'ng thu hi ka sawi a nih hi.

³⁵Chu Johana chu khawnvar alh tak leh eng tak chu a ni, a engah chuan hlim rih in duh kha.

³⁶Nimahsela hriattirna ka neih hi Johana hriattirna thu ai khan a ropui zawk a ni: Pain thiltih zawh tura mi pek, ka thiltih ngei hian Pain mi tir tih ka chanchin a hriattir a ni.

³⁷Pa mi tirtu pawh chuan ka chanchin a hriattir tawh. Nangni'n eng tikah mah a aw in hre ngai lo a, a hmel pawh in hmu ngai hek lo.

³⁸A thu pawh in rilruah in pai reng lo, a tirha hi in rin loh avangin.

³⁹Pathian Lehkha in chhiar ngun thin, a chhungah chatuana nunna awmin in rin avangin: chung Lehkha chu ka chanchin hriattirtu chu a ni si a.

⁴⁰Nimahsela nunna nei turin ka hnenah in lo kal duh si lo.

⁴¹Mihring chawimawina ka zawng lo.

⁴²Nangni ka hria a che u, Pathian hmangaihna in rilruah in nei lo e.

⁴³Ka Pa hmingin ka lo kal a nih hi, nangni'n mi lawm si lo: mi dang mahni hmingin lo kal se la, ani chu in lawm ang.

⁴⁴Nangni inchawimawi tawn lawm te u, engtin nge in rin theih ang? Pathian tak chauha chhuak chawimawina chu in zawng si lo.

⁴⁵Keiin Pa hnena ka hek che u ring suh u: in hektu chu pakhat a awm, in rin Mosia hi.

⁴⁶Mosia in rin chuan kei pawh mi ring tawh tur in ni; ani chuan keima chanchin a sin a ziak ni.Nimahsela a thu ziak chu in rin si loh chuan engtin nge ka thu in rin ang?" a ti a.

⁴⁷Nimahsela a thu ziak chu in rin si loh chuan engtin nge ka thu in rin ang?" a ti a.