Read Baibul, Mizo Johana 6 Bible Online

Johana 6 - Baibul, Mizo bible

Johana 6

¹Chung thil hnuah chuan, Isua chu Galili dil, Tiberi dil an tih ral lehlamah chuan a kal ta a.

²Tin, damlote chunga chhinchhiahna a tihte chu an hmuh avangin mipui tam takin amah an zui a.

³Tin, Isua chu tlangah chuan a kal chho a, chutah chuan a zirtirte hnenah a thu a.

⁴Tin, Kalhlen Kut (Judate kut chu) a hnai tawh a.

⁵Tin, Isua a dak a, mipui tam takin a hnen lam rawn panin a hmu a, Philipa hnenah, "Hengho ei tur chhang khawi ata nge kan lei ang?" a ti a.

⁶Chung thu chu amah fiahna'n a sawi a ni, a tih tur chu amahin a hre reng si a.

⁷Tin, Philipa chuan a hnenah, "Mi tinin tlemtea an chan theuh tur pawh, duli zahnih man chhangin a daih lo ang," a ti a, a chhang a.

⁸Tin, a zirtirte zinga pakhat Simon Petera unau Andria chuan a hnenah,

⁹Barli chhangper panga leh sangha pahnih nei mipa naupang pakhat hetah a awm; nimahsela mi he'ng zozai zingah hian chung chu eng tham nge ni ang?" a ti a.

¹⁰Tin, Isua'n, "Mite chu thuttir rawh u," a ti a. Tin, chu mi hmunah chuan hlobet tam tak a awm. Chutichuan patlingte chu an thu a, an tam lam chu sangnga lai an ni a.

¹¹Tin, Isua'n chhangperte chu a la a, lawmthu a sawi zawhin a thuhote hnenah chuan a sem a, chutiang bawkin sanghate pawh chu an duh tawkin a sem bawk a.

¹²Tin, an kham hnuin, a zirtirte hnenah chuan, "Engmah bo lo turin a bang nawite char rawh u," a ti a.

¹³Chutichuan an char a, Barli chhangper panga eitute ei bang nawite chuanin bawmrang sawm leh pahnih an tikhat a.

¹⁴Tin, mite chuan chhinchhiahna a tih chu an hmuh veleh, "He mi hi zawlnei, khawvela lo kal tur kha a lo nih ngei hi," an ti a.

¹⁵Chutichuan amah chu lala siam tura man luih tumin an lo kal dawn tih Isua'n a hria a, tlangah amah chauhin a kal hrang leh ta a.

¹⁶Tin, khua a lo tlai lam chuan a zirtirte chu dilah chuan an zuk kal a;

¹⁷lawngah an chuang a, dilah chuan Kapernaum khua an pan a. Tin, khua a thim ta a, Isua lah chu an hnen a la thleng si lo.

¹⁸Thlipui nasa tak a tleh avangin tui a fawn sang telh telh si a.

¹⁹Tin, fing sawmhnih leh fing nga emaw, fing sawmthum emaw an kar chuan Isua chu dil chungah chuankea kala lawng rawn hnaihin an hmu a, an hlau a.

²⁰Nimahsela ani chuan an hnenah, "Keimah ka ni alawm, hlau suh u," a ti a.

²¹Chutichuan lawngah chuan chuantir an duh ta a; tin, chawplehchilhin lawng chuan an pan khawmual chu an thleng ta nghal a.

²²Atukah chuan dil ral lehlama mipui dingte chuan, lawng pakhat lo chu lawng dang a awm lo a, Isua chu a zirtirte hnenah lawngah chuan a chuang ve lo a, a zirtirte anmahni chauhin an kal tih an hria a.

²³(Nimahsela Lalpa'n lawmthu a sawi hnua chhang an eina hmun kiangah khan, Tiberi khua atangin lawng tete a lo thleng si a).

²⁴Chutichuan,mipui chuan Isua leh a zirtirte chu an awm ta lo tih an hriatin, anni pawh lawng teahte chuan an chuang a, Isua zawngin Kapernaum khua an lo thleng a.

²⁵Tin, dil rala an rawn hmuhin a hnenah, "Rabbi, engtikah nge he lam i lo thlen?" an ti a.

²⁶Tin, Isua'n an hnenah, "Tih tak meuhin, tih tak meuhin ka hrilh a che u, chhinchhiahnate in hmuh avanga mi zawng in ni lo a, chhangper in ei puar avang khan a nih zawk hi.

²⁷Chaw dangral mai umin phe phe suh u, chatuana nun thlenga awm reng tur chaw, Mihring Fapain a pek tur che u chu, umin phe zawk rawh u; Pa Pathian chuan ani chu a chhinchhiah tawh si a," a ti a, a chhang a.

²⁸Tin, anni chuan a hneh, "Pathian hna kan thawh theihna'n thil eng nge kan tih tur?" an ti a.

²⁹Tin, Isua'n an hnenah, "Pathian hnathawh chu hei hi a ni, a mi tirh hi ring u la," a ti a, a chhang a.

³⁰Tin, anni chuan a hnenah, "Chhinchhiahna eng nge i tih ang, kan hmuha kan rin theihna tur chein? Thil eng nge i tih ang?

³¹Kan thlahtuten thlalerah manna kha an ei thin, 'Van atang chuan an hnenah chhang ei tur a pe,' tih ziak angin," an ti a.

³²Tin, Isua'n an hnenah, "Tih tak meuhin, tih tak meuhin ka hrilh a che u, van atanga chhang in hmuh kha Mosia pek che u a ni lo, ka Pa erawh chuan van atangin chhang tak a pe che u a nih hi.

³³Pathian chhang chu van atanga lo chhuka khawvel hnena nun petu hi a ni," a ti a.

³⁴Tin, anni chuan a hnenah, "Lalpa, chu chhang chu kumkhuain min pe rawh," an ti a.

³⁵Tin, Isua'n an hnenah, "Kei hi nunna chhang chu ka ni; tupawh ka hnena lo kal chu a ril a tam lo ang, tupawh mi ring chu engtikah mah a tuihal lo ang.

³⁶Nimahsela nangni'n mi hmuh pawhin mi ring si lo tih ka hrilh che u kha.

³⁷Pain mi pek zawng zawng ka hnenah an lo kal vek ang; tupawh ka hnena lo kal chu ka hnawt chhuak tawp lo ang.

³⁸Mahni duhzawng ti turin van atanga lo chhuk ka ni lo a, mi tirtu duhzawng ti tura lo chhuk ka ni zawk e.

³⁹Hei hi mi tirtu duhzawng chu a ni, ani'n mi pek zawng zawng engmah hloh lo i la, ni kin niah chuan kai tho zawk i la.

⁴⁰Tin, hei hi ka Pa duhzawng a ni, tupawh Fa hmu a, ring apiangin chatuana nunna nei se la; tin, keiin ni kin niah chuan ani chu ka kai tho ang," a ti a.

⁴¹Tin, "Van atanga chhang lo chhuk chu ka ni," a tih avangin Judate chu a chungah an phunnawi a.

⁴²He mi hi Josefa fa, Isua a ni lo em ni, a nu leh pa pawh kan hriat hi? 'Van atanga lo chhuk kan ni,' eng ti tiha ti nge ni le?" an ti a.

⁴³Tin, Isua'n an hnenah, "Phun phunnawi suh u.

⁴⁴Pa mi tirtuin a hip loh chuan tumah ka hnenah an lo kal thei lo ang; tin, keiin ni kin niah chuan a lo kala chu ka kai tho ang.

⁴⁵Zawlneite lehkhabuah, 'Pathian zirtirin an awm vek ang,' tih ziak a ni. Mi tin Pa thu hriaa zir apiang chu ka hnenah an lo kal thin.

⁴⁶Tumahin Pa an hmu ngai ka ti lo, Pathian hnena lo chhuaka chauh lo chuan; ani chuan Pa chu a hmu.

⁴⁷Tih tak meuhin, tih tak meuhin ka hrilh a che u, tupawh a ring chuan chatuana nunna an nei tawh a ni.

⁴⁸Kei hi nunna chhang ka ni.

⁴⁹In thlahtuten thlalerah manna kha an ei na a, an thi a.

⁵⁰Hei hi van atanga chhang lo chhuk chu a ni, miin a eia a thih lohna'n.

⁵¹Kei hi van atanga chhang nung lo chhuk chu ka ni, tupawhin he chhang hi a ei chuan chatuanin a nung reng ang, a ni, khawvel nunna'na ka pek tur chhang chu ka tisa hi a ni," a ti a.

⁵²Chutichuan Judate an inhnial a, "He mi hian engtin nge a tisa ei turin min pek theih ang?" an ti a.

⁵³Tin, Isua'n an hnenah, "Tih tak meuhin, tih tak meuhin ka hrilh a che u, Mihring Fapa tisa in ei a, a thisen in a in bawk loh chuan, nangmahniin nunna nei hek lo che u.

⁵⁴Tupawh ka tisa eia ka thisen in chuan chatuana nunna a nei tawh, tin, ni kin niah chuan ani chu ka kaitho ang.

⁵⁵Ka tisa hi chaw tak a ni a, ka thisen hi in tur tak a ni si a.

⁵⁶Tupawh ka tisa eia ka thisen in chu, keimahah a awm reng thin, kei pawh amahah ka awm reng thin.

⁵⁷Pa nung chuan mi tir a, Pa zara nung ka ni ang bawkin, tupawh mi ei chu keima zarah ani pawh a nung ang.

⁵⁸Hei hi van atanga chhang lo chhuk chu a ni; chi thlahtute chuan chhang an ei a, an thi ang kha a ni lo, tupawh he mi chhang hi ei chu chatuanin a nung reng ang," a ti a.

⁵⁹Chung thu chu inkhawmna inah a sawi a, Kapernaum khuaa a zirtir lai khan.

⁶⁰Chutichuan a zirtirte a then tam takin chu chu an hriatin, "Hei hi thu khirh tak a ni, tu nge dawngsawng thei ang?" an ti a.

⁶¹Chutichuan chu mi thu-ah chuan a zirtirte an phunnawi tih Isua'n a rilruin a hria a, an hnenah, "He thu hian a tilungni lo che u elo?

⁶²Mihring Fapa hi hmana a awmna ngaia lawn chhova in hmuh chuan, engtin nge in tih ang le?

⁶³Tinungtu chu thlarau a ni, tisa chu engmahah a tlaktlai lo; in hnena thu ka sawite hi thlarau a ni, nunna pawh a ni.

⁶⁴Nimahsela in zingah a then ring lo in awm e," a ti a. (Isua'n a ring lotute leh a mantirtu tur chu a tir ata a hre reng si).

⁶⁵Tin, amah vek chuan, "Chuvangin a ni, in hnenah, 'Pain a puih loh chuan tumah ka hnenah an lo kal thei lo ang,' ka tih kha ni," a ti a.

⁶⁶Chu veleh chuan a zirtirte a then tam tak an kal bo a, amah an pawl leh ta lo a.

⁶⁷Chutichuan Isua'n sawm leh pahnihte hnenah chuan, "Nangni pawhin kal bo in duh ve em?" a ti a.

⁶⁸Tin, Simon Petera'n a hnenah, "Lalpa, tu hnenah nge kan kal ang? Nangin chatuana nunna thu i nei alawm.

⁶⁹Nang Pathian mi thianghlim chu i ni tih kan awih ta a, hriat pawh kan hria e," a ti a, a chhang a.

⁷⁰Tin, Isua'n an hnenah, "Nangni sawm leh pahnihte hi keima thlan inni lo'm ni? In zinga mi pakhat diabola a ni leh nghal vei nen," a ti a.(Iskariot Simona fapa Juda, sawm leh pahnihte zinga tel vea thu kha a sawi a ni,ani chu a mantirtu tur a ni si a).

⁷¹(Iskariot Simona fapa Juda, sawm leh pahnihte zinga tel vea thu kha a sawi a ni,ani chu a mantirtu tur a ni si a).