Read Baibul, Mizo Johana 7 Bible Online

Johana 7 - Baibul, Mizo bible

Johana 7

¹Chu mi zawhah chuan Isua'n Galili ram a fang a; Judaten amah tihhlum an tum avangin Judai ram chu a fang duh lo a.

²Tin, Judate Bawkte Kut chu a hnai tawh a.

³Chutichuan a unauten a hnenah, "Heta tangin Judai ramah va kal rawh, i zirtirte pawhin i thiltih hi an hmuh theihna'n.

⁴Tuma'n arukin thil engmah an ti lo, mahni hmingthan duh siin. Heng thilte hi i tih tak zet chuan khawvel hnenah inentir rawh," an ti a.

⁵(A unaute pawh chuan amah an ring si lo va).

⁶Tin, Isua'n an hnenah, "Ka hun a la thleng lo; nangni hun erawh chu kumkhuain a thleng reng a ni.

⁷Khawvelin nangni an haw thei lo a che u, kei erawh chu mi haw thin, an thiltihte a sual tih ka hrilhfiah thin avangin.

⁸Nangni kutnaah han kal rawh u, kei zawng tun kutah hian ka han kal dawn rih lo ve, ka hun a la thlen loh avangin," a ti a.

⁹Tin, chung thu chu an hnenah a sawi a, Galili ramah a la awm reng a.

¹⁰Nimahsela a unaute chu kutnaa an chhoh tak hnu chuan ani pawh vantlang hriat lohin, aruk angin a han kal ve a.

¹¹Tin, Judaten kutnaah chuan ani chu an zawng a, "Khawiah nge a awm?" an ti a.

¹²Tin, a chungah mipuite zinga mi an phunru sup sup a, a thenin, "Mi tha a ni e," an ti a; thenkhatin, "Hnai lo e, mipui a bum zawk thin a ni," an ti a.

¹³Nimahsela Judate an hlauh avangin tuma'n a chungchang thu an sawi lang lo.

¹⁴Tin, kut vang lai takin Isua Pathian biak inah a han kal a, a zirtir a.

¹⁵in, Judaten, "He mi hian zir ngai loin engtin nge lehkha a thiam?" an ti a, mak an ti hle a.

¹⁶Tin, Isua'n anni chu a chhang a, "Ka thu zirtir hi ka ta a ni lo a, mi tirtu ta a ni zawk.

¹⁷Tupawh ama duhzawng tih duh chuan, ka thu zirtir hi Pathian tihchhuah nge keima phuahchawpa ka sawi a hria ang.

¹⁸Tupawh mahni phuahchawp thu sawi chu, mahni mawina zawng a ni; a tirtu mawina zawng erawh chu, chu mi chu mi tak zet a ni, amahah chuan dik lohna reng a awm lo.

¹⁹Mosia'n Dan chu in hnenah a pe lo che u em ni? Nimahsela in zingah tumahin Dan chu in zawh si lo. Nangni'n engati nge mi tihhlum in tum?" a ti a.

²⁰Tin, mipui chuan, "Ramhuai zawl i nih hi; tuin nge tihhlum tum che?" an ti a, an chhang a.

²¹Tin, Isua'n a chhang a, a hnenah, "Thil pakhat ka tih kha nangni zawng zawngin mak in tih hi.

²²He mi avang a ni, Mosia'n serhtan thu kha a pek che u a, (Mosia tihchhuah a ni si lo a, thlahtute tihchauh a ni zawk si a,) Chawlhni pawha mi serh in tan thin ni.

²³Mosia Dan bawhchhiat lohna'n Chawlniah pawh mipain a serh a tantir si chuan, keiin Chawlhnia mi ka tihdam tak viah avangin ka chungah in thinur bik maw?

²⁴A lan angin ngaihtuah suh u la, fel takin ngaihtuah zawk rawh u," a ti a.

²⁵Tin, Jerusalem khuaa mi thenkhatin, "He mi hi tihhlum an tuma chu a ni lo'm ni?

²⁶En teh u, alangin thu a sawi a, a hnenah engmah an sawi si lo. Amah hi Krista a ni tih hotuten an hre ta tak zet em maw ni aw?

²⁷He mi hi a pianna chin lam kan hre si a, Krista erawh chu a lo thlen hunah chuan a pianna chin tuma'n an hre loing," an ti a.

²⁸Chuvang chuan Isua'n Pathian biak ina a zirtir pahin a au a, "Nangni'n mi hria e, ka pianna chin pawh in hria e. Nimahsela mahni thua lo kal ka ni lo, mi tirtu hi mi tak zet a ni, ani chu in hre si lo.

²⁹Kei erawh chuan ani chu ka hria; a hnen atanga lo chhuak ka ni a, ani chuan mi tir a ni si a," a ti a.

³⁰Chutichuan ani chu man an tum a, nimahsela a hun a la thlen loh avangin tuma'n an khawih si lo.

³¹Mipui a then tam tak erawh chuan ani chu an ring a, "Krista chu a lo thlen hunah, he mi tih aia tam zawk thilmak a rawn ti ang em ni?" an ti a.

³²Tin, Pharisaite'n a chunga mipui phunrukna thute chu an hria a; tichuan puithiam lalte leh Pharisaite'n a man turin tiangkengtute an tir ta a.

³³Tin, Isua'n, "Rei lo te in hnenah ka awm rih zet ang a, mi tirtu hnenah ka kal ang.

³⁴Nangni'n mi zawng ang a, mi hmu si lo ang; ka awmnaah pawh in lo kal thei lo vang," a ti a.

³⁵Tin, Judate an inbia a, "Kan hmuh loh turin he mi hi khawiah nge a kal dawn? Grikte zinga Pem darhho hnena kalin Grikte chu a zirtir dawn em ni ang?

³⁶'Nangni'n mi zawng ang a, mi hmu si lo ang a; ka awmnaah pawh in lo kal thei lo vang,' a tih hi, eng a tihna nge ni ang?" an ti a.

³⁷Tin, kut tiak dawn ni, ni ropui berah chuan Isua a ding a, a au a, "Tupawh a tuihal chuan ka hnenah lo kal se la in rawh se.

³⁸Tupawh mi ring chu Pathian Lehkha sawi angin tui nung luite a pumah a luang chhuak ang," a ti a.

³⁹(Chung thu chu a ringtuten Thlarau an neih tur thu a sawi a ni; Thlarau chu pek a la ni rih lo, Isua chu chawimawia a la awm loh avangin).

⁴⁰Chutichuan mipui zinga thenkhatin chung thu chu an hriatin, "Hei hi zawlnei chu a nih tak hi," an ti a.

⁴¹Thenkhatin, "Hei hi Krista chu a ni," an ti a. Thenkhat erawh chuan, "Khaw nge Krista chu Galili rama a lo chhuah tehlul ang?

⁴²Krista chu Davida thlahte zingah, Davida awmna khua Bethlehemah chhuak tur a ni tih Pathian Lehkhain a sawi lo em ni?" an ti a.

⁴³Chutichuan amah avangin mipui chu an inthen a, an inkhing ta a.

⁴⁴Thenkhat chuan man an duh a, nimahsela tuma'n an khawih si lo.

⁴⁵Tin, tiangkengtute chu puithiam lalte leh Pharisaite hnenah an lo kal leh a; tin, anni chuan an hnenah, "Engati nge in rawn hruai loh?" an lo ti a.

⁴⁶Tiangkengtute chuan, "Sawtiang rengin miin thu an sawi ngai lo," an ti a, an chhang a.

⁴⁷Tin, Pharisaite chuan an hnenah, "Nangni pawh bumin in awm ve ta elo?

⁴⁸Hotute leh Pharisaite zinga mi reng reng amah ring an awm tawh em ni?

⁴⁹Heng Dan hre lo mipuite tehchai hi anchhe dawng an ni a sin," an ti a, an chhang a.

⁵⁰Nikodema, hmana Isua hnena lo kal kha, an zinga tel ve a ni a, an hnenah,

⁵¹Ama ka ngeia a thu hriat leh a thiltih hriat hmain kan danin mi thiam loh a chantir ngai em ni?" a ti a.

⁵²Anni chuan a hnenah, "Nang pawh chu Galili mi i ni ve elo? Zawng la, Galili ramah chuan zawlnei tumah chhuak tur an awm lo tih hre ta che," an ti a, an chhang a.Tin, mi tin mahni in theuhvah an kal ta a.

⁵³Tin, mi tin mahni in theuhvah an kal ta a.