Read Baibul, Mizo Johana 8 Bible Online

Johana 8 - Baibul, Mizo bible

Johana 8

¹Isua erawh chu Oliv tlangah a kal ta zawk a.

²Tin,zingah Pathian biak inah a lut leh a, mi zawng zawng a hnenah an lo kal a; tin, ani chu a thu a, anmahni a zirtir a.

³Tin, lehkhaziaktute leh Pharisaite'n hmeichhe pakhat a uire lai an man an rawn hruai a; tin, a laiah an dintir a,

⁴Isua hnenah, "Zirtirtu, he hmeichhia hi a uire lai an man a ni, a uire lai takin.

⁵Dan Lehkhabuah, Mosia'n hetiang mi hi lunga den hlum thu min pe a; nangin engtin nge i ngaih?" an ti a.

⁶Chu thu chu amah fiahna'n an ti a, a hekna tur an hmuh theihna'n. Chutichuan Isua a kun a, a kut zungin leiah a ziak a.

⁷Tin, an zawh sek sek avangin ani chu a tho a, an hnenah, "In zinga sual nei lo apiangin amah chu lungin deng hmasa rawh se," a ti a.

⁸Tin, a kun leh a, a kutzungin leiah a ziak leh a.

⁹Tin, anni chuan a thusawi chu an hriatin, upa berin a tan a, a tawp thlengin, pakhat khatin an relh chhuak ta zel a; chutichuan Isua chauh a awm ta a, hmeichhia a laia a awmna ngaia awm nen khan.

¹⁰Tin, Isua a tho a, a hnenah, "Hmeichhia, khawiah nge an awm tak? Tuma'n thiam loh an chantir na che nge?" a ti a.

¹¹Tin, ani chuan, "Lalpa, tuma'n mi chantir lo e," a ti a. Tin, Isua'n, "Kei pawhin thiam loh ka chantir lo va che; kal la, tun hnuah tisual leh tawh suh," a ti a.

¹²Tin, Isua'n an hnenah thu a sawi leh a, "Kei khawvel entu ka ni; tupawh mi zui chu thimah a leng tawp loing a, nunna eng a nei zawk ang," a ti a.

¹³Chutichuan Pharisaite'n a hnenah, "Mahni thu hriattir i ni; i thu hriattir a dik lo e" an ti a.

¹⁴Isua'n an hnenah, "Mahni thu hriattir mah i la, ka thu hriattir a dik a ni; keiin ka lo chhuahna leh ka kalna tur chin pawh ka hria e; nangni zawngin ka lo chhuahna leh ka kalna tur chin pawh in hre si lo.

¹⁵Nangni'n tisa angin in sawisel thin; kei zawngin tumah ka sawisel lo.

¹⁶A ni, sawisel mah i la ka sawiselna a dik ang; keimah chang ka ni lo a, kei leh Pa mi tirtu kan ni zawk si a.

¹⁷A ni, in Dan Lehkhabuah pawh, 'Mi pahnih thu a dik,' tih ziak a ni bawk alawm.

¹⁸Kei hi mahni thu hriattirtu ka ni, Pa mi tirtu chuan ka thu a hriattir bawk," a ti a, a chhang a.

¹⁹Tin, anni chuan a hnenah, "I Pa khawiah nge?" an ti a. Isua'n, "Nangni'n kei min hre lo, ka Pa pawh in hre lo; kei mi hriat chuan ka Pa pawh in hria ang," tiin a chhang a.

²⁰Chung thu chu Pathian biak inah a zirtir pahin, thawhlawm dahna hmunah a sawi a; tuma'n amah an man si lo, a hun a la thlen loh avangin.

²¹Tin, ani chuan an hnenah, "Ka kal bo dawn hi, nangni'n mi zawng ang a, in sual nei rengin in thi ang; ka kalna turah in lo kal thei lo ang," a ti leh a.

²²Tin, Judaten, " 'Ka kalna turah in lo kal thei lo ang,' a tih hi, a intihlum dawn em ni?" an ti a.

²³Tin, ani chuan an hnenah, "Nangni hnuai lama chhuak in ni; kei zawng chung lama chhuak ka ni; nangni he khawvela chhuak in ni; kei zawng he khawvela chhuak hi ka ni lo.

²⁴Chuvangin in hnenah,'In sual nei rengin in thi ang,' ka tih kha; ani chu ka ni tih in awih loh chuan in sual nei rengin in thi mawlh ang," a ti a.

²⁵Tin, anni chuan a hnenah, "Tunge maw i nih leh?" an ti a. Isua'n an hnenah, "Atir ata in hnena ka sawi thin kha.

²⁶Nangni chungchang thu-ah hian thil tam tak sawi tur leh ngaituah tur ka nei; engpawh ni rawh se, mi tirtu chu mi dik tak a ni; a hnena thu ka hriat apiang khawvel hnenah ka hrilh hi," a ti a.

²⁷Pa thu an hnenah a sawi tih an hre lo.

²⁸Chutichuan Isua vekin, "Nangni'n Mihring Fapa hi in khaikan hnuah, ani chu ka ni tih leh, keiin mahni thuin thil engmah ka ti lo a, Pain mi hrilh ang zelin he'ng thu hi ka sawi zawk a ni tih in lo la hria ang.

²⁹Mi tirtu chu ka hnenah a awm a, mi thlahthlam lo e; a thil lawmzawng apiang ka tih fo avangin," a ti a.

³⁰Tin, chung thu chu a sawi laiin mi tam takin amah chu an ring ta a.

³¹Chutichuan Isua'n a ringtu Judate hnenah chuan, "Ka thua in awm reng chuan ka zirtirte in ni tak tak ang.

³²Tin thutak in hria ang a, thutak chuan bawih a ban ang che u," a ti a.

³³Tin, anni chuan a hnenah, "Abrahama thlahte kan ni a sin, tun thlengin tuma bawihah kan awm ngai lo, 'Bawih a ban ang che u,' eng ti tiha i ti nge ni?" an ti a,an chhang a.

³⁴Tin, Isua'n an hnenah, "Tih tak meuhin, tih tak meuhin ka hrilh a che u, tupawh thil tisual apiang, sual bawih a ni.

³⁵Bawih chu kumkhuain inah a awm reng lo; fapa erawh chu kumkhuain a awm reng thin.

³⁶Chutichuan Fapain bawih a ban che u chuan in chhuak tak meuh ang.

³⁷Abrahama thlahte in ni tih ka hria e; ni mah u la, mi thah in tum si, ka thuin in rilrua awmna a neih loh avangin.

³⁸Keiin ka Pa hnena thil ka hmuh chu ka sawi thin; nangni pawhin in pa hnena thil in hriat chu in ti thin," a ti a.

³⁹Tin, anni chuan a hnenah, "Kan pa Abrahama a ni," an ti a, an chhang a. Tin, Isua'n an hnenah, "Abrahama fate in nih chuan Abrahama thil in ti ang chu.

⁴⁰Nimahsela tunah mi thah in tum si. Pathian hnena thutak ka hriat hrilhtu che u ka ni a sin; Abrahama zawngin hetiangin a ti lo e.

⁴¹Nangni zawngin in pa thil chu in ti thin," a ti a. Tin, anni chuan a hnenah, "Inuirea hrin kanni lo e, Pa pakhat chauh kan nei, Pathian chu," an ti a.

⁴²Isua'n an hnenah, "Pathian in Pa a nih chuan nangni'n mi hmangaih ang chu; Pathian hnena chhuak leh a hnen ata lo kal ka ni si a; keima thua lo kal ka ni hek lo, amahin mi tir zawk a ni.

⁴³Engati nge ka tawng awmzia in hriat loh? Ka thu in dawnsawn theih loh avang a ni.

⁴⁴Nangni zawng in pa diabola hnena chhuak in ni a, in pa duhzawng tih in duh a ni. Ani chu atir ata tualthat a ni, thutakah a awm lo, a chhungah thu tak reng a awm loh avngin. Dawt thu a sawiin ama tihchhuah a sawi a ni thin; dawthei a ni si, dawt pa pawh a ni.

⁴⁵Thutak ka sawi avangin nangni'n mi ring lo a ni.

⁴⁶In zingah tuin nge sual kawngah thiam loh mi chantir thei awm? Thutak ka sawi pawhin nangni'n engati nge mi rin loh?

⁴⁷Pathian hnena chhuak chuan Pathian thu a pawm thin; he mi avang hian in pawm lo a ni, Pathian hnena chhuak in nih loh avangin," a ti a.

⁴⁸Tin, Judate chuan a hnenah, "Samari mi, ramhuai zawl i ni kan tih kha kan tidik zet lo em ni?" an ti a, an chhang a.

⁴⁹Isua'n, "Ramhuai zawl ka ni lo e; ka Pa ka chawimawi a ni zawk e, nangni'n ka hming in tihchhiat hi.

⁵⁰Nimahsela mahni mawina zawng ka ni lo; a zawngtu leh a ngaihtuahtu mi pakhat a awm a ni.

⁵¹Tih tak meuhin, tih tak meuhin ka hrilh a che u, miin ka thu a zawm chuan kumkhuain thih ni hmel a hmu lo ang," a ti a.

⁵²Tin, Judaten a hnenah, "Ramhuai zawl i ni tih tunah kan hre ta. Abrahama a thi tawh, zawlneite nen, nangin, 'Miin ka thu a zawm chuan kumkhuain thihna a tem lo vang,' i ti si a.

⁵³Kan thlahtu Abrahama aiin i ropui zawk em ni? Ani pawh a thi tawh, zawlneite pawh an thi tawh; tuah nge i insiam ni?" an ti a.

⁵⁴Tin, Isua'n, "Mahni inchawimawi i la ka mawi engah mah a ni lo: 'Kan Pathian,' in tih ka Pa chu mi chawimawitu a ni;

⁵⁵nangni'n amah in hre si lo; kei erawh chuan amah ka hria; 'Amah ka hre lo,' ti i la, nangmahni anga dawthei bawk ka ni ang: chutichuan amah ka hria a, a thu pawh ka zawm thin.

⁵⁶In thlahtu Abrahama kha, ka ni hmu tur a nih avngin a hlim em em thin, tin, a hmu ngei a, a lawm hle a," a ti a, a chhang a.

⁵⁷Tin, Judate chuan a hnenah, "Nang kum sawmnga pawh la ni lo pui che, Abrahama i hmu em ni?" an ti a.

⁵⁸Isua'n an hnenah, "Tih tak meuhin, tih tak meuhin ka hrilh a che u, Abrahama awm hma pawhin ka awm," a ti a.Chutichuan a denna'n lung an char a; nimahsela Isua a biru a, Pathian biak in ata chu a chhuak ta a.

⁵⁹Chutichuan a denna'n lung an char a; nimahsela Isua a biru a, Pathian biak in ata chu a chhuak ta a.