Read Baibul, Mizo Johana 9 Bible Online

Johana 9 - Baibul, Mizo bible

Johana 9

¹Tin, Isua'n a kal pahin a pian tirh ata mitdel pakht a hmu a.

²Tin, a zirtirten a hnenah, "Rabbi, mitdel saa a pian hi tuin nge thil tisual, he mi hian nge a nu leh a pain?" an ti a, an zawt a.

³Isua'n, "He mi hian a tisual hek lo, a nu leh a pain an tisual hek lo; Pathian hnathawh a chunga a lanna tur a nih zawk hi.

⁴Chhun a nih laiin mi tirtu hna kan thawk tur a ni; zan a nih dawn tak hi, chu mi hunah chuan tuma'n hna an thawk thei lo ang.

⁵Khawvela ka awm chhungin khawvel entu ka ni," a ti a, a chhang a.

⁶Chutianga a sawi zawh chuan leiah chil a chhak a, chil chuanin hlum a siam a, tin hlum chu a mitah a hnawih a,

⁷tin, a hnenah, "Siloam dilah va sil rawh," a ti a. (Siloam chu "Tirh" tihna a ni.) Tin, a va kal a, a sil a, mitvarin a lo haw leh ta a.

⁸Chutichuan a vengte leh hmana a kutdawh hmu thinten, "He mi hi thu chunga kutdawh thina kha a ni lo em ni?" an ti a.

⁹Mi dangin, "Ani kha a nih hi," an ti a. Mi dangin, "A ni lo e, a anpui a nih zawk hi," an ti a. Ani chuan "Kha kha ka ni," a ti a.

¹⁰Tin, anni chuan a hnenah, "I mit engtin nge a lo var le?" an ti a.

¹¹Ani chuan, "Isua an tih khan hlum a siam a, ka mitah a hnawih a, 'Siloam dilah va kal la, sil rawh,' mi ti a, chutichuan ka va kal a, ka sil a, mitvarna ka hmu ta a nih hi," a ti a.

¹²Tin, anni chuan a hnenah, "Ani chu khawiah nge a awm?" an ti a. "Ka hre lo," a ti a.

¹³Tin, chu mi hmaa mitdela chu Pharisaite hnenah an hruai a.

¹⁴Tin, Isua'n hlum a siam a, a mit a tihvar ni kha Chawlhni a ni a.

¹⁵Chutichuan Pharisaite'n a mit a lo var tak danzia an zawt leh a. Ani chuan an hnenah, "Ka mitah hlum a dah a, ka sil a, ka hmu thei ta mai a ni," a ti a.

¹⁶Tin, Pharisai thenkhatin, "Chu mi chu Chawlhni a puithu loh avangin Pathian hnena chhuak a ni lo ang," an ti a. Thenkhat erawh chuan "Mi sualin engtin nge hetiang thilmak a tih theih ang?" an ti a. Tin, an inthen a, an inkhing ta a.

¹⁷Tin, mitdel hnenah chuan, "I mit a tihvar kha nang eng angin nge amah chu i ngaih?" an ti leh a. Tin, ani chuan, "Zawlnei a ni," a ti a.

¹⁸Nimahsela Judaten a mit lo var taa nu leh pa chu an koh hma loh chuan mitdel a ni thin a, a mit a lo var ta tih a chungchang thu chu an awih lo a.

¹⁹Tin, a nu leh a pa hnenah, "He mi hi in fapa, mitdel saa piang a ni in tih kha a ni em? Engtin nge tunah a hmuh theih tak le?" tiin an zawt a.

²⁰Tin, a nu leh a pa chuan, "Hei hi kan fapa a ni tih kan hria;

²¹nimahsela engtin nge tunah hian a lo hmuh theih tak hi kan hre lo, a mit tivartu pawh kan hre hek lo; amah zawt rawh u; patling a ni alawm; ama thu chu ama'n sawi ang hmiang," an ti a, an chhang a.

²²Judate an hlauh avangin a nu leh a pa chuan chung thu chu an sawi a ni; Judaten, chung hma pawh chuan tupawhin, "Ani chu Krista a ni," tia a tan chuan inkhawmna in a hnawng ang tih an remti tlang si a.

²³Chuvang chuan a ni, a nu leh apa chuan, "Patling a ni alawm, amah zawt rawh u," an tih ni.

²⁴Chutichuan mitdel chu an ko nawn leh a, a hnenah, "Pathian fak rawh u, kha mi kha zawng mi sual a ni tih kan hria e," an ti a.

²⁵Tin, ani chuan, "Mi sual a ni nge ni lo ka hre lo, kawng khat ka hria, tun hma khan ka mit a del a, tunah ka hmuh theih tak hi," a ti a, a chhang a.

²⁶Tin, anni chuan a hnenah, "I chungah engtin nge a tih? I mit engtin nge a tihvar?" an ti a.

²⁷Tin, ani chuan an hnenah, "Nichinah khan ka hrilh che u kha, in hre duh si lo; engati nge in hriat leh duh tak ni? Nangni pawh a zirtirte nih ve in duh elo?" tiin a chhang a.

²⁸Tin, anni chuan an hau a, "Nang hi ama zirtir i ni a, keini zawng Mosia zirtirte kan ni a sin.

²⁹Pathianin Mosia a bia tih kan hria, he mi teh chai hi khawia lo chhuak nge a nih kan hre hrep lo e," an ti a.

³⁰Tin, chu mi chuan an hnenah, "Chu tak chu a ni a makna chu, khawia lo chhuak nge a nih in hriat loh a, ka mit a tihvar miau si hi.

³¹Pathianin mi sual thu a ngaithla thin lo tih kan hria; nimahsela tupawhin Pathian a ngaihsak a, a duhzawng a tih chuan Pathianin ani chu a ngaithla thin.

³²Khawvel awm tirh ata tuma'n mitdel saa piang mit an tivar leh tih an hre ngai lo.

³³He mi hi Pathian hnena chhuak a nih loh chuan engmah a ti thei lo ang," a ti a, a chhang a.

³⁴Tin, anni chuan a hnenah, "Nang sual lailet dera piang i ni alawm, nangin min hrilh vei em ni?" an ti a, an chhang a. Tichuan ani chu an hnawt chhuak ta a.

³⁵Tin, an hnawt chhuak tih Isua'n a lo hria a; tin, a zawng chhuak a, "Pathian Fapa i ring em?" a ti a.

³⁶Tin, ani chuan, "Ka pu, ani chu tu nge ni, ka rin theihna'n?" a ti a, a chhang a.

³⁷Isua'n a hnenah, "Ani chu i hmu tawh reng alawm, a betu mek che hi a ni alawm," a ti a.

³⁸Tin, ani chuan, "Lalpa, ka ring e," a ti a, chibai a buk a.

³⁹Tin, Isua'n, "Rorel turin he khawvelah hian lo kal ka ni, mitdelte chu an mit a lo varna tur leh, mitvarte chu an mit a lo delna turin," a ti a.

⁴⁰Tin, a hnena Pharisai awmte chuan chung chu an hria a, a hnenah, "Keini pawh hi mitdel kan ni ve elo?" an ti a.Tin, Isua'n an hnenah, "Mitdel in nih chuan sual in nei lo ang; nimahsela, 'Kan hmu thei e,' tunah in ti si a, chuvangin in sual a awm reng a ni.

⁴¹Tin, Isua'n an hnenah, "Mitdel in nih chuan sual in nei lo ang; nimahsela, 'Kan hmu thei e,' tunah in ti si a, chuvangin in sual a awm reng a ni.