Read Baibul, Mizo Tirhkohte 1 Bible Online

Tirhkohte 1 - Baibul, Mizo bible

Tirhkohte 1

¹Theophil, hmana lehkhaah khan, Isua thiltih leh a zirtir tantirh zawng zawng thu kha ka ziak a ni;

²Thlarau Thianghlim tanpuia a tirhkoh thlante hnena thu a tiam zawha vana hruai chhoha a awm tak ni thlenga thu kha.

³Chu tirhkohte hnenah chuan hrehawm chu a tuar hnuin hriatna tam takin nungin a inentir a, ni sawmli zet an hnenah a inlar a, Pathian ram thu a sawi thin.

⁴Tin, an awm khawm a pawl ve a, "Jerusalem khua kalsan suh u, Pa thiltiam ka sawi in hriat kha lo nghak rawh u," a ti tlat a.

⁵Johana khan tuiin a baptis thin a, nimahsela ni rei lo tean Thlarau Thianghlimin baptisma in chang ang," a ti a.

⁶Tin, anni chuan an rawn inkhawmin a hnenah, "Lalpa, tunah em ni Israelte hnenah ram i pek leh dawn?" an ti a, an zawt a.

⁷Tin, ani chuan an hnenah, "Pain a hun leh a ni, ama thu thua awma a ruat chu, nangni lo hriat tur a ni lo e.

⁸Nimahsela Thlarau Thianghlim chu in chunga a lo thlen hunah thiltihtheihna in la nei ang; tichuan Jerusalem khuaah te, Judai leh Samari ram khaw tinah te, kawlkil thleng pawhin ka thuhretute in ni ang," a ti a.

⁹Tin, chung thu chu a sawi zawhin an hmuh reng chungin, vana hruai chhohin a awm a; tin, chhumin an hmuh phak lohvah a hruai bo ta a.

¹⁰Tin, a chhoh laia van lam an en reng laiin mi pahnih, puan var sinin, an kiangah an lo ding a;

¹¹chu mite chuan, "Galili rama mite u, engati nge van lam ena in din reng? He Isua in hnen ata vana hruai chhoha a awm hi, vana a chho in hmu ang bawk hian amah ngei hi a lo kal leh ang," an ti a.

¹²Tin, Olivet tlang an tih ata chu Jerusalem khuaah an kir leh ta a; chu mi tlang chu Jerusalem khaw kiang a ni a, Chawlhnia kalna tawk chauh a ni.

¹³Tin, an luhin, an awmna pindan chungnungah chuan an chho va - Petera leh Johana nen, Jakoba leh Andria nen, Philipa leh Thoma nen, Bartholomaia leh Matthaia nen, Alphaia fapa Jakoba leh Simona, Zelot pawla mi leh, Jakoba fa Juda nen an ni.

¹⁴Chungho zawng zawng chu hmeichhia tute emaw leh Isua nu Mari nen, Isua unaute nen, rilru hmunkhata thahnemngai taka tawngtaiin an awm reng a.

¹⁵Tin, chung ni chuan unaute zingah Petera a ding a, an za chuan za leh sawmhnih lai an ni a,

¹⁶Unaute u, Thlarau Thianghlimin, Davida kaa, Isua mantute hruaitu Juda thu a sawi lawk kha, kha Pathian Lehkha Thu kha lo thleng reng tur a ni.

¹⁷Ani chu kan zinga chhiar tel a ni a, he'ng rawngbawlah hian chan pawh a nei ve si a.

¹⁸(Tin, chu mi chuan a sual manin hmun pakhat a lei a, a bawkkhupin a tla a, a laiah a puak keh a, a ril zawng zawng a chhuak vek a.

¹⁹Tin, chung thu chu Jerusalem khuaa awmte zawng zawngin an lo hria a; chutichuan chu hmun chu, anmahni tawngin, 'Akeldama' an ti a, chu chu 'Thisen Hmun' tihna a ni),

²⁰Fakna Hla Bu-ah he'ng thu hi ziak a ni: 'A awmna tihramin awm rawh se, a chhungah tumah awm suh se,' tih leh, 'A hotu nihna chu mi dangin chang rawh se,' tih hi.

²¹Chutichuan Lal Isua kan zinga lut thin chhuak thina a awm chhung zawnga -

²²Johana baptisma achin, kan hnen ata vana hruai chhoha a awm ni thleng khan - he'ng min pawl thinte zingah hian mi pakhat a thawhlehna min hriatpuitu atan a awm tur a ni," a ti a.

²³Tin, mi pahnih an ruat a, pakhat chu Josefa Barsaba an tiha chu, (a hming dang Justa an ti bawk a), tin, pakhat chu Matthia a ni a.

²⁴Tin, an tawngtai a, "Nang, Lalpa, mihring zawng zawng rilru hretu, Juda chuan ama awmnaa kal turin he'ng rawngbawl leh tirhkoh hna a tlawmsan hi,

²⁵a ai awh turin he mite pahnih hi a tu zawk nge i thlan min hriattir ang che," an ti a.Tin, ai an ensak a, an ai en chu Matthia chungah a lo tlu a; tichuan ani chu tirhkoh sawm leh pakhatte zingah chuan chhiar tel a ni ta a.

²⁶Tin, ai an ensak a, an ai en chu Matthia chungah a lo tlu a; tichuan ani chu tirhkoh sawm leh pakhatte zingah chuan chhiar tel a ni ta a.