Read Baibul, Mizo Tirhkohte 10 Bible Online

Tirhkohte 10 - Baibul, Mizo bible

Tirhkohte 10

¹Tin, Kaisari khuaah a hming Kornelia mi pakhat a awm a, Itali pawl an tih, chu mi pawla sipai za hotu a ni a,

²Pathian ngaihsak mi a ni a, a chhungte zawng zawng nen Pathian an tih thin a, mite hnenah thil tam tak a pe thin a, Pathian hnenah pawh a tawngtai fo a.

³Chu mi chuan behliang mun hun lai velah mumang angin fiah takin Pathian vantirhkoh pakhat a hnenah luta, "Korneli," tiin a hmu a.

⁴Tin, Kornelia chuan ani chu a lo en reng a, a hlau a, "Lalpa, eng nge ni?" a ti a. Tin, ani chuan a hnenah, "I tawngtainate leh i thilpek thute kha hriat reng turin Pathian hmaah a thleng chho ta a.

⁵Tunah Joppa khuaah mite tir la mi pakhat Simona, Petera an tiha chu, han hruaitir rawh;

⁶savun siamtu Simona hnenah a thleng a ni, a in chu tuifinriat kamah a awm," a ti a.

⁷Tin, vantirhkoh a betu chu a kal veleh, Kornelia chuan a chhiahhlawhte zinga mi pahnih leh a rawngbawl fote zinga Pathian ngaihsak sipai pakhat a ko a;

⁸tin, thu zawng zawng chu an hnenah a hrilh zawhin Joppa khuaah chuan a tir ta a.

⁹Tin, atukah an kal laia khaw kiang an thlen dawnin, Petera chu tawngtai turin chawfak hun laiin, in chungah a lawn chho a;

¹⁰tin, a ril a lo tam a, chaw ei a duh ta a; nimahsela ei tur an siam lai chuan engloin a zel ta a.

¹¹Tin, van inhawngin englo bawm, puan lian tak ang, a kil lia hlina leia uai thlain a hmu a;

¹²chu mi chhungah chuan fuliafa leh rannung leh chungleng sava tinrengte an awm a.

¹³Tin, a hnenah awin, "Peter, tho rawh; talh la, ei rawh," a rawn ti a.

¹⁴Nimahsela Petera chuan, "Lalpa, ni lo e; thiang lo leh bawlhhlawh engmah reng ka ei ngai lo e," a ti a.

¹⁵Tin, aw chuan a vawi hnihnaah, "Pathianin a tihthiaghlim tawh chu nangin thiang lo ti suh," a ti a.

¹⁶Chutiang hlirin vawi thum a lo awm a: tin, bawm chu vana khai chhohin a awm leh ta nghal a.

¹⁷Tin, Petera chuan mumang anga a hmuh chu a ngaihna hre loa a mangan laiin Kornelia mi tirhte chuan Simona in chu an lo zawt chhuak tawh a, kawngkhar bulah an lo ding a,

¹⁸an au a, Simona, Petera an tiha chu, chutah chuan a thlen leh thlen loh an zawt a.

¹⁹Tin, Petera chuan a mumang ang thu chu a ngaihtuah laiin Thlarauin a hnenah, "Ngai teh, mi pathumin an zawng a che.

²⁰Chutichuan, tho la, chhuk la, engmah ringhlel loin anmahni zui rawh; anni chu `ka tirh an ni e," a ti a.

²¹Chutichuan, Petera chu, chu mite hnenah chuan a chhuk a, an hnenah, "In zawn hi ka ni e; eng nge in rawn kal chhan?" a ti a.

²²Tin, anni chuan, "Vantirhkoh thianghlim pakhatin, Kornelia, sipai za hotu, mi fel tak, Pathian tih, Juda hnam zawng zawng zinga mi hmingtha hnenah chuan i thusawi a hriatna'n, a inah nangmah ko tur chein a hrilh a ni," an ti a.

²³Chutichuan mite chu a ko lut a, a riahtir ta a. Tin, atukah chuan Petera chu a tho a, an hnenah a kal a, Joppa khuaa mi unau tute emaw pawh a hnenah an kal ve a,

²⁴Tin, atuk lehah Kaisari khuaah chuan an lut ta a. Tin, Kornelia chuan a laichinte leh a thian duh berte ko khawmin, anni chu a lo nghak reng a.

²⁵Tin, Petera chu a luh dawn lai takin Kornelia chuan a lo hmuak a, a ke bulah a bawkkhup a, Pathian chibai buk angin a buk a.

²⁶Nimahsela Petera chuan ani chu a kai tho a, "Ding rawh, kei pawh mihring ka ni alawm," a ti a.

²⁷Tin, a hnenah thusawi chungin a lut a, mi tam tak awm khawm chu a va hmu a.

²⁸Tin, an hnenah, "Juda miin hnam dang pawl leh an hnena kal a thian lohzia nangnin in hria a ni; nimahsela tumah thiang lo leh bawlhhlawh ka tih tur a ni lo tih Pathianin mi hriattir a ni.

²⁹Chuvangin mi rawn koh veleh khan hnial loin ka lo kal ta a nih hi. Tichuan ka zawt a che u, eng nge mi rawn koh chhan le?" a ti a.

³⁰Tin, Kornelia chuan, "Ni li a ni ta, tun hun ang thleng hian ka inah, behliang mun hun tawngtainaah ka tawngtai a; tin, ngai teh, mi pakhat puan eng tak sinin ka hmaah a lo ding a,

³¹'Korneli, i tawngtaina kha hriatin a awm ta, mi hnena i thilpekte pawh kha Pathianin a hre reng a.

³²Chuvangin Joppa khuaah mi tir la, Simona,Petera an tiha chu,i hnenah ko rawh; ani chu tuifinriat kamah savun siamtu Simona inah a thleng a ni,' a ti a.

³³Chuvangin i hnenah mi ka rawn tir ta nghal a ni; i lo kal hi a tha e. Chutichuan, Lalpa'n thu a pek apiang che hre turin tunah Pathian mithmuhin kan zain hetah kan awm a nih hi," a ti a.

³⁴Tin, Petera chuan a sawi a: "Pathianin mi duhsak bik a nei lo tih dik takin ka hria e;

³⁵nimahsela hnam tin zingah tupawh amah tiha fel taka ti apiang a lawmzawng mi an ni thin.

³⁶Ani chuan thlamuanna Chanchin Tha Isua Krista kaa hrilin, Israela thlahte hnenah thu a thawn a, (Isua chu mi zawng zawng Lal a ni a)

³⁷Johanan a tlangaupui thin baptisma zawhah khan, thu, Galili ram atanga lo thang tana Judai ram zawng zawnga thang chhuak kha, nangnin in hre bawk alawm;

³⁸Nazaret Isua chungchang thu kha, khatia Pathianin ani chu Thlarau Thianghlim leh thiltihtheihnaa a vurzia kha; ani chuan mi chunga titha leh diabola tihduhdah zawng zawng tidamin a fang vel thin a, Pathian a hnenah a awm avangin.

³⁹Judate ramah leh Jerusalem khuaa a thiltih zawng zawng hretute kan ni e; ani chu thinglerah khaiin an tihlum ta a.

⁴⁰Pathianin ani chu ni thum niin a kai tho leh a, fiah takin a entir a,

⁴¹amaherawhchu, mi zawng zawng hnenah a ni lo, Pathianin hretua a ruat lawkate hnenah chauh a ni, - keimahni, mitthi zing ata a thawh leh hnua a hnena eia barte hnenah hian.

⁴²Ani chu mitthite leh mi nungte chunga Roreltua Pathian ruat chu a ni tih, mi hnena tlangaupui leh hriattir turin Pathianin thu min pe a ni.

⁴³Tupawh amah chu ring apiang a hming avangin sualte ngaihhnathiamin an awm ang tih, he'ng a chanchin hi zawlnei zawng zawngin an hriattir thin kha," a ti a.

⁴⁴Tin, Petera'n chung thu chu a sawi lai tak chuan thu hretute zawng zawng chungah chuan Thlarau Thianghlim a lo thleng ta a.

⁴⁵Tin, Serhtanho zinga ringtute Petera rawn zui apiang chuan Thlarau Thianghlim pek chu Jentailte chungah pawh leih a nih avangin mak an ti hle a;

⁴⁶tawng hriat lohtea thu sawiin Pathian fakin an hre si a. Tin, Petera'n a bia a,

⁴⁷Heng mite, keimahni anga Thlarau Thianghlim hmu ve hi baptisma an chan lohna'n miin tui hman an khap thei em ni?" a ti a.Tichuan isua Krista hminga baptisma chan tur thu a pe a. Chung zawhah chuan ni engzat emaw chamah an ngen a.

⁴⁸Tichuan isua Krista hminga baptisma chan tur thu a pe a. Chung zawhah chuan ni engzat emaw chamah an ngen a.