Read Baibul, Mizo Tirhkohte 12 Bible Online

Tirhkohte 12 - Baibul, Mizo bible

Tirhkohte 12

¹Tin, chutih lai vel chuan Lal Herodan kohhrante zinga tute emaw tihduhdah tumin a kut a lek ta a.

²Tin, Jakoba, Johana unau chu, khandaihin a sathlum a.

³Chu chuan Judate a tilawm tih a hriatin Petera pawh chu man a tum leh zel a. (Chung nite chu chhang dawidim telh loh ni a ni).

⁴Tin, a man hnuah chuan tan inah a khung a, sipai pawl li, pali theuh zelin a ven chhawktir a; Kalhlen Kut zawhin mi zawng zawng hnenah hruai chhuah a tum a.

⁵Chuvangin Petera chu tan inah chuan a awmtir rih a; nimahsela kohhranhoin ama tan, thahnemngai takin Pathian hnenah an tawngtaisak thin a.

⁶Tin, Heroda chuan a hruai chhuah dawnin, chu mi zan takah chuan Petera chu sipai pahnih inkarah khaidiat pahnih bunin a muhil a; a vengtute pawh kawngkhar bulah an awm a, tan in chu an veng a.

⁷Tin, ngai teh, Lalpa vantirhkoh pakhat a kiangah a lo ding a, ripah chuan eng eng emaw a lo eng a; tin, Petera nakah a beng harh a, "Tho thuai rawh," a ti a. Tin, a khaidiatte chu a kut ata a tla ta a.

⁸Tin, vantirhkoh chuan a hnenah, "Puan veng la, i pheikhawk bun rawh," a ti a. Tin, ani chuan chutiangin a ti a. Tin, vantirhkoh chuan a hnenah, "I puan bat tha la, mi zui rawh," a ti a.

⁹Tin, Petera chu a chhuak a, a zui ta a; vantirhkoh chetzia chu atak a ni tih a hre lo a, mumanga a hmuh emaw a ti zawk a.

¹⁰Tin, vengtu tawntirh leh a dawttu an pelh hnu chuan pawn chhuahna tur thir kawngkhar chu an va thleng a, chu chu an tan a inhawng chawp ta a; tin, an chhuak a, kawtthler pakhat an pel a; tin, vantirhkoh chuan a kalsan ta nghal a.

¹¹Tin, Petera chuan a harh veleh, "Lalpain a vantirhkoh a tir chhuak a, Heroda kuta mi leh Juda mite beiseina zawng zawng ata mi chhandam tih tunah dik takin ka hre ta," a ti a.

¹²Tin, a inngaihtuah zawhin, Johana, Marka an tih, chu mi nu Mari inah chuan a va kal a; chutah chuan tawngtaiin mi tam tak an lo awm khawm a.

¹³Tin, sumhmun kawngkhar a kik veleh, a hming Rodi nula pakhat, chhang turin a va kal a.

¹⁴Tin, Petera aw a hriat veleh a lawm avangin kawng chu hawng loin a tlan lut leh ta zawk a, Petera kawngkhar bulah a ding tih a va hrilh a.

¹⁵Nimahsela anni chuan a hnenah, "I a ta a nih hi," an lo ti a. Ani erawh chu, "Tih tak zet a ni," tiin a tang talh a. Tin, anni chuan, "A vantirhkoh a nih chu," an ti a.

¹⁶Nimahsela Petera chuan a kik fo a; tin, an han hawn chuan amah chu an hmu a, mak an ti hle a.

¹⁷Chutichuan ani chuan an ngawihna turin kutin a zap a, Pathianin tan in ata amah a hruai chhuahziate chu a hrilh ta a. Tin, "Heng thu hi Jakoba leh unaute va hrilh rawh u," a ti a. Tin, a chhuak a, dang lamah a kal ta a.

¹⁸Tin, ni a chhuah veleh sipaihote chu, Petera khawiahnge a awm tak? tiin buai namen lohin an buai a.

¹⁹Tin, Heroda chuan a zawng a, a hmu si lo a, a vengtute chu a chhuahchhal a, tihhlum turin thu a pe ta a. Tin, Heroda chu Judai ram ata Kaisari khuaah a zuk kal a, chutah chuan a awm reng a.

²⁰Tin, Tura leh Sidon khuaa mite chungah chuan a lungni lo em em a; tin, anni chuan Blasta, lal khum vengtu chu, an thianah an siam a, thu khat vuain a hnenah an lo kal a, an khaw lamin lal khaw lama pur chaw thin an nih avangin rem an ngen a.

²¹Tin, a ni tiam niin Heroda chuan lal puan a sin a, lalthutphahah a thu a, an hnenah thu a sawi a.

²²Tin, mi zawng zawng chuan, "Pathian aw a nih hi, mihring aw a ni lo e," an ti a, an au thin a.

²³Tin, ani chuan Pathian hnenah chawimawina chu a pek loh avangin Lalpa vantirhkohin chawplehchilhin a man a, rulhutin a ei a, a thi ta a.

²⁴Pathian thu erawh chu a darh a, a pung ta zel a.Tin, Barnaba leh Saula chuan rawng chu an bawl zawhin, Jerusalem khua ata chu an kir leh ta a, Johana, Marka an tiha chu an hnenah an hruai a.

²⁵Tin, Barnaba leh Saula chuan rawng chu an bawl zawhin, Jerusalem khua ata chu an kir leh ta a, Johana, Marka an tiha chu an hnenah an hruai a.