Read Baibul, Mizo Tirhkohte 13 Bible Online

Tirhkohte 13 - Baibul, Mizo bible

Tirhkohte 13

¹Tin, Antiokei khuaa kohhranho awmte zingah chuan thu hriltute leh zirtirtute an awm; chung chu Barnaba te, Sumeona Nigera an tih te, Kurini khuaa mi Lukia te, lal Heroda unau tur Manaina te, Saula te an ni.

²Tin, Lalpa rawng an bawl a, chaw an nghei laiin Thlarau Thianghlimin, "Barnaba leh Saula hi anmahni ka ruat chhan ti turin mi tihhransak rawh u," a ti a.

³Chutichuan chaw an ngheia an tawngtai zawh chuan an chungah kut an nghat a, an kaltir ta a.

⁴Chutichuan Thlarau Thianghlim tirh chhuahin an kal a, Selukai khuaah an chhuk a, chuta tangin Kupra thliarkarah lawngin an kal a.

⁵Tin, Salamis khuaa an awm laiin Juda inkhawmna inahte Pathian thu an hril thin a; Johana pawh kha an rawng bawl turin an hruai ve a.

⁶Tin, thliarkar chu Paphos khaw thlengin an fang chhuak a, dawithiam, zawlnei der, Juda mi pakhat an hmu a, a hming chu Barisua a ni a.

⁷Chu mi chu lal aiawhtu, Serjia-Paula, mi fing tak hnena awm a ni a. Chu lal aiawhtu chuan Barnaba leh Saula chu a ko a, Pathian thu hriat a tum a.

⁸Nimahsela, Eluma, (Barisua hming dang awmzia hi Dawithiam a ni a,) chu mi chuan lal aiawhtu chu rin lohtir tumin anni chu a lo dodal a.

⁹Chutichuan Saula, (Paula an tih bawk chu,) Thlarau Thianghlimin a khat a, ani chu a en reng a,

¹⁰Nang mi bum leh huatthlalak tinrenga khat pa, nang diabola fapa, nang fel tinreng malmak pa, Lalpa kawng fel takte hi tihchhiat i bang lo ang maw?

¹¹Hre rawh, tunah Lalpa kut i chungah a tla a nih hi, i mit a lo del ang a, khaw eng i hmu rih lo ang," a ti a. Tichuan chum leh thimin amah a bawh ta nghal a, kuta kaitu tur zawngin a vak a vak a.

¹²Tin, lal aiawhtu chuan chu thiltih chu a hmu a, Lalpa zirtir thu chu mak a ti hle a, a ring ta a.

¹³Tin, Paula chu a hote nen chuan Paphos khua atang chuan lawngin an kal a, Pamphulia rama Perga khua an thleng a; tin, Johana khan anni chu a kalsan a, Jerusalem khuaah a kir leh ta a.

¹⁴Nimahsela anni chu Perga khua ata an kal zel a, Pisidia rama Antiokei khua an thleng a; tin, Chawlhniin inkhawmna inah an lut a, an thu a.

¹⁵Tin, Dan Lehkhabu leh Zawlneite Lehkhabu chhiar zawhin, inkhawmna in hotuten an hnenah mi an tir a, "Unaute u, mite fuihna thu eng emaw in neih chuan sawi rawh u," an ti a.

¹⁶Tin, Paula a ding a, kutin a zap a, a sawi a: "Israel mite leh Pathian tihtute u, ngai teh u.

¹⁷Heng Israel chite Pathian hian min thlahtute a thlang a, mi Aigupta rama an thang lai khan a chawimawi a, chungnung kutin chuta tang chuan a hruai chhuak ta a.

¹⁸Tin, kum sawmli lai thlalerah khan an thiltihte chu a en thei reng a.

¹⁹Tin, Kanaan rama hnam sarih a tihtlawm zawh hnu khan an ram chu luah turin a pe zel a,

²⁰kum zali leh kum sawmnga chhung zawng khan. Chung hnuah chuan roreltute a pe thin a, zawlnei Samuela thleng khan.

²¹Tin, chu mi hnuah chuan lal an dil a; tichuan Pathianin, Saula, Kisa fa, Benjamina chia mi kha, an hnenah a pe a, kum sawmli chhung atan.

²²Tin, ani chu a sawm bo hnu khan an lal atan Davida a siam ta a: Pathianin chu mi thu chu hriattirin, 'Davida, Jesaia fa, ka thinlung ang pu mi ka char ta, ani chuan ka duhzawng ang apiang a ti ang,' a ti a.

²³Chu mi thlahte zingah chuan Pathianin, thutiam ang zelin, Israelho hnenah Chhandamtu Isua a rawn thlen a:

²⁴a lo kal hmain Johanan simna baptisma thu Israel mi zawng zawng hnenah a lo hrilh te te a.

²⁵Tin, Johanan a rawngbawlna a zawh dawn lai khan, 'Nangnin tu-ah nge mi ruat? Ani chu ka ni lo e. Nimahsela ngai teh u, ka hnu-ah mi tu emaw a lo kal dawn a ni, kei hi zawng a kephaha pheikhawk phelh tlak pawh ka ni lo e,' a ti a.

²⁶Unaute u, Abrahama thlaha fate u, in zinga Pathian tih zawng zawngte u, keimahniho hnenah hian he'ng chhandamna thu hi min rawn thawn chhuak a nih hi.

²⁷Jerusalem khuaa awmten an hotute nen, ani chu an hriat loh avang leh zawlneite thu, Chawlhni apianga chhiar thin kha, an hriat hek loh avangin, ani chu thiam loh chantirin, chu mi thu chu an hlen ta a.

²⁸A thihna khawp meuh a chungah engmah an hmuh loh pawhin Pilata hnenah tihhlum an ngen a.

²⁹Tin, a thu zawlneiten an ziak lawk zawng zawng kha a hlen zawhin thing ata chu an la thla a, thlanah an zalh ta a.

³⁰Nimahsela Pathianin mitthi zing ata a kai tho leh ta a;

³¹tin, Galili ram ata Jerusalem khuaa ama ruala chho vete hnenah chuan ni rei tak chhungin a inlar thin a; chung mite chu tunah hian mi hnenah a thuhretute an ni e.

³²Keini pawhin thlahtute hnena thutiam kha a chanchin lawmawm kan rawn hrilh che u hi,

³³khatia Pathianin Isua a kaihthawhah khan, kan fate hnenah hian chung chu a hlen a ni; Sam pahnihnaah, 'Ka Fapa i ni e, vawiinah hian ka hring a che,' tih ziak ang bawk khan.

³⁴Tawihna hmuna kal leh lo turin Pathianin ani chu mitthi zing ata a kaihthawh turzia thu chu heti hian a sawi, 'Davida hnenah khawngaihna ka tiam tlatte kha nangmah ka pe ang che,' tiin.

³⁵Chuvangin Hla dangah, 'I Mi Thianghlim chu tawihral i phal lo ang,' a ti bawk a.

³⁶Davida zawng, Pathian rorelsak angin a dam rualpuite rawng a bawl zawhah khan a muhil a, a thlahtute hnenah an zalh a, a tawihral tawh alawm;

³⁷Pathian kaihthawh erawh kha chu a tawihral loh kha.

³⁸Chutichuan unaute u, hre rawh u; amah avang chuan sual ngaihhnathiamna thu in hnenah hrilh a nih hi;

³⁹tupawh a ring apiang engkimah ama thiam chantirin an awm, chungah chuan Mosia danin thiam chantirin in awm thei lo e.

⁴⁰Chuvangin fimkhur rawh u, chutilochuan zawlneite lehkhabua an sawi kha in chungah a lo thleng dah ang e,

⁴¹'Hmusittute u, en rawh u, mak ti u la, boral rawh u; in dam chhung hian thil kawng khat ka tih hi, chu thil chu miin hrilh che u mah se la in awih tawp lo vang,' tih kha," a ti a.

⁴²Tin, an chhuahin Chawlhni lehah chung thu chu sawi leh atan an ngen a.

⁴³Tin, inkhawmhote chu an tin veleh Judate leh an saphun Pathian ngaihsak zinga mi tam takin Paula leh Barnaba chu an zui zel a; anni chuan an lo bia a, Pathian khawngaihnaah chuan awm reng turin an fuih a.

⁴⁴Tin, Chawlhni lehah chuan akhua thawin Pathian thu ngaithla turin an rawn inkhawm a.

⁴⁵Nimahsela Judaten mipuite chu an hmuh veleh an itsik em em mai a; Paula thusawi chu an hnial kalh a, an sawt hle a.

⁴⁶Tin, Paula leh Barnaba chuan huai takin an sawi chhuak a, "Pathian thu hi nangmahni hnenah sawi hmasak tur reng a ni; nimahsela in hnar kir a, chatuana nung tlak loa in inruat tak ahnuin, hre rawh u, Jentailte lam kan hawi ta ve ang.

⁴⁷Chutiang chuan Lalpain thu min pe a ni, 'Jentailte tiengtuah ka ruat a che, kawlkil thlenga Chhandamtua i awm theihna turin, tih ziak ang khan," an ti a.

⁴⁸Tin, Jentailte chuan chung thu chu an hriatin an lawm a, Pathian thu an chawimawi a, tin, chatuana nung tura ruat apiang chuan an ring ta a.

⁴⁹Tin, Lalpa thu chu, chu mi ram khawvelah chuan a darh ta a.

⁵⁰Nimahsela Judate chuan hmeichhe zahawm Pathian ngaihsakte leh khuaa upahote chu an fuih a, Paula leh Barnaba chu an tihduhdahtir a, an ram ata an hnawt chhuak ta a.

⁵¹Tin, anni chuan an chungah an kephaha vaivut an thing thla a, Ikonion khua an thleng a.Tin, zirtirhote chu lawmna leh Thlarau Thianghlimin an khat hlawm a.

⁵²Tin, zirtirhote chu lawmna leh Thlarau Thianghlimin an khat hlawm a.