Read Baibul, Mizo Tirhkohte 15 Bible Online

Tirhkohte 15 - Baibul, Mizo bible

Tirhkohte 15

¹Tin, mi tte emaw Judai ram ata an lo chhuk a, "Mosia dan anga serh in tantir loh chuan chhandam in ni thei lo ang," tiin unaute chu an zirtir a.

²Chutichuan Paula leh Barnaba chu anmahni nen inhnial namena an inhnial loh a, an inkhin tlat avangin, Paula leh Barnaba chu an zinga tute emaw nen, chu thubuai chungah chuan Jerusalem khuaa tirhkohte leh upate hnenah chho turin an ruat a.

³Chutichuan kohhrante chuan an han thlah a, anni chuan Jentailte hawi kir lehzia thu chu hril zelin, Phoiniki ram leh Samari ram an fang chhuak ta a; tichuan unaute zawng zawng an tilawm em em a.

⁴Tin, Jerusalem khua chu an han thlen chuan kohhranhote, tirhkohte, upate chuan an lo lawm a, tin, Pathianin anmahni hmanga thil a tih zawng zawngte chu an hrilh a.

⁵Nimahsela Pharisai pawla mi ring ve tute emaw an tho a, "Jentailte chu an serh tan tur a ni, Mosia dan awih pawh an hnenah tiam kher tur a ni," an ti a.

⁶Tin, tirhkohte leh upate chu, chu mi thu chu ngaihtuah turin an inkhawm a.

⁷Tin, an inhnial chiam hnuin Petera a tho a, an hnenah : "Unaute u, Jentailten keima kaa Chanchin Tha thu hriaa awih tura Pathianin hmana in zing ata mi ruatzia kha in hria e.

⁸Tin, rilru hretu Pathianin keini min pek ang bawk khan Thlarau Thianghlim an hnenah pe vein an chungah a lawm tih a hriattir a;

⁹tin, keini leh anni thlei bik loin rinin an rilru a tithianghlim a.

¹⁰Chutichuan min thlahtu leh keini zawh tawh loh nghawngkawl kha tunah zirtirhote chunga nghah tumin engati nge Pathian fin in hnial kalh le?

¹¹Anmahni rin ang bawk hian keini pawhin Lalpa Isua khawngaihna avanga chhandam tur niin kan inring si a," a ti a.

¹²Tichuan mipui zawng zawng chu an ngawi reng a, Barnaba leh Paulan Pathianin anmahni hmanga Jentailte zinga chhinchhiahna leh thilmak a tih thu kha an hrilh chhung zawng an ngaithla a.

¹³Tin, an sawi zawhin Jakoba'n a sawi ve thung a: "Unaute u, ka thu ngaithla rawh u,

¹⁴Pathianin ama hming pu atan an zing ata mite la chhuak turin Jentailte a kan tan tirh dan thu chu Sumeona hian a sawi ta a.

¹⁵Tin, chung thu leh zawlneite thu hi a inhmeh a ni:

¹⁶'Chung zawhah chuan ka kir leh ang a, Davida bawkte chim kha ka siam leh ang a, a chhe lai apiang pawh ka rem chho leh ang;

¹⁷Mi dang, Jentail zawng zawng ka hming mi tawmhote chuan, Lalpa an zawnna'n chu bawkte chu ka tungding ang' tiin.

¹⁸Khawvel siam tirh ata he'ng thu hriattir thintu Lalpa chuan a ti e, tih ziak hi.

¹⁹Chuvangin heti hian ka ruat a ni, Jentailte zinga Pathian lam hawite chu tihrehawm lo i la,

²⁰milem biakna thil bawlhhlawh ei te, inngaih te, sa rehhlum leh thisen eite banna turin an hnenah lehkha thawn zawk i la ka ti ber a ni.

²¹Mosia'n hman lai ata tawh khaw tinah a thu tlangaupuitu a nei thin si a, inkhawmna inahte Chawlhni apiangin a thu chu chhiar a nih thin kha," a ti a.

²²Tin, tirhkohte, upate, kohhran zawng zawngte nen chuan, an pawla mi thlana Paula leh Barnaba hnenah Antiokei khuaa kaltir tha an ti a; an thlante hming chu Juda (Barsaba an tih) leh Sila an ni a, chu mite chu unaute zinga hotu deuh an ni a.

²³Tin, hetiangin an ziak a, an kutah an thawn a. "Tirhkohte leh unaute zinga upaten Antiokei khua te, Suria ram te leh Kilikia rama Jentail unau awmte chibai an buk e.

²⁴Kan pawl zinga mi tuten emaw thu sawiin an tibuai che u a, in rilru an timangang tih kan hria e, an hnenah thu engmah kan pe si lo a.

²⁵Chuvangin thu khat vuaa kan inkhawmin, kan duh tak Barnaba leh Paula,

²⁶Lalpa Isua Krista hming avanga thih dawn lote kal rual hian mi thlante in hnena rawn kaltir ve tha kan ti a.

²⁷Chutichuan Juda leh Sila kan rawn tir a nih hi, anni pawhin he'ng thu bawk hi tawngkain an hrilh ang che u.

²⁸Thlarau Thianghlim leh keinin, he'ng thu pawimawh lo hi chu, phurrit zual in chungah nghat lo i la a tha kan ti;

²⁹milem biakna sa ei te, sa thisen ei te, sa rehhlum ei te, inngaih te bang u la kan ti; he'ng hi in ban chuan in tan a tha ang. Dam takin awm rawh u," tiin.

³⁰Chutichuan an tirhin an kal a, Antiokei khua an thleng chhuk a; tin, mipui chu an ko khawm a, lehkha chu an pe a;

³¹tin, an chhiar zawhin thlamuanna thu avang chuan an lo lawm ta hle a.

³²Tin, Juda leh Sila chu zawlnei an ni bawk a, thu tam takin unaute chu an thlamuan a, an tinghet a.

³³Tin, chutah chuan rei deuh an awm hnuin, anmahni tirtute hnena hawng leh turin unaute chuan thlamuang takin anchhuahtir leh ta a.

³⁴Nimahsela, Sila chuan chutah la awm rih chu thain a hria a.

³⁵Paula leh Barnaba erawh chu Antiokei khuaah chuan Lalpa thu zirtir leh hrilin an awm reng a, mi dang tam takte nen.

³⁶Tin, ni eng emaw zat hnuah chuan Paulan Barnaba hnenah, "Tunah kal leh i la, khaw tina Lalpa thu kan hrilhna apianga unau awmte kha kan zel i la, an awm dan i en ang," a ti a.

³⁷Tin, Barnaban Johana (Marka an tih chu) an hnenah hruai a tum a,

³⁸Paula erawh chuan ani chu an hnena hruai tha a ti lo, Pamphulia ramah anmahni a kirsan a, hnathawhnaa an hnena a kal ve tak loh avang khan.

³⁹Tichuan nasa takin an lo inhnial ta a, chutichuan an inthen a, Barnaban Marka chu a hnenah a hruai a, Kupra thliarkar lamah lawngin a kal ta a.

⁴⁰Paula erawh chuan Sila a thlang a, unauten Lalpa khawngaihnaa an kawltir hnuin a kal chhuak ta a.Tin, kohhran pawlte chu tinghet zelin Suria leh Kilikia ram a fang chhuak ta.

⁴¹Tin, kohhran pawlte chu tinghet zelin Suria leh Kilikia ram a fang chhuak ta.