Read Baibul, Mizo Tirhkohte 18 Bible Online

Tirhkohte 18 - Baibul, Mizo bible

Tirhkohte 18

¹Chung thil hnuah chuan Paula chu Atheni khua ata chu a chhuak a, Korinth khuaah a kal ta a.

²Tin, a hming Akuilia Juda pakhat a hmu a, chu mi chu Ponto rama piang a ni a, Klaudian Juda zawng zawng Rom khua ata chhuah thu a pek avangin a nupui Priskili nen Itali ram ata lo kal hlim an ni a.

³Tin, Paula chu, chu mite hnenah chuan a thleng ta a, tin, an hnathawh ang thawk a nih avangin anmahni a hrawn a, an hnenah a thawk ve thin a; an hnathawh chu puan in siam a ni a.

⁴Tin, Chawlhni apiangin inkhawmna inah khun takin thu a hril thin a, Judate leh Grikte chu thlem thluk a tum thin a.

⁵Tin, Sila leh Timothea chu Makedonia ram ata chu an lo chhukin, Paula chu thu hril chauhin a awm ta a, Isua kha Krista chu a ni tih Judate hnenah a hrilhfiah thin a.

⁶Nimahsela an dodala an sawtin Paulan a puan a thing a, an hnenah, "In thihna mawh chu nangmahniin phur ang che u; kei zawng ka hul a ni e; tun achinah Jentailte hnenah ka kal ang," a ti a.

⁷Tin, chuta ta chu a kal a, a hming Tita Justa mi pakhat inah a lut a, chu mi chuan Pathian a be thin a; a in pawh chu inkhawmna in nen a inzawm a ni.

⁸Tin, Krispa, inkhawmna in hotu chuan a chhungte zawng zawng nen Lalpa an ring a, Korinth khuaa mitam tak pawhin an hria a, an ring ve a, baptisma an chang ta a.

⁹Tin, zanah Lalpa'n Paula hnenah chuan mumang angin, "Hlau suh la, ngawi loin thu sawi zel rawh;

¹⁰kei I hnenah ka awm alawm, tina tur chein tuma'n I chungah kut an thlak lo vang; he khuaah hian mi tam tak ka nei si a," a ti a.

¹¹Tin, Paula chu chutah chuan an zingah Pathian thu zirtirin kum khat leh thla ruk a awm ta a.

¹²Tin, Galliova Akaia rama lal aiawha a awm laiin Judaten rual takin Paula an bei a, rorelna thutphah hmaah an hruai a,

¹³He mi hrep hian Dan lo anga Pathian be turin mi a thlemthlu thin a ni," an ti a.

¹⁴Tin, Paulan a chhan dawnin, Galliovan Judate hnenah chuan "Judate u, he'ng hi thil dik lo thu emaw thiltih sual emaw tal ni se la, mathei loin ka ngaihsak ang che u a;

¹⁵nimahsela thute, hmingte, in dan chung thute mai a nih chuan nangmahni'n rel zawk rawh u; kei zawngin chutiang thu chu ngaihtuah ka duh lo e," a ti a.

¹⁶Tin, rorel thutphah atang chuan anni chu a hnawt bo ta a.

¹⁷Tin, Grik mi zawng zawngin inkhawmna in hotu Sosthena an man a, rorel thutphah hmaah chuan an vua a, Galliova chuan chung an thiltih chu engah mah a ngai lo a.

¹⁸Tin, chu mi hnuah chuan Paula chu ni rei tak a la cham reng a; chu mi zawh chuan unaute chu tawng thain a then a, chuta ta chu Suria ram lamah lawngin a kal ta a, a hnenah Priskili leh Akuila chu an kal ve bawk a; Paulan thutiam a neih avangin Kenkriai khuaah a lu a met zet a.

¹⁹Tin, Ephesi khua chu an thleng a,chutah chuan anni chu a hnutchhiah ta a;ani erawh chu inkhawmna inah a lut a, Judate hnenah khun takin thu a sawi rih a.

²⁰Tin, rei deuh chamah an ngen a, nimahsela a remti lo a,

²¹Pathianin a phal chuan in hnenah ka lo kal leh ang," tiin tawng thain a then a, Ephesi khua ata chu lawngin a kal ta a.

²²Tin, lawng ata chu Kaisari khuaah a chhuak a, Jerusalem khuaah a han kal a, kohhranhote chu chibai a buk a; tin, chu mi zawhah chuan Antiokei khuaah a zuk kal ta a.

²³Tin, chutah chuan rei ngial a awm hnuin a kal leh a, zirtirho zawng zawng tinghetin Galatia ram leh Phrugia ram chu a fang chhuak vek a.

²⁴Tin, Juda pakhat, a hming Appollova, Aleksandria khuaa piang, mi fing tak, Ephesi khuaah chuan a zuk kal a; ani chuan Pathian Lehkha Thute a hre nasa em em a.

²⁵Chu mi chu Lalpa Kawng thu zir tawh a ni a, rilrua thahnemngai tak a nih avangin Isua chanchin chu ngun takin a hril a, a zirtir thin a, Johana baptisma thu chauh a hre si a.

²⁶Tin, inkhawmna inah huai takin thu a sawi tan ta a. Chutichuan Priskili leh Akuila chuan a thusawi an hriatin an inah an hruai a, a hnenah Pathian Kawng thu fel lehzualin an hrilhfiah ta a.

²⁷Tin, ani chuan Akaia rama kal kai a tum veleh unauten an fuih a, amah an lo lawmna turin zirtirhote hnenah lehkha an ziaksak a; tin, a thlen chuanin Pathian khawngaihna avanga ringtute chu, nasa takin a pui a;vantlang hriatin Judate chu nasa takin a tidang a, Pathian Lehkha Thu hmangin Isua kha Krista chu a ni tih a hriattir thin a.

²⁸vantlang hriatin Judate chu nasa takin a tidang a, Pathian Lehkha Thu hmangin Isua kha Krista chu a ni tih a hriattir thin a.