Read Baibul, Mizo Tirhkohte 2 Bible Online

Tirhkohte 2 - Baibul, Mizo bible

Tirhkohte 2

¹Tin, Pentikost ni a lo thlenin, an zain hmun khatah an awm khawm vek a.

²Tin, thawklehkhatan van ata ri, thlipui tleh angin a lo thleng ta phut a. Tin, chu chuan an thutna in chu a tikhat ta vek a,

³tin, leite te, amaha insem darhin, mei angin an hnenah a lo inlar ta a. Tin, an chungah chuang theuh a,

⁴an zain Thlarau Thianghlimin an khat ta vek a, Thlarauin a tawngtir ang zelin tawng dangin an lo tawng ta a.

⁵Tin, van hnuaia hnam tin zing ata Pathian ngaihsak Judate Jerusalem khuaah an cham a.

⁶Tin, chu ri chu an hriat veleh mipui an rawn inkhawm a, mi tinin an tawng chu mahni tawng theuhin an lo hriat avangin an rilruin an lo buai a.

⁷Tin, an za chuan an mangang a, mak an ti hle a, "En teh u, henga twngte zawng zawng hi Galili rama mi an ni lo em ni?

⁸Engtin nge kan zaa kan tawng pianpui anga kan hriat theuh?

⁹Thenkhat Parthai hnam te, Medai hnam te, Elamitai hnam te kan ni a; thenkhat Mesopotamia rama awm te, Judai rama awm te, Kappadokia rama awm te, Ponto rama awm te, Asia rama awm te,

¹⁰Phrugia rama awm te, Pamphulia rama awm te, Aigupta rama awm te, Kurini khaw kiang vela Libua rama awm te kan ni a; thenkhat Rom khaw khual - Judate leh an saphunte nen - kan ni a,

¹¹thenkhat Krit thliarkara mi leh Arab rama mi kan ni si a; nimahsela Pathian thiltih ropuite an sawi, mahni tawng theuhin kan hriat si hi!" an ti a.

¹²Tin, an za chuan mak an ti hle mai a, a ngaihna an hre lo a, "Heng hi engtizia nge ni?" an inti a.

¹³Thenkhatin an nuihsan a, "Uain thar an rui a nih hi," an ti a.

¹⁴Nimahsela Petera chu sawm leh pakhatte nen an ding za a, ani chuan aw ring takin an hnenah a sawi a, "Nangni Judai rama mite u, nangni Jerusalem khuaa awm zawng zawngte u, he'ng hi hria u la, ka thu pawh ngai rawh u.

¹⁵Hengho hi in rin angin an rui lo e, fehrehsan lai chauh a nih hi.

¹⁶Heng hi zawlnei Joelan a sawi kha a ni zawk:

¹⁷Pathianin, 'Ni hnuhnungahte chuan heti hi a ni ang a, Mi zawng zawng chungah ka Thlarau ka leih ang a; tichuan in fapate, in fanuten ka thu an hril ang a; in tlangvalten inlarnate an hmu ang a, in putarten mumangah an mang ang a;

¹⁸A ni, chung niahte chuan ka bawihpate, ka bawihnute chungah pawh, ka Thlarau ka leih ang a, ka thu an hril ang,

¹⁹Tin, chung lam vanah thilmak te, hnuai lam leiah chhinchhiahna te ka hmuhtir ang a; thisen te, mei te, meikhu hu te nen:

²⁰Ni thimah a chang ang a, thla thisenah a chang ang a, Lalpa ni ropui tak leh hmingthang tak chu a lo thlen hmain;

²¹Tin, heti hi a ni ang a, tupawh Lalpa hming lam apiang chu an him ang,' a ti e,

²²Nangni Israel mite u, he'ng thu hi hre rawh u: Nazaret Isua, Pathianin amah hmangin in zingah thil ropui te, thilmak tak te, chhinchhiahna te a tih khanin a hriat chiantir che u kha; nangni ngeiin chung chu in hre si a: a tih kha.

²³kha mi kha Pathian rel tlat leh hriat lawk angin an mantir a, nangni'n mi sualte kutin krawsah in khengbet a, in tihlum ta a.

²⁴Kha mi kha, Pathianin thihna phuarnate chu a phelhsak a, a kai tho ta a; amah chu thihna chelh hlen rual a nih loh avangin.

²⁵Tin, Davida chuan a thu a sawi a, 'Ka hmaah kumkhuain Lalpa chu ka hmu thin a, ka mangan lohna'n ka ding lamah a awm a ni;

²⁶Chuvangin ka thinlung a hlim a, ka lei pawh a lawm a; chuvangin, ka tisa pawh beisei takin a awm bawk ang.

²⁷Ka thlarau mitthi khuaah i hnutchhiah lo ang a, I mi thianghlim tawihral i phal hek lo ang a,

²⁸Nangin nunna kawngte mi hriattir a, nangin i hmelin lawmin mi tikhat ang,'tiin.

²⁹Unaute u, chi thlahtu Davida thu hi hlau loin in hnenah ka sawi thei e; ani zawng a thi a, phum pawh an phum tawh alawm, a thlan pawh tun thlengin kan hnenah a la awm reng a.

³⁰Ani chu zawlnei a ni a, Pathianin a thalbea mi tu emaw a thutphah chungah a thuttir dawn tih chhechhamin a sawi tih a hria a;

³¹tichuan, chung chu a lo hriat lawk reng avangin Krista thawh leh tur thu a sawi a ni, 'Mitthi khuaa hnutchhiahin a awm hek lo, a ruang pawh a tawih hek lo,' tiin.

³²Chu Isua chu Pathianin a kai tho leh ta reng a ni, chu chu a hretu kan zain kan ni e.

³³Pathian kut ding lamah chawimawiin a awm a, Thlarau Thianghlim tiam chu Pa hnen ata a hmu a, in hmuh leh in hriat hi a han leih a nih hi.

³⁴Davida zawng vanah a lawn chho lo a ni, amah ngeiin, Jehoa'n ka Lalpa hnenah 'Ka ding lamah thu reng rawh,

³⁵I hmelmate i kephah nghahchhana ka siam hma loh zawng,' a ti e, a ti zawk a nih kha.

³⁶Chutichuan Isua in khenbeha ngei kha, Pathianin Lal leh Krista ni fawmin a siam ta tih Israel hnam tinin hre mawlh rawh se," a ti a.

³⁷Tin, chung thu chu an hriatin an thinlunga chhun ang an lo ni ta a, Petera leh tirhkoh dangte hnenah chuan, "Unaute u, engtin nge kan tih tak ang?" an ti a.

³⁸Tin, Petera chuan an hnenah, "Sim u la, in sual ngaihdamna'n Isua Krista hmingin baptisma chang theuh rawh u; tichuan Thlarau Thianghlim pek hi in hmu ang.

³⁹A tiam kha nangni tan pawh, in fate tan pawh, hla taka mi zawng zawng tan pawh, Lalpa kan Pathianin a hnena a koh apiangte tan a ni e," a ti a.

⁴⁰Tin, thu dang tam takin a hrilhfiah a; "Tun lai thangthar bengtla lote lakah hian intihim rawh u," tiin a fuih a.

⁴¹Tin, a thu zawm apiangin baptisma an chang ta a; chu mi niah chuan mi sangthum lai belhchhahin an awm a.

⁴²Tin, tirhkohte zirtirin, inpawlin, chhang phelin, tawngtaiin thahnemngai takin an awm reng a.

⁴³Tin, mi tinin an hlau ta a; tirhkohte chuan thilmak leh chhinchhiahna tam tak an ti a.

⁴⁴Tin, a ring apiang chuan engkim an intawm hlawm a,

⁴⁵an rote, an sumte an hralh a, an chakkhai daih lek theuhin an zaa hnenah chuan an sem thin a.

⁴⁶Tin, ni tin rilru hmun khatin Pathian biak inah chuan thahnemngai takin an awm thin a, an in lamahte pawh chhang an phel a, hlim tak leh lungawi takin an chaw an ei thin a,Pathian an fak a, mi zawng zawng lawmzawngin an awm thin. Tin, a chhandam mek apiangte chu Lalpain ni tin an hnenah a teltir zel thin.

⁴⁷Pathian an fak a, mi zawng zawng lawmzawngin an awm thin. Tin, a chhandam mek apiangte chu Lalpain ni tin an hnenah a teltir zel thin.